Read tiv Duteronomi 20 Bible Online

Duteronomi 20 - tiv bible

Duteronomi 20

¹Zum u ú za ityav mbi nôngon a mbaihomov ou, man ú nenge anyinya man akeke a nyinya kua ior mba ve hembe u iyenge kpaa, de cie ve ga; gadia TER, Aôndo wou, u A dugh a we ken tar u Igipiti la, ngu a we imôngo.

²Tsô, shighe u né za mgbôghom hen ijiir i utya yô, pristi a̱ kporom a̱ ôr kwagh a ior,

³a̱ kaa a ve er: Ungwa nen, ne Iserael, nyian ne va sha u nôngon ityav a mbaihomov enev; ishima i̱ de yen ne ga, de cie nen ga, de gbidyen nen ikarikase iyol ga, shi de cie nen sulugha sha ci ve ga;

⁴gadia TER, Aôndo wou, ngu zan a ven imôngo sha u nôngon ityav sha ci wen a mbaihomov enev, sha u Una na ne né hemba ve.

⁵Mbavesen kpaa ve̱ ôr kwagh a ior, ve̱ kaa er: Shin ma or ngu u nan maa iyou i he, nan lu a nyôr ker ga ase? Yô, nana̱ hide hen iyou i nan, sha er nana̱ de za kpeen ken utya, orgen nana̱ nyôr ker ga yô.

⁶Shin ma or ngu u nan môôr ikon i wain, nan lu a ya atam a i ga ase? Yô, nana̱ hide hen ya u nan, sha er nana̱ de za kpeen ken utya, orgen nana̱ ya atam a i ga yô.

⁷Shin ma or ngu u nan sôôr kwase nan lu a er un ga ase? Yô, nana̱ hide hen ya u nan, sha er nana̱ de za kpeen ken utya, orgen nana̱ er un ga yô.

⁸Mbavesen mbala kpaa shi ve̱ seer ôron kwagh a ior, ve̱ kaa er: Shin ma or ngu u nan lu a mciem, nan lu a ishima i yinan ase? Yô, nana̱ hide hen ya u nan, sha er ishima i anngôôv mba nan i̱ de yen er i nan nahan ga.

⁹Tsô zum u mbavesen mbala vea kuren kwaghôron a ior yô, i̱ ver ukurmbautyav sha ior.

¹⁰Zum u ú mgbôghom a ma gar sha u nôngon ityav a na yô, ôr kwagh a na sha gbenda u bem.

¹¹Tsô aluer una rumun bem, una bugh u yô, nahan ior mba á kohol ve ker la cii vea hingir sha ikev you, vea eren we tom.

¹²Aluer una venda bem a we, á sar un ka nôngon ityav a we yô, kase un sha afo a utya,

¹³man zum u TER, Aôndo wou, Una na u un sha ikev yô, wua hanma nomsoor u nan lu ker sha zwa u sanker;

¹⁴kpa kasev kua mbayev mba kiriki man uzendenya kua akaa a a lu ken gar la cii, ishar i utya la cii, ngohol sha ci wou; ya ishar i mbaihomov ou i TER, Aôndo wou, A ne u yô.

¹⁵Kape ú er a agar a a lu a we ca, cii je la, ka agar a a lu a akuraior angan ga yô.

¹⁶Kpa agar a akuraior angan a TER, Aôndo wou, Una na u a dyako yô, de deen kwagh u a lu a iôôn môm môm, a̱ lu uma ga,

¹⁷kpa tim ve purututu: Mbahiti man Mbaamor man Mbakanaan man Mbaperishi man Mbahivi man Mbayebushi, er TER, Aôndo wou, A kaa u nahan,

¹⁸sha er ve̱ de tesen ne u eren aeren a ve a ihôngorough a ve lu eren mbaaôndo vev la, man né gema né er TER, Aôndo wen, isholibo ga yô.

¹⁹Zum u wea kase gar sha afo a utya ica i gba, ú nôngo ityav a na wer ú ngohol un yô, de timin ikon na gberen i sha ijembe ga; i rumun er u̱ ya atam a i; yô, de gberen i ga; ikon i ken akôngo ka or shin u nenge ityav a i?

²⁰Saa ikon i u fe, i lu i yan ga la, ka i ú tim i, ú gber i, ú kaha agil sha u nôngon ityav a gar u a nenge a we, zan zan una gba ye.