Read tiv Duteronomi 32 Bible Online

Duteronomi 32 - tiv bible

Duteronomi 32

¹Ver nen ato ne Usha, me ôr kwagh; tar u̱ ungwa akaaôron a zwa wam.

²Ityesen yam i̱ haa er ura nahan; kwaghôron wam a̱ gba er avure nahan, er ura u hamber sha agumatoho nahan, man er ura u nôôn sha ahu nahan.

³Gadia me yôô iti i TER. Wuese nen Aôndo wase er A hembe yô.

⁴Ka Vande, tom Na ngu vough; gadia igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi.

⁵Ve er a Na dang, ve kera mba ônov Nav ga, mba a acôghol iyol; ka kov u bo u lun kpe.

⁶Ka TER je, ne gem ne eren a Na nahan yee; ne ior i geseghee i lun kpe ne! Ka Teru u A gbe u ne ka Un A er u, A maa u ye gaa?

⁷Umbur ayange a ngise, ver ishima sha anyom a sha ikov ikov la; pine teru, a̱ kaa u, mbatamen ou kpaa, ve̱ ôr u.

⁸Zum u Uhembansha na akuraior a sha won dyako ve la, zum u A pav ônov mba iorov yô, A ver akuraior akighir a ityar ve sha iyenge i ônov mba Iserael.

⁹Gadia kwar u TER ka ior Nav je; Yakob ka kwar u dyako Na.

¹⁰A zua a na ken tar u desereti, ken taaikôngo u akaa a vaan ker; A kase un, a wa atô, A yisa un, A kura un er wanshe Na yô.

¹¹Er iguve ka i mgbegha iya i i, i purugh sha ônov mba i, i samber a akper a i, i ngohol ve, i tôô ve sha akper a i nahan,

¹²ka TER tseegh, A hemen un ye, ma aôndo ugen lu a na imôngo ga.

¹³A er un a unde sha ajiir a taven sha a tar, a ya iyiagh ki ken sule; A er un a suse iyough ken vande man mkurem kpaa ken vande u taver.

¹⁴Atumbabua a kôrough man atumba a ivo kua ahôm a aniyôngov man anomaiyôngo, anomabua a Bashan, man ivo, kua homon alakema, man awambe a atam a wain kpaa u ma, wain u peghan hugh.

¹⁵Kpa Yeshurun kehe, a ker apande; u kehe, u gba ikôr, u wa ahôm; tsô a gbihi Aôndo u A er un la, a laha Vande u myom na kpaa.

¹⁶Ve kpoghol iwuhe Na sha mbaaôndo mbagenev; ka akaa a ihôngorough ve bam Un mi ye.

¹⁷Ve na ujijingi mba bov mba ve lu Aôndo ga la nagh, mbaaôndo mba ve fe ve ga, mbaaôndo mba hev, mba ve dugh ainge ne, mba uter enev cia ve ga la.

¹⁸Kpa Vande u u mar u la, u umbur u ga, Aôndo u A mar u la hungul we.

¹⁹TER nenge, nahan ishima ndôhôr Un a ve, sha ci u ishima vihi Un a ônov Nav mba nomso man mba kasev.

²⁰A kaa er: Me yer ve ishigh Yagh, Me nenge er mkur ve Una lu yô; gadia ve ka kov u aren ave, ônov mba lun jighjigh ga.

²¹Ve kpoghol iwuhe Yam sha kwagh u a lu Aôndo ga je, ve bamem sha akaa a ve a gbilinigh. Mo kpaa Me kpoghol iwuhe ve sha mba ve lu ikurior ga je, me bam ve sha ikurior i lanen kwagh.

²²Gadia i keer usu sha iyugh Yam, ngu yeghen je u ar shin atô u Sheol je; ngu hian tar a iyiagh ki u ngu hian amagh a iwoogh.

²³Me haa atsan sha ve; Me bee avaan Am sha ve.

²⁴Vea vôr ijen man vea saa ishe, sha angev mbu tseeyol, man angev mbu bov kpaa; Me tindi anyi a inyamikume sha ve, man megh ku akaa a a kper a kpela inya.

²⁵Ken won yô, sanker una wuan kera, ken ayou yô, mciem maa tan iyol; á tim anyekwaor man iniunkwase, man wanikundan kua ormendenivu kpaa.

²⁶Ma M kaa mer: Me fehe ve kera, Me er, ior vea kera umbur ve sha won ga;

²⁷kpa M cia tarnahan u mbaihomov, sha er mbaahendanev vev, ve̱ de luun a mhen u tsumen, ve̱ kaa er: Uwegh asegh kende sha, ka TER A er akaa ne cii ga, ze.

²⁸Gadia ve ka ikurior i mhen ve a saa yô, ma mkav u kaven kwagh kpaa ngu ken a ve ga.

²⁹Vea lu a kwaghfan yô, ma ve kav kwagh, ma ve hen kwagh u mkur ve!

³⁰Á er nan man or môm nana zenda ior dubu, ior ihiar kpaa vea er ior dubu pue ve a yevese, saa Vande ve ua tee ve, TER kpaa A na ve sha ikev i ior, gaa?

³¹Gadia vande ve ngu er Vande wase ga, mbaihomov asev ayol a ve je kpaa ve fa nahan.

³²Gadia kon u wain ve ka kon u wain u Sodom je, u ken ishule i Gomora; atam a wain ve ka atam a bo, asume ve ka a yuan je.

³³Wain ve ka megh ku iyô i vesen, megh ku boogh ku gbinde.

³⁴I ombo un her a Mo, man i senda un ken ayou Am a koson akaa ker gaa?

³⁵Iyevoron ka i Yam man mkimbi kpaa, shighe u nguhar ve ua lyemen yô; gadia iyange i ican i mtim ve kuma ve, akaa a á va tser ve la, aa va fese je.

³⁶Gadia TER Una ôr ior Nav ijir sha mimi, mhôônom maa kôr Un a mbayev Nav, zum u Una nenge agee ve aa bee yô, man ma or kera shi ga, u ken uikangen shin u nan tem enger enger kpaa ga.

³⁷Tsô Una kaa er: Mbaaôndo vev mba hana, vande u ve sughur sha u la,

³⁸mba ve ye ahôm a iniav vev mbi sôngon, man ve ma wain u nagh vegh ku man la? Yô, ve̱ mough, ve̱ wase ne, ve hingir kwaghyisan wen!

³⁹Yô, nenge ka Mo je ne, ma aôndo ugen ngu a Mo imôngo ga; ka M wua, M shi M nder; M gber ivav, M shi M er i de kpaa; ma or môm ngu a tahav mbu nana yima ugen sha ikev Yam ga.

⁴⁰Gadia M kende uwegh agh Sha, M ka mer: Er M lu u uma gbem sha won ne,

⁴¹aluer Me wua sanker Wam u engem, Me kôr ijirôron i bo ave yô, Me or iyev sha mbaahendanev Av, me kimbi ve mba ve kerem ihom la.

⁴²Me er avaan a Am a̱ hunde awambe, sanker Wam kpaa una ya inyam— sha awambe a mba i woo ve man a mbakwarev, sha ityouv mbi meran mbi mbaihomov la.

⁴³Ember nen, ne akuraior, a ior Nav imôngo; gadia Una or iyev sha awambe a mbayev Nav, Una or iyev sha mbaahendanev, Una na iwom sha ci u tar Na man ior Nav.

⁴⁴Tsô Mose va, va ôr asember a icam ne cii sha ato a ior, un vea Hosea wan u Nun.

⁴⁵Mose er Iserael cii akaaôron ne cii, been yô,

⁴⁶a kaa a ve er: Ver nen ishima sha akaaôron a m pase ne nyian ne cii; sha er ne wa ônov enev kwagh, ve̱ waan akaaôron a tindi ne cii iko, ve̱ eren sha mi yô.

⁴⁷Gadia á lu ne kwagh u gbilinigh ga, kpa ka uma wen je; ka sha kwagh ne je man á seer ne ayange ken tar u né peren Yordan sha u za ngohol u la ye.

⁴⁸Shi TER ôr kwagh a Mose sha iyange la, kaa er:

⁴⁹Za za unde sha uwo u Abarim, ka uwo u Nebo u u lu ken tar u Moabi, u u lu sha ishigh ki Yeriko la; yô, nenge tar u Kanaan u M lu nan Mbaiserael sha u ve̱ ya dyako sha u la;

⁵⁰yô, kpe sha uwo u ú unde la, za kohol ior ou, er Aron anngôu kpaa a kpe sha uwo u Hor man a za kohol ior nav nahan;

⁵¹sha ci u ne hembam ato hen atô u Mbaiserael hen mngerem ma Meriba u Kadeshi la, ken desereti u Zin; sha ci u ne tsegham hen atô u Mbaiserael ga yô.

⁵²Gadia ú nenge tar la sha ishigh you; kpa we yô, ú kera nyôr ken tar u Me na Mbaiserael la ga.