Read tiv Duteronomi 5 Bible Online

Duteronomi 5 - tiv bible

Duteronomi 5

¹Tsô Mose yila Mbaiserael cii, a kaa a ve er: Ne Mbaiserael ungwa nen akaawan man atindi a me ôr ne a sha ato a en nyian ne, sha er ne henen a, man ne waan iko u eren sha mi kpaa yô,

²TER, Aôndo wase, ya ikur a vese hen Horebi.

³Ka uter asev TER ya ikur ne a ve ga, kpa ka se je, mba se lu uma her nyian ne cii.

⁴TER ôr kwagh a ven ishigh a ishigh je, sha uwo la, ken atô u usu

⁵(ka mo je, yan m tile hen atô u TER a ven hen shighe la ye, sha u me pase ne kwaghôron u TER yô; gadia ne lu cian usu la; m-undu kpaa, ne unde sha uwo la ga), A kaa er:

⁶Ka Mo M lu TER, Aôndo wou, u M dugh a we ken tar u Igipiti ken ya u ikpan ye.

⁷De lu a mbaaôndo mbagenev ga saa Mo.

⁸De gbe eev ga, shin ma kwagh u a bee kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga;

⁹de gur ve inya ga, man shi de civir ve kpaa ga, gadia Mo, TER, Aôndo wou, M ngu Aôndo u gban iwuhe, M tsahan mbayev sha ci u iferkwagh i uter zan zan kov u sha utar man shi u sha unyiin kpaa, u mba ve kerem ihom;

¹⁰kpa mba M doo ve ishima man ve we atindi a Am iko yô, M eren a udubu vev imôngo dedoo.

¹¹De teren iti i TER, Aôndo wou, dang ga; gadia or u nan teren iti i TER dang dang yô, Una na nan ishô mayange ga.

¹²Waan iyange i memen iko sha er u tseghan i yô, er TER, Aôndo wou, A kaa u nahan.

¹³Ayange ataratar er tom man shi akaa ou cii,

¹⁴kpa iyange i ataankarahar la yô, ka iyange i memen i TER, Aôndo wou, de ker tom ave sha i ga, we, man shi wan wou u nomso man shi wan wou u kwase man shi or u shiren we tom, man shi kwase u eren we tom, man shi bua wou, man shi jaki you, man shi hanma zendenya wou, man shi shiror wou u nan va nyer u a nyôr, sha u or u shiren we tom man kwase u eren we tom ve̱ mem er we nahan.

¹⁵Yô, umbur, er ngise u lu kpan ken tar u Igipiti man er TER, Aôndo wou due a we ker sha uwegh ku ageegh man sha uwegh ku naregh; ka nahan man TER, Aôndo wou, A kaa u er u̱ waan iyange i memen iko ye.

¹⁶Civir teru man ngôu er TER, Aôndo wou, A kaa u nahan, sha er á seer we ayange man á kpe u iyol ken tar u TER, Aôndo wou, A lu nan we yô.

¹⁷De woo or ga.

¹⁸Man shi de eren idya ga.

¹⁹Man shi de iin ga.

²⁰Man shi de we or u wan ndor a we aie iyol ga.

²¹Man shi de tem kwase u or u wan ndor a we ga; man shi de tem ya u or u wan ndor a we ga, shin sule u nan, shin or u shiren nan tom, shin kwase u eren nan tom, shin bua u nan, shin jaki i nan, hanma kwagh u a lu u or u wan ndor a we kpaa, de tem ga.

²²Akaaôron ne TER ôr mkohol u ior enev cii genger genger sha uwo, ken atô u usu man u ibeenegh man u angôghime, A seer ma kwagh gen sha mi ga. Shi A nger a sha ikpande i awen ihiar, A nam i.

²³Tsô zum u ne ungwa imo la ken atô u ime, er uwo la lu yeghen usu yô, ne va her a mo, lu mbahemenev mba ikwe yen cii kua mbatamen enev,

²⁴ne kaa ner: Nenge, TER, Aôndo wase, tese se icivir Na man mhembe Na, man se ungwa imo Na ken atô u usu je, nyian se nenge er Aôndo A er kwagh a or, kpa nan lu uma her yô.

²⁵Hegen yô, inja na nan man sé gba kpen nahana? Gadia zegeusu ne una hia se, aluer shi sé seer ungwan imo i TER, Aôndo wase yô, sé kpe.

²⁶Gadia uumace cii, ka an je nan vande ungwan imo i Aôndo u uma lu ôron kwagh ken atô u usu, er se nahan, man shi nan lu uma heree?

²⁷Yô, we gba kporom tsô, ungwa akaa a TER, Aôndo wase, Una ôr cii, nahan we ú gema ú ôr se kwagh u TER, Aôndo wase, Una ôr u cii, se, sé ungwa, sé er sha mi.

²⁸TER ungwa imo i akaaôron a en shighe u ne ôr kwagh a mo la. Tsô TER kaa a mo er: M ungwa imo i akaaôron a ior mban a ve er u yô, kwagh u ve kaa cii ka sha mi.

²⁹Ma ve lu ase a imbashima i cian Mo waan atindi Am cii iko gbem la, sha er á kpe ve iyol a ônov vev cii gbem sha won yô.

³⁰Za za kaa ve wer: Hide nen ken utenti enev.

³¹Kpa we yô, tile a Mo heen, Mo Me ôr u atindi cii man akaawan kua akaaôron a jirigh a ú za tese ve sha u ve̱ eren sha a ken tar u M lu nan ve Mer ve̱ ngohol u la.

³²Nahan yô, ver nen ishima u eren sha mi er TER, Aôndo wen, A kaa ne yô; de kahan nen ken uwegh ku yanegh shin ken ku imesegh kpaa ga.

³³Zende nen sha igbenda i TER, Aôndo wen, A kaa ne la cii, sha er né lu uma, á kpe ne iyol, man á seer ne ayange ken tar u né za ngohol u la yô.