Read tiv Duteronomi 6 Bible Online

Duteronomi 6 - tiv bible

Duteronomi 6

¹Ka tindi man akaawan kua akaaôron a jirigh a TER, Aôndo wen, A kaa, er i̱ tese ne a, sha er né za eren sha a ken tar u né per, né za ngohol u la yô;

²sha er u̱ cia TER, Aôndo wou, u̱ waan akaawan a Na iko cii, a m we u a, we man wan wou man wan u wan wou sha ayange a uma wou cii, sha er á seer we ayange yô.

³Yô, ver ato Iserael, ver ishima u eren sha mi, sha er á kpe u iyol ú seer iyenge kpishi er TER, Aôndo u uter ou, tôndo zwa a we nahan ken tar u atumbabua kua iyough ve dumbur ker yô.

⁴Yô, ver ato Iserael: TER, Aôndo wase, ka TER, tswen, je!

⁵Nahan yô, TER Aôndo A̱ doo u ishima a ishima you cii man a uma wou cii man a agee ou cii.

⁶Akaaôron a m kaan we nyian ne, a̱ lu u ken ishima,

⁷tesen ônov ou a sha gbashima je, ôron kwagh u a, zum u wea tema hen ya wou man zum u wea zenden sha gbenda man zum u wea yav inya man zum u wea moughon sha.

⁸Man zer a sha uwe, a̱ lu u ikav, shi a̱ lu u kwagh u zeren sha icul senen hen kungwa.

⁹Man shi nger a sha ikpande i ken ambusu a ihinda i iyou you man sha ihindagar you kpaa.

¹⁰Tsô, zum u TER, Aôndo wou, Una nyôr a we ken tar u A bum a uter ou Aberaham man Isaka man Yakob er Una na u la yô, uzegembaagarev mba dedoo, mba i lu we u maa ga yô,

¹¹man uya mba akaa a iv ker, atô kposo kposo, mba i lu we u iv ve ga yô, azôr a ombon mngerem shimi a i tim sha vande, a i lu we u tim ga yô, ishule i ikon i wain kua ikon i olev i i lu we u môôr ga yô; shighe u ú ya ú ide,

¹²shighe la kura iyol you sha er u̱ de hungul TER u A dugh a we ken tar u Igipiti ken ya u ikpan la ga yô.

¹³Ka TER, Aôndo wou, cian Un ye, shi ka Un kpaa eren Un tom, ka iti Na kpaa bumun nen ye.

¹⁴De dondon nen mbaaôndo mbagenev ga, ma aôndo u akuraior a a kase ne la;

¹⁵gadia TER, Aôndo wou, u A lu u her atô la, ka Aôndo u gban iwuhe je; yô, ishima i̱ de vihin TER, Aôndo wou, a we, A̱ tim u sha tar kera ga.

¹⁶De kera meen nen TER, Aôndo wen, er lu ne mee Un hen Masa la nahan ga.

¹⁷Waan nen atindi a TER, Aôndo wen, man mbampase Nav kua akaawan a Na a A we u la iko, sha gbashima je.

¹⁸Eren kwagh u a lu u mimi man u perapera sha ishigh ki TER, sha er á kpe u iyol ú nyôr ú ngohol tar u dedoo u TER lu bum a uter ou la,

¹⁹er Una zenda mbaihomov ou cii sha ishigh you kera er TER lu kaa yô.

²⁰Zum u wan wou nana va pine u sha ayange a ken hemen la, er: Mbampase man akaawan ne man akaaôron a jirigh a TER, Aôndo wase, A ne ne, ne yô, inja ve ka nana?

²¹Yô, kaa wan wou wer: Ngise se lu ikpan i tor Farao ken Igipiti; TER due a vese ken Igipiti sha uwegh ku ageegh;

²²TER er uivande man akaakpilighyol a vesen man a vihin ken Igipiti, sha Farao kua sha ya na cii sha ashe ase je.

²³A due a vese ker sha u Una va a vese Una va na se tar u A bum a uter asev yô;

²⁴TER kaa se er, se̱ er sha akaawan ne cii, se̱ cian TER, Aôndo wase, sha er á kpe se iyol gbem, man sha er Una kura se se̱ lu uma her, er i lu nyian nahan.

²⁵Nahan á gema á hingir perapera wase aluer sé ver ishima sé eren sha tindi ne cii, sha ishigh ki TER, Aôndo wase, er A kaa se yô.