Read tiv Duteronomi 7 Bible Online

Duteronomi 7 - tiv bible

Duteronomi 7

¹Zum u TER, Aôndo wou, Una nyôr a we ken tar u u ze sha u za ngohol u la yô, man Una zenda akuraior kpishi sha ishigh you kera, ka Mbahiti man Mbagirgashi man Mbaamor man Mbakanaan man Mbaperishi man Mbahivi man Mbayebushi, akuraior ataankarahar a a hembe u iyenge man agee kpaa yô,

²man zum u TER, Aôndo wou, Una gema a, Una na sha ikev you man wea hemba a yô, tim a purututu; de ye ikur a a ga, de zungu a mhôônom kpaa ga.

³De eren kasev ken a ga; de tee wan wou u kwase ne or u ken a ga, man de eren wan u a, va ne wan wou ga.

⁴Gadia vea gema ônov ou vea de u dondon Mo, vea gema á civir mbaaôndo mbagenev; nahan ishima á vihi TER a ven, Una tim u fese je.

⁵Kwagh u né er a yô, yôhôl nen atse a a, a nanden nagh sha mi, hembe nen mtôm ma awenem ma a, gber nen Asherim u a, nande nen ieev mbi gban a gba mbi a sha usu.

⁶Gadia we u ngu TER, Aôndo wou, icighannongo je; TER, Aôndo wou, tsuwa u ken akuraior a a lu sha won cii, er u̱ lu nongo Na jim.

⁷Ka mngee, ne hembe ngeen a ma ikurior igen man TER A pende ishima sha a ven A tsough ne kpaa ga, gadia ne hemba gban ijime a akuraior cii;

⁸kpa ka sha ci u ne doo TER ishima man sha ci u A we ishima u kuren mbum u A bum a uter enev la, TER A dugh a ven sha uwegh ku ageegh A paa ne ken ya u ikpan sha ikev i Farao, tor u Igipiti ye.

⁹Yô, fa, TER, Aôndo wou, Un ka Aôndo; Aôndo u jighjigh, u A we iko sha ikuryan man erdoo a mba A doo ve ishima man ve we atindi Na iko, zan zan ikov dubu je yô,

¹⁰oron iyev sha mba ve ker Un ihom sha ishiv vev je, timin ve; Una de or u nan ker Un ihom ga, Una or iyev sha nan sha ishigh ki nan je.

¹¹Yô, waan iko sha tindi man akaawan man akaaôron a jirigh a M kaan we nyian mer, eren sha mi ne.

¹²Nahan er ne ver ato sha akaaôron a jirigh ne man ne we iko u eren sha a kpaa yô, TER, Aôndo wou kpaa, Una waan iko sha ikuryan man erdoo a we er A bum a uter ou la;

¹³ú doo Un ishima, Una ver u doo doo, Una seer we iyenge, man shi Una ver tse wou doo doo kua iyiagh ki hen tar wou, alakema wou man wain wou, man mkurem ou, mmar u abua a ou, man ônov mba iyôngov ou, ken tar u A bum a uter ou, er Una na u la.

¹⁴Ú lu a iveren i dedoo á hemba akuraior cii; á zua a or u lun ikôm shin ikômkwase ken a ven ga, shin ken uzendenya enev kpaa ga.

¹⁵TER Una kura angev hen we kera cii; man shi Una na ma angev mbu bov mbu Igipiti mbu u fe mbu la er mbu̱ kôr u ga, Una gema mbu Una haa mba ve ker u ihom la cii.

¹⁶Man ú tim akuraior cii a TER, Aôndo wou, Una gema a, Una na sha ikev you la; ishe you i̱ de zungu ve mhôônom ga, man de civir mbaaôndo vev ga, gadia á va hingir kwagh u hônon we min.

¹⁷Aluer u kaa ken ishima you wer: Akuraior ne hembam iyenge, me er nan me zenda ve ken tar ve kera?

¹⁸Yô, de cie ve ga; umbur kwagh u TER, Aôndo wou, lu er a Farao kua Igipiti cii la;

¹⁹ikaren i vesen i ashe a ou nenge a min la, man uivande, kua akaakpilighyol, man uwegh ku ageegh, man uwegh ku naregh, ka akaa a TER, Aôndo wou, er man A due a we la; kape TER, Aôndo wou, Una er a akuraior a u cie a cii la.

²⁰Man shi TER, Aôndo wou, Una tindi ahambe ken ve, nahan mba ve shi ker, ve yer la kpaa, vea tim kera.

²¹Ishima i̱ de te u kwe sha ci ve ga; gadia TER, Aôndo wou, ngu u hen atô, ka Aôndo u hemban man u cier iyol.

²²TER, Aôndo wou, Una zenda akuraior la sha ishigh you kera tegh tegh; á rumun we er ú hemba ve fese ga, sha er inyamtoho i̱ de va ngeen i̱ hemba u ga yô.

²³Kpa TER, Aôndo wou, Una gema ve Una na sha ikev you, Una nzughul a ve tsung zan zan vea tim.

²⁴Man Una na utor vev sha ikev you, ú er iti ve ia hungul sha won kera; ma or nana fatyô u tilen we sha ishi ga zan zan ú tim ve.

²⁵Ieev mbi mbaaôndo vev mbi gban a gba la yô, nande nen sha usu; de tem azurfa shin zenaria u a lu sha mi ga; de tee ga, sha er i̱ de hen u sha mi ga yô, gadia ka TER, Aôndo wou, kwagh u ihôngorough je;

²⁶man de ve a kwagh u ihôngorough ken ya wou ga, sha er ú hingir a ifan iyol er un nahan ga yô, kpa nyagh un tsembelee je, i̱ lu u kwagh u ndôhôrshima, gadia ka kwagh u i we un ifan yô.