Read tiv YOHANE 3 Bible Online

YOHANE 3 - tiv bible

YOHANE 3

¹Orgen lu ken Mbafarishi, iti na er Nikodemu, lu orvesen u Mbayuda.

²Un va her a Na tugh, va kaa a na er: Rabi, se fa U ngu ortesen, ka sha Aôndo U ve ye, gadia ma or nana fatyô u gban eren uivande mba U eren ne ga, saa Aôndo Una lu a nan.

³Yesu gema kaa a na er: Mimi mimi je, M kaan we ne, saa á mar or hegh, gayô, nana fatyô u nengen tartor u Aôndo ga.

⁴Nikodemu kaa a Na er: Á er nan man á mar or zum u nan vande been iyol kera? Nana fatyô u shi nyôron ngô u nan ken uya, á shi á mar nana?

⁵Yesu gema kaa er: Mimi mimi je, M kaan we ne, saa á mar or sha mnger kua Jijingi, gayô, nana fatyô u nyôron tartor u Aôndo ga.

⁶Kwagh u a dugh ken iyol yô, ka iyol je; man kwagh u a dugh ken Jijingi ka di jijingi je.

⁷I̱ de kpiligh we iyol er M kaa a we Mer: Ka u á mar ne hegh keng la ga.

⁸Ahumbe ka a karen sha ishima i a, u ungwa ihuran i a je, kpa u fa ape a dugh man henpe a ze kpaa ga. Kape hanma or u i mar nan ken Jijingi nan lu la.

⁹Nikodemu gema kaa a Na er: Ka sha hanma gbenda man akaa ne aa fatyô u erene?

¹⁰Yesu gema kaa a Na er: We, u ngu ortesen u Iserael, man er nan u kav akaa ne ga?

¹¹Mimi mimi je, M kaan we ne, se mba er kwagh u se fe, man shi se mba pasen kwagh u se nenge yô, kpa ne mba rumun mpase wase la ga.

¹²Aluer Me ôr ne akaa a taregh man ne na jighjigh ga yô, á er nan man Me ôr ne akaa a Sha, ve né na jighjighi?

¹³Man shi mayange or ngu a kôndo nan yem Sha ga, saa di Un u A hongo Sha la tsô, ka Wan u or u A dugh Sha je la.

¹⁴Man er Mose kende iyô sha ken taaikôngo nahan, kape Wan u or kpaa á kende Un sha keng la,

¹⁵sha er anti or u nan ne Un jighjigh yô, nana̱ zua a uma u tsôron.

¹⁶Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.

¹⁷Gadia Aôndo tindi Wan Na shin tar ne sha u A̱ va ôr tar ijir ga, kpa ka sha u tar u̱ war sha a Na.

¹⁸U nan ne Un jighjigh yô, á ôr nan ijir ga, kpa u nan ne jighjigh ga yô, i na nan ibo kera je ve, sha ci u nan ne iti i Wan u môm môm u Aôndo la jighjigh ga yô.

¹⁹Man ngin ka ijirôron ne: iwanger va nyôr shin tar man ime gema hemba doon ior a iwanger, gadia aeren a ve lu a bo je.

²⁰Gadia hanma or u nan eren kwaghbo yô, ka iwanger je nan vende ye, man shi nan ve hen iwanger kpaa ga, sha u i̱ de vende aeren a nan ga yô.

²¹Kpa u nan eren mimi yô, nan ve hen iwanger sha er á pase aeren a nan er i lu ken Aôndo je man i er a ye.

²²Ken masejime u akaa ne yô, Yesu va ken tar u Yudia kua mbahenen Nav, tsa a ve ker, lu eren batisema.

²³Yohane kpaa lu eren batisema ken Enon ikua ikua a Salem, sha ci u mngerem lu ker kpishi yô; ior lu van heregh, i eren ve batisema;

²⁴gadia i lu a wa Yohane ken gaadi ga.

²⁵Tsô akpelan gba mbahenen mba Yohane mbagenev a Oryuda ugen sha kwagh u mwangeryol.

²⁶Tsô ve va hen Yohane, ve va kaa a na er: Rabi, Un u A lu a we imôngo yande Yordan la, u we u pase kwagh Na la, nenge ngu eren batisema, man ior cii mba zan her a Na.

²⁷Yohane gema kaa er: Or á fatyô u ngohol ma kwagh ga, saa á na nan Sha.

²⁸Ne ayol a en kpaa ne mba eren mo shiada er m vande kaan mer: Mo m ngu Kristu ga, kpa i tindim a tindi sha hemen Na.

²⁹Or u nan lu a kwasehe yô, ka orkwasehe je la; kpa ikar u orkwasehe u a til a ongo imo na yô, ka a ember kpishi sha ci u imo i orkwasehe; nahan iember yam ne kpaa i iv ve;

³⁰Un yô, ka u Una seer a seer keng, kpa mo yô, ka u me pande di a pande keng je.

³¹U nan sen Sha yô, nan hemba cii, u nan dugh shin tar ne yô, ka di u shin tar ne je, shi ka nan ôron kwagh u shin tar kpaa. U A dugh Sha, A hemba cii.

³²Kwagh u A nenge man A ongo la, ka un je A pasen ye; kpa mpase Na la ma or rumun un ga.

³³U nan rumun mpase Na la yô, nan seer u tesen er Aôndo A lu u mimi yô.

³⁴Gadia Un u Aôndo A tindi Un la, ngu ôron akaaôron a Aôndo gadia Aôndo na Un Jijingi wuee je, kar a kar ga.

³⁵Wan doo Ter ishima, nahan A na akaa cii sha ikev Na.

³⁶U nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.