Read tiv YOHANE 4 Bible Online

YOHANE 4 - tiv bible

YOHANE 4

¹Nahan yô, zum u Yesu fa er Mbafarishi ungwa er ior mba Yesu lu geman ve ve lu hingir mbahenen shi lu eren ve batisema ve hemba ngeen a mba Yohane a lu eren ve la yô,

²(kpa Yesu iyol Na yô, eren batisema ga, saa mbahenen Nav,)

³A undu Yudia, a shi A yem sha Galilia.

⁴Yô, gba u Una kar sha Samaria keng.

⁵Tsô A va hen gar u Samaria ugen, u i yilan un er Shikar, lu ikua ikua a veghertar u Yakob lu na wan na Yosev yô;

⁶ijôr i Yakob kpaa lu her je. Tsô er iyol kpe Yesu a zende yô, A gba teman hen kpejôr tsô; lu er iyange sha tembe nahan.

⁷Kwase u ken Samaria va u va kesen mngerem. Yesu kaa a na er: Shi nam mngerem, M̱ ma yôô.

⁸Gadia mbahenen Nav yem sha gar sha u za yamen kwaghyan.

⁹Kwase u Samaria la gema kaa a Na er: Hii nan man We u U lu Oryuda U senem mngerem ma man, mo u m lu kwase u Samaria nee? (Gadia Mbayuda zuan kwagh a Mbasamaria je ga.)

¹⁰Yesu gema kaa a na er: Wea fe iwua i Aôndo, man shi Un u A kaan a we er: nam mngerem, M̱ ma, ne yô, ma u sen Un, ma A ne u mngerem ma umam.

¹¹Kwase la kaa a Na er: Tere, U ngu a kwagh u kesen ga, man ijôr ne za kpee, man ka han U zough a mngerem ma umama?

¹²Shin U hemba ter wase Yakob iciviri, un u a na se ijôr ne, a ma i iyol na man ônov nav kua ilev nav kpaa?

¹³Yesu gema kaa a na er: Anti or u nan me mngerem man yô, imura ia shi á kôr nan.

¹⁴Kpa hanma or u nana ma mngerem ma Mo Me na nan yô, imura ia kera kôr nan mayange ga; kpa mngerem ma Me na nan mara, maa hingir imbormnger ken a nan, maa saar zan zan uma u tsôron.

¹⁵Kwase la kaa a Na er: Tere, nam mngerem mara, sha er imura ia kera kôrom ga yô, man shi m̱ de kera ve heen u va kesen ga.

¹⁶A kaa a na er: Za yila nomu, man ú hide heen ye.

¹⁷Kwase la gema kaa a Na er: M ngu a nom ga. Yesu kaa a na er: U kaa vough, er u kaa wer, u ngu a nom ga yô.

¹⁸Gadia u er noov utaan, man un u u lu a mi hegen ne kpaa, ka nomu ga, kwagh ne ka mimi je u er ye.

¹⁹Kwase la kaa a Na er: Tere, m kav er U lu profeti ve.

²⁰Uter asev lu civir Aôndo sha uwo ne, kpa ne yô, ne mba kaan ner, ka ken Yerusalem man i lu ijiir i civir Aôndo her keng ye.

²¹Yesu kaa a na er: Kwase, nam jighjigh, shighe ngu van u né kera civir Ter sha uwo ne ga, shin ken Yerusalem kpaa ga.

²²Ne mba civir kwagh u ne fe un ga yô, se yô; se mba civir kwagh u se fe un yô; gadia myom ka hen Mbayuda a dugh ye.

²³Kpa shighe ngu van, a kuma je ve, u mba ve civir sha mimi yô, vea civir Ter ken jijingi kua ken mimi, gadia ka mba ve civir Un nahan ne je Ter A keren ye.

²⁴Aôndo ka jijingi je; mba ve civir Un yô, ka u ve̱ civir ken jijingi kua ken mimi kpaa keng.

²⁵Kwase la kaa a Na er: M fa Mesiya ngu van u i yer Un er Kristu la, zum u Un Una va va yô, Una pase se akaa cii.

²⁶Yesu kaa a na er: Mo u M er kwagh a we ne, ka Mo Un je ne.

²⁷Ka hen shighe la mbahenen Nav hide ye, lu kpiligh ve iyol er A lu ôron kwagh a kwase yô, kpa ma or pine er: Ka nyi U keren, shin: Ka nyi U er kwagh a na, kpaa ga.

²⁸Tsô maa kwase la undu ityegh ki mngeregh gba yemen sha gar, a za kaa a ior er:

²⁹Va, va nenge nen Or u A kaam akaa a m er cii, shin ka Kristu je neou?

³⁰Ve due sha gar, ve gba van her a Na.

³¹Hen shighe la mbahenen Nav gba zamber a Na er: Rabi, ma U shi ye kwagh.

³²Kpa A kaa a ve er: Mo M ngu a kwaghyan u ne fe un ga yô.

³³Nahan mbahenen kaa ayol a ve er: Shin or va Un a ma kwaghyanou?

³⁴Yesu kaa a ve er: Kwaghyan Wam yô, ka u Me er ishima i u A tindim la, Me kure tom Na vough kpaa.

³⁵Ne yô, ne mba kaan ner: Shi iwer inyiin man sunda ua kuma ye gaa? Nenge, M kaan ne ne, kende nen ashe sha, nenge nen, iyiav mbi ken ishule, mbi via kuma u sundan ve.

³⁶Orsundan ka nan zua a injar man nan kohol iyiav sha ci u uma u tsôron, sha er orlôôn man orsundan vea ember imôngo yô.

³⁷Gadia mkaanem man ka mimi je er: Or u lôôn nan ngu kposo or u sundan nan ngu di kposo.

³⁸Mo M tindi ne sha u né sunda kwagh u ne er tom sha mi ga yô; mbagenev er tom, ne ne ya a ya.

³⁹Ken gar la Mbasamaria kpishi na Un jighjigh sha ci u kwaghôron u kwase u a pase er: A kaam akaa a m er la cii, yô.

⁴⁰Nahan zum u Mbasamaria va nôôr her a Na yô, ve zamber a Na er A̱ tema a ve; nahan A tsa heregh ayange ahar.

⁴¹Nahan mbagenev kpishi shi na Un jighjigh sha ci u kwaghôron Na.

⁴²Ve gba kaan a kwase la er: Se mba nan jighjigh, kpa kera ka sha ci u mkaanem ou ga, gadia se ayol ase se ungwa, man se fa er Ngun A lu Oryiman u tar mimi je yô.

⁴³Tsô ayange a ahar la nga kar yô, A yem sha Galilia.

⁴⁴Gadia Yesu iyol Na iyange pase er: Profeti lu a icivir ken tar na jim ga.

⁴⁵Tsô nyer ken Galilia yô, ior mba ken Galilia rumun Un, sha ci u ve nenge akaa a A er ken Yerusalem sha iniongo la cii yô, gadia ve kpaa ve za iniongo la.

⁴⁶Nahan Yesu shi va ken Kana u Galilia her ape iyange gema mngerem hingir wain la. Shagbaor ugen lu ken Kapernahum, wan na gema lu uange.

⁴⁷Tsô ongo er Yesu due shin Yudia, va sha Galilia yô, a za her a Na, a gba zamber a Na er A̱ va, A̱ va war wan na, gadia lu nôngon ku.

⁴⁸Tsô Yesu kaa a na er: Ka nea nenge uivande man akaa a kpilighyol ga yô, mayange ne na jighjigh ga.

⁴⁹Shagbaor la kaa a Na er: Tere, ma U shi ve er wan wam a lu a kpe ga ne.

⁵⁰Yesu kaa a na er: Gba yemen tsô, wan wou ngu uma. Or la na kwagh u Yesu kaa un la jighjigh, maa a yem.

⁵¹Ngur yemen yô, mbatomov nav va kohol un, kaa un er: Wan wou ngu uma.

⁵²Tsô a pine ve shighe u i hii wanger un iyol yô. Ve kaa er: Ka nyen ihwa i môm man iyolhian la bee un ye.

⁵³Tsô ter na fa er ka shighe u Yesu kaa a na er: Wan wou ngu uma je la. Nahan wen iyol na na jighjigh kua ya na cii.

⁵⁴Ngin ka ivande i sha uhar i Yesu er, er A due shin Yudia a va sha Galilia yô.