Read tiv Aerenakaa A Mbaapostoli 12 Bible Online

Aerenakaa A Mbaapostoli 12 - tiv bible

Aerenakaa A Mbaapostoli 12

¹Tsô sha ayange la tor Herode za ave sha u una er mbagenev ken nongo u Kristu ican.

²A wua Yakobu, anngô u Yohane, sha sanker.

³Nengen ka doon Mbayuda yô, a za hemen a kôr Peteru kpaa, lu sha ayange a ubredi mba i we kwa sha mi ga la.

⁴Ker un yô, a wa un ken gaadi, a wa un sha ikev i mbautyav unyiin unyiin kwa nyiin, er ve̱ kura un dedoo, lu wan ken ishima er una due a na hen ior shighe u Paseka una kar kera yô.

⁵Tsô i gba kuran Peteru ken gaadi; kpa nongo u Kristu lu sônon Aôndo tsung sha ci na.

⁶Er Herode lu kohol iyol sha u duen a na yô, hen tugh mbula Peteru lu yaven her atô u mbautyav uhar, i kange un sha mshirim m har; mbakuran kpaa lu sha hunda u gaadi, lu kuran.

⁷Tsô ortyom u Ter va tile hen a na, iwanger kpaa wanger ken gaadi, a kpoghol Peteru hen ihan, a nder un a kaa er: Mough sha fefa. Mshirim poso un sha ave, haa inya.

⁸Ortyom la kaa a na er: Haa akondo a ou iyol, wa akôv ou kpaa. A er di nahan je. A kaa a na er: Cir ikondo iyol, dondo sha a mo;

⁹tsô a due a dondo sha a na; kpa a fa er kwagh u ortyom a er la i lu kwagh u mimi kpee ga, lu un er ka di mpase u ken mnya un nengen tsô yô.

¹⁰Tsô mba kar hen nongo u mbakuran u hiihii man shi u sha uhar la, mba za ar sha hunda u iyôgh u masetyô u duen ken won la yô, u gba bughun ve iyol i u tsô; maa ve due, mba been gbenda u ken gar môm yô, fese nahan ortyom maa undu un.

¹¹Tsô ka tende Peteru ashe yô, a kaa er: Hegen yô, m fa ka mimi je, Ter tindi ortyom Na, va warem sha ikev i Herode man awashima u nongoior u Mbayuda cii.

¹²Kaven nahan a va hen ya u Maria, ngô u Yohane, u i yilan un er Marku la; ior kohol heregh kpishi, lu eren msen.

¹³Er a va mande uwegh sha hunda u puadwer yô, wankwase u eren tom iti na er Rode va sha u ungwan.

¹⁴Kpa va kaven imo i Peteru yô, kera bugh hunda ga sha ci u iember, a hide fese, a za kaa er: Peteru ngu sha hunda.

¹⁵Ve kaa a na er: U ngu hunden. Kpa a zer kaan heregh gbang gbang er, kape i lu je la. Ve kaa er: Nahan yô, ka ortyom na.

¹⁶Kpa Peteru zer manden heregh gbem. Tsô mba bughun yô, ve nenge a na, kondo ve iyol.

¹⁷Kpa a kure ve uwegh er ve̱ huan, tsô a gba pasen ve er Ter A dugh a na ken gaadi yô, a kaa er: Za ôr nen Yakobu kua anmgbianev akaa ne. Tsô a mough a yem ijiir igen.

¹⁸Nahan sev mbu av yô, zegeanzughul gba hen mbautyav mbala, ve kaa er: Ka nyi i er ve Peteru a lu heen ga?

¹⁹Er Herode ker un, kpa zua a na ga yô, a gema a ôr mbakuran mbala ijir, maa a kaa er i̱ za wua ve je. Tsô a mough hen Yudia, a yem Sesaria, za lu heregh.

²⁰Ishima lu vihin un tsung a ior mba ken Tiru man Shidon, nahan ve va her a na a ishima i môm. Er ve za kôr hur a Belasetu, or u yaren tom ken ya u tor yô, ve ker bem, gadia tar ve zuan a kwaghyan hen tar u tor la.

²¹Tsô sha iyange i i ver la, Herode haa akondo a tor za tema sha ikônough ki orjir, ôr kwagh a ve.

²²Nahan ior gbidye awer, kaa er: Ka imo i Aôndo je, ka i or ga!

²³Fese nahan ortyom u Ter tsaha un sha ci u a ne Aôndo icivir ga yô. Azôô ya un maa a kpe.

²⁴Kpa kwaghôron u Ter yô, lu seer a seer man shi lu ngeen kpaa.

²⁵Barnaba man Saulu za hire ken Yerusalem zum u ve kure tom ve yô, ve kua a Yohane u i yilan er Marku la.