Read tiv Aerenakaa A Mbaapostoli 13 Bible Online

Aerenakaa A Mbaapostoli 13 - tiv bible

Aerenakaa A Mbaapostoli 13

¹Uprofeti man mbatesen lu ken nongo u Kristu u u lu ken Antioki la, lu: Barnaba man Shimeon u i yilan er Niger la, man Lushiu or u Shirene, man Manaen u a lu orkwav u Herode u Tetera la, man Saulu.

²Tsô er ve lu civir Ter, man hôron kwaghyan yô, Icighan Jijingi kaa er: Tsegham nen Barnaba vea Saulu sha ci u tom u M yer ve mi yô.

³Tsô er ve hôr kwaghyan man ve er msen kpaa yô, ve penda ve ave, maa ve na ve gbenda.

⁴Ve yô, er i tindi ve sha imo i Icighan Jijingi nahan, ve yem shin Selushia, ve za nyôr tso keregh, ve yem ken Shiperu.

⁵Mba va nyer ken Salamis yô, ve ôr kwaghôron u Aôndo ken ushinagoge mba Mbayuda; Yohane kpaa lu a ve ityô, lu eren ve tom.

⁶Mba zenden ken icile la cii zan zan mba ar Pafo yô, ve kohol orahir ugenegh, lu eren er un ngu profeti nahan, lu Oryuda, iti na er Baryesu.

⁷Lu a gomna Sergiu Paulu u a lu or u fan kwagh la imôngo. Un yô, a yila Barnaba vea Saulu, lu un ka ungwan kwaghôron u Aôndo.

⁸Kpa Elima, orahir la—gadia ka inja i iti na je la—hendan a ve; lu nôngon u ma un gem gomna sha u a̱ de ne jighjigh ga yô.

⁹Kpa Saulu, ka Paulu je la, er a iv a Icighan Jijingi yô, a bon ashe sha a na

¹⁰a kaa er: We, wan u diabolo u u iv a icugh man hanma kwaghnzughul, u lu orihom u kwagh u perapera cii ne, u shi de u goom igbenda i jighilaa i Ter je gaa?

¹¹Hegen yô, nenge, uwegh ku Ter ku sha a we, ú pir ashe, ú kera nenge a iyange ga zan zan shighe á kar. Fese nahan, irkpiigh man ime shile sha a na, a gba zenden, keren mba vea kôr un aga yô.

¹²Tsô er gomna nenge kwagh u i er la yô, maa a na jighjigh kpiligh un iyol a ityesen i Ter.

¹³Paulu man shi mba ve lu a na imôngo la, ve nyôr tso hen Pafo, ve va hen Perga u ken Pamfilia. Yohane maa undu ve heregh, hide ken Yerusalem.

¹⁴Kpa ve yô, ve mough hen Perga ve kar ve za ken Antioki u ken Pishidia. Ve za nyôr ken shinagoge sha iyange i memen, ve tema inya.

¹⁵Mba er atindiakaa kua akaa a uprofeti kera yô, mbavesen mba shinagoge la tindi hen ve, kaa er: Ne anmgbianev, nea lu a ma kwaghôron u taver ior ishima yô, ôr nen.

¹⁶Tsô Paulu kighir mough sha, kende uwegh sha, kaa er: Ne ior mba Iserael man shi ne mbacian Aôndo, ver nen ato.

¹⁷Aôndo u nongoior u Iserael ne, lu tsuwa uter asev, A kende nongoior ne sha zum u ve lu shir ken tar u Igipiti la, a due a ve ken u kera sha uwegh ku ageegh.

¹⁸A lu wan ishima a aeren a ve ken taaikôngo kuma er anyom akunduahar nahan.

¹⁹Er A tim akuraior ataankarahar ken tar u Kanaan kera yô, A gema tar la A na ve sha u u̱ hingir dyako ve yô, ve tema ker kuma anyom deri unyiin man akunduahargber nahan.

²⁰Ken masejime la yô, A na ve mbaajiriv zan zan ar hen profeti Samuel je.

²¹Ken masejime yô, ve ker tor; nahan Aôndo na ve Saulu, wan u Kishi, or u ken kwe u Benyamin, a tsa tor anyom akunduahar.

²²Va dughun un kera yô, A kende Davidi sha er a̱ tema tor ve, A pase kwagh na er: M zua aa Davidi, wan u Yese, or u sha ishima Yam vough, u una er ishima Yam cii yô.

²³Ka ken tsombor u or la je man Aôndo va Mbaiserael a Oryiman Yesu, sha ityendezwa Na ye;

²⁴er lu a va ga je tsô, Yohane vande pasen nongoior u Iserael cii kwagh u batisema u mgemshima.

²⁵Man zum u Yohane lu nôngon u kuren tom na la kpaa, a kaa er: Ne mba henen ner, mo m ngu ana? Ka mo Un ne ga, kpa nenge, Ugen ngu van mo ken ijime u m kom u me sagh Un akôvangahar ga yô.

²⁶Ne anmgbianev, ne ônov mba ken tsombor u Aberaham man ne mba ne cie Aôndo cii, ka her a vese je i tindi a loho u myom ne ye.

²⁷Gadia mba ve tem ken Yerusalem man shi mbavesen vev, er ve fe Un ga, man shi ve kav akaaôron a uprofeti a i ôron a sha hanma iyange i memen la ga yô, ve gema ve kure akaaôron la sha mi vough ve ôr Un ijir i kuugh;

²⁸shin er ve zua a ityôikaa i i kom ku her a Na ga nahan kpaa, ve zamber a Pilatu er, i̱ wua Un.

²⁹Man er ve kure akaa a i nger sha a Na la sha mi cii yô, ve hungwa a Na sha kon la, ve wa ken uwar.

³⁰Kpa Aôndo nder Un shin mbakpenev.

³¹Ayange imôngo je lu anden hen ior mba ve due a Na imôngo ken Galilia, ve va ken Yerusalem la, ka ve je man hegen ve lu mbapasen kwagh Na hen ior ye.

³²Se yô, se mba ôron ne Loho u Dedoo u ityendezwa i i tôndo a uter la;

³³Aôndo kure i hen ônov asev zum u A nder Yesu, er i nger ken Pasalmi u sha uhar la kpaa nahan er: We, U ngu Wan Wam je; Mo M mar u nyian.

³⁴Man sha kwagh u mnder u A nder Un shin mbakpenev sha er mayange Una kera hide ken mhee ga la yô, A kaa nahan er: Me na ne iveren i Davidi i ia bunde mayange ga la.

³⁵Gadia ken Pasalmi ugen A shi A kaa er: Ú de Icighan Wou la Wer, A̱ nenge a mhee ga.

³⁶Gadia Davidi kpaa er a wase kov na tom sha awashima u Aôndo yô, a kpe, i ver un a uter nav imôngo, a nenge a mhee kpaa.

³⁷Kpa Un u Aôndo nder Un la yô, a nenge a mhee ga.

³⁸Nahan yô, anmgbianev, fa nen, ka ken a Na je man i lu yôôn ne mde u asorabo ye,

³⁹man shi ka her a na kpaa man hanma or u nan ne jighjigh yô, á na nan ishô sha akaa cii a ne fetyô u zuan a ishô sha mi ken atindiakaa a Mose la ga ye.

⁴⁰Yô, ver nen ishima sha er kwagh u uprofeti ve kaa la a̱ de tseren ne ga yô; ve kaa er:

⁴¹Nenge nen, ne mba ne lahan ne, i̱ kpiligh ne iyol, tim nen, gadia M ngu eren tom ugen ken ayange a en; ka tom u mayange né rumun u jighjigh ga yô, shin aluer orgen nana pase ne u je kpaa.

⁴²Mba ngur duen yô, ve zamber a ve er: i̱ shi i̱ ôr ve akaa ne sha iyange i memen i i lu van la kpaa.

⁴³Er mkohol u ken shinagoge hembe yô, Mbayuda mbagenev kpishi man shi mba ve gem ve hingir a hingir Mbayuda mba ve cie Aôndo, ve dondo Paulu man Barnaba; ve kpaa, ve ôr kwagh a mbala, ve taver ve ishima er ve̱ var sha mrumun u sha mhôôn u Aôndo.

⁴⁴Tsô sha iyange i memen i dondon la, shi kpuaa tsô ior mba ken gar la cii ma ve kohol sha u ungwan kwaghôron u Aôndo.

⁴⁵Kpa er Mbayuda nenge a ikpelaior kpishi nahan yô, iwuhe iv ve ken asema, ve gba nyiman kwaghôron u Paulu la, tuhwan.

⁴⁶Kpa Paulu man Barnaba gba ôron kwagh vangertiôr. Ve kaa er: Ka ne i gbe u á vande ôron ne kwaghôron u Aôndo kpee je ye. Kpa er ne mgbegh un her a ven kera nahan, man shi ne nenge er ne kuma uma u tsôron ga yô, nenge, se gema ishigh her atôatyev ve.

⁴⁷Gadia kape Ter A kaa se je ne, er: M ver U Mer, lu iwanger i atôatyev, sha u U za a myom zan zan á ar ken ikighir i tar je yô.

⁴⁸Er atôatyev ungwa nahan yô, a ember, a civir kwaghôron u Aôndo. Tsô mba i ver ve sha u ve̱ zua a uma u tsôron yô, ve na jighjigh.

⁴⁹Nahan kwaghôron u Ter samber ken tar la cii.

⁵⁰Kpa Mbayuda vihi ashagbaukase a civir Aôndo man shi mbavesen mba ken gar la, ve gba tôvon Paulu man barnaba a ican, ve zenda ve ken tar ve kera.

⁵¹Tsô ve kure ihundu i angahar a ve, ve va ken Ikonium.

⁵²Mbahenen mbala yô, ve iv a iember man Icighan Jijingi.