Read tiv Aerenakaa A Mbaapostoli 14 Bible Online

Aerenakaa A Mbaapostoli 14 - tiv bible

Aerenakaa A Mbaapostoli 14

¹Ken Ikonium kpaa ve nyôr ken shinagoge u Mbayuda ve ôr kwagh zan zan ikpelaior kpishi ken Mbayuda man Mbagrika na jighjigh.

²Kpa Mbayuda mba ve hemba ato yô, ve kende atôatyev asema sha, ve vihi ve a anmgbianev mbala.

³Ve tsa her ica i gba je, ve lu ôron kwagh vangertiôr ken Ter; Un kpaa lu eren shiada sha kwaghôron u i lu ôron kwagh u mrumun u sha mhôôn Na la, A na i er uivande man akaa a kpilighyol sha ikev ve.

⁴Kpa ikpelaior i ken gar la pav iniongo ihiar, mbagenev ta ken Mbayuda, mbagenev di gema ta ken mbaapostoli.

⁵Kpa zum u atôatyev man Mbayuda kua mbavesen vev kpaa lu nôngon u eren ve ican man u tan ve awen yô,

⁶ve ungwa kwagh la nahan ve yevese, ve yem ken agar a ken Likaonia, ka Lisetera man Derebe je la kua tar u u kase her la,

⁷ve za ôr Loho u Dedoo her.

⁸Ken Lisetera yô, orgen tema her, kpe angahar, a sombo ken uya je, mayange zende ga.

⁹Or la ungwa er Paulu lu ôron kwagh; Paulu kpaa er a kenger un man a nenge er a lu a jighjigh u nan u á war un yô,

¹⁰a kaa genger genger er: Mough, tile sha angahar a ou jighjigh! Ngula tsuwe mough sha gba zenden.

¹¹Er ikpelaior nenge kwagh u Paulu er la yô, ve gba genger imo kaan ken zwa u Likaonia er: Mbaaôndo sen va her a vese sha inja i iyolough er ior nahan.

¹²Ve yila Barnaba er Seuse man Paulu di er Hereme, gadia ka un lu or u hemen a imo sha kwaghôron ye.

¹³Tsô pristi u Seuse u tempel na lu sha hunda u gar la, kôr anomabua man akaver a i er a sha uikparen mba ahuuv, a va a mi hen ihindagar, lu un ka ma un ne nagh ku sôngon, wen a ikpelaior imôngo.

¹⁴Kpa zum u mbaapostoli mbala, ka Barnaba man Paulu, ve ungwa kwagh ne yô, ve ande akondo a ve, ve nure, ve nyôr ken ikpelaior, ve gba genger imo,

¹⁵kaan er: Ne ior mban, ka nyi ne eren nahana? Se kpaa se mba di ior tsô, inja i iyolough er ne nahan man se va ôr ne Loho u Dedoo sha u undu nen akaa a gbilinigh ne, gema nen ishima hen Aôndo u uma, Un u A er Sha man tar man zegemnger kua akaa a a lu ken ve cii;

¹⁶Wen u sha ayange a a kar la, A de akuraior cii a zenden sha igbenda i a la.

¹⁷Nahan kpaa mayange A de u pasen iyol Na ga, eren akaa a dedoo, A nôôn ne ura u senen sha, A ivin asema a en a kwaghyan man msaanyol kpaa.

¹⁸Sha akaaôron ne nahan cii kpaa, lu sha ican je, ve yange ikpelaior er i̱ de ne ve nagh ku sôngon ga ye.

¹⁹Kpa Mbayuda mbagenev due ken Antioki man Ikonium, mba va gem ikpelaior asema yô, ve ta Paulu awen, ve kpela un, ve za kende ken akôngo a gar, lu ve er a kpe.

²⁰Kpa er mbahenen va kase un yô, a mough, a shi a nyôr ken gar. Kper nan gen A due vea Barnaba, ve yem ken Derebe.

²¹Er ve ôr Loho u Dedoo ken gar la man ve zua a mbahenen kpishi yô, ve hide hen Lisetera man Ikonium kua Antioki.

²²Ve lu taver mbahenen asema, nyôôso ve asema er ve̱ var ken jighjigh u nan, man shi er: Ka sha atsan kpishi keng je man sé nyôr ken tartor u Aôndo ye.

²³Zum u ve tsuwa mbatamen ve ver ve ken hanma nongo u Kristu yô, ve er msen a kwaghyan u hôron man ve wa ve sha ikev i Ter u ve na Un jighjigh la.

²⁴Ve kar ken Pishidia, ve va ken Pamfilia.

²⁵Mba er kwaghôron u Aôndo ken Perga yô, ve sen shin Atalia.

²⁶Keregh la ve nyôr tso, ve yem Antioki ape i vande nan ve sha ikev i mrumun u sha mhôôn u Aôndo sha ci u tom u ve er ve kure u la yô.

²⁷Mba va nyer yô, ve kohol nongo u Kristu ijiir i môm, ve ôr ve akaa a Aôndo A er ve cii, man er A bugh hunda u jighjigh u nan sha ci u atôatyev kpaa yô.

²⁸Ve tsa a mbahenen heregh ayange kpishi je.