Read tiv Aerenakaa A Mbaapostoli 16 Bible Online

Aerenakaa A Mbaapostoli 16 - tiv bible

Aerenakaa A Mbaapostoli 16

¹Tsô a va hen Derebe man Lisetera kpaa. Orhenen ugen lu ker, iti na er Timoteu, ngô na lu kwase u nan jighjigh lu kwase u ken Mbayuda, kpa ter na gema lu Orgrika;

²anmgbianev mba ve lu ken Lisetera man Ikonium lu wuese un.

³Lu Paulu pe a̱ za vea na sha zende na la, nahan a tôô un a tsôngo sha ci u Mbayuda mba ve lu ken ajiir la yô; gadia ve cii ve fa er ter na a lu Orgrika yô.

⁴Mba ngur yemen karen sha agar agar yô, ve lu nan atindi a mbaapostoli man mbatamen mba ken Yerusalem ve wa a sha u i̱ eren sha mi la.

⁵Nahan iniongo i Kristu taver ken jighjigh u nan, man iyenge ve lu seer a seer ayange ayange.

⁶Yô, ve kar ken tar u Ferigia man Galatia, gadia Icighan Jijingi yange ve u ôron kwagh u Aôndo ken Ashia.

⁷Mba va mgbôghom a Mishia yô, ve gba nôngon u ma ve yem ken Bitinia, kpa Jijingi u Yesu rumun a ve ga.

⁸Nahan ve tera ken Mishia man ve va ken Teroa ye.

⁹Tugh mbu il yô, Paulu nenge a kwagh ken mpase u sha mnenge, or u Masedonia tile, lu zamber a na, kaan er Shi per yande Masedonia keen, va wase se.

¹⁰Tsô nengen mpase u sha mnenge la nahan yô, fese je se gba nôngon u peren zan Masedonia, gadia se fa mimi je, ka Aôndo A yer se sha u se̱ za ôr ve Loho u Dedoo ye.

¹¹Tsô se nyôr tso ken Teroa, se ver ishigh jighilii u zan Samoterase; kper nan ugen yô, se ar ken Neapoli.

¹²Tsô se due keela se yem ken Filipi u a lu gar u vesen ken ipaven u Masedonia la, ka tiôntar u Mbaromanu kpaa. Ken gar shon la se tsa ker ayange kpeghee.

¹³Tsô sha iyange i memen yô, se due ken won gar, se za ken kpeifi henpe se lu henen ser ijiir i eren msen ngi yô; se za tema, se ôr kwagh a kasev mba ve kohol her yô.

¹⁴Kwase ugen lu, iti na er Lidia u ken gar u Tiatire, lu kwase u teen suun, lu civir Aôndo kpaa; a ungwa se, man Ter kpaa bugh un ishima sha u una ver ishima sha akaa a Paulu lu ôron la.

¹⁵Tsô mba eren un batisema kua ior i hen ya na cii yô, a zamber a vese er: Aluer nea fa ner m na Ter jighjigh yô, va nyôr tsa nen her a mo. Nahan a kighir se.

¹⁶Er se lu zan hen ijiir i msen la yô, wankwase ugen va kohol se, lu a jijingi u tsengan fan akaa, lu nan uter nav mtsera kpishi sha ishor na la.

¹⁷Tsô er un a lu van ken ijime i Paulu a vese imôngo yô, a yila sha imo i taver, a kaa er: Ior mban ka mbatomov mba Aôndo Uhembansha je, man mba pasen ne gbenda u myom.

¹⁸Eren nahan ayange imôngo je. Kpa er i nyôr Paulu iyol yum yô, a gema, a kaa a jijingi la er: M ngu kaan we ken iti i Yesu Kristu, due ker a na kera.

¹⁹Kpa er uter nav kav er ityôikaa i injar ve i dugh kera yô, ve kôr Paulu man Shila ve kpela ve, ve za a mi sha tembekasua sha ishigh ki mbavesen.

²⁰Mba ve a ve hen mbaajiriv yô, ve kaa er: Ior mban ka Mbayuda je, man mba nan anzughul ken gar wase ne je doo ga;

²¹mba tesen aeren a a doo her a vese u sé ngohol man u sé wa a iko kpaa ga yô; gadia se a yasegh se mba Mbaromanu je.

²²Tsô ikpelaior mough ta sha a ve icin i môm; mbaajiriv tuse ve akondo, shi ve kaa er, i̱ gbidye ve akpa.

²³Mba gbidi ve kpishi yô, ve za wa ve ken gaadi, ve wa orkurangaadi la kwagh er, a̱ kuran ve doo doo.

²⁴Un di kpaa, er i wa un kwagh la gbang gbang nahan yô, a wa ve ken gaadi u shin atô la je, shi a mande ve agbe kpaa.

²⁵Kpa ka kom atôutu nahan yô, Paulu man Shila gba eren msen, wan atsam a civir Aôndo; mbakwarev kpaa lu ungwan ve.

²⁶Fese nahan zegemtenger u tar tenger je amagh a gaadi kpaa tenger; fese nahan ihinda cii bugh, ikangenev vev poso ca ca.

²⁷Or u kuran gaadi la nderen, nengen ihinda i gaadi ivegher nahan yô, a tsuwa sanker na er una wua iyol na, lu er mbakwarev yevese.

²⁸Kpa Paulu yila sha imo i taver er: De vihin iyol you ga, gadia se cii se mba heen.

²⁹A yila er i̱ va a iwanger; tsô a tsuwe a nyôr, a gba gbidyen ikarikase iyol sha mcie, a gba inya sha ishigh ki Paulu man Shila.

³⁰Tsô a due a ve ken won, a kaa er: Uter av, me er nan man me wara?

³¹Ve kaa er: Gba nan Ter Yesu jighjigh tsô ú war, we kua ya wou kpaa.

³²Tsô ve ôr un mkaanem ma Ter kua mba ve lu ken ya na cii.

³³Hen ihwa i utu la je a kua a ve a ôô ve avav maa i er un batisema kua mba ve lu mba nav cii.

³⁴A va a ve hen ya na, a va ver ve kwaghyan inya, a gba ember a ya na cii, sha ci u ve ne Aôndo jighjigh yô.

³⁵Kpa er sev mbu av yô, mbaajiriv tindi udugwer kaa er: I̱ pase ior mbala, ve̱ yem.

³⁶Tsô orkurangaadi la va ôr Paulu mkaanem mara er mbaajiriv tindi er: I̱ pase ne ne̱ yem; nahan hegen yô, gba duen nen tsô, yem nen doo doo.

³⁷Kpa Paulu kaa a ve er: Se mba se lu Mbaromanu je yô, ve gbidye se ken igbar, ve haa se ken gaadi, ijir tsô kpaa i ôr se ga, man hegen yô, mba nan se gbenda myere? Mayange ga, ve̱ va dugh se.

³⁸Udugwer mbala za ôr mbaajiriv akaa la, nahan cier ve iyol zum u ve ungwa er ve lu Mbaromanu je yô.

³⁹Tsô ve va, ve va zamber a ve. Mba dugh ave yô, ve zamber a ve er, ve̱ due ken gar.

⁴⁰Tsô ve due ken gaadi, ve za nyôr ken ya u Lidia. Mba nengen anmgbianev yô, ve taver ve asema; tsô ve yem.