Read tiv Aerenakaa A Mbaapostoli 18 Bible Online

Aerenakaa A Mbaapostoli 18 - tiv bible

Aerenakaa A Mbaapostoli 18

¹Ken masejime u akaa la a mough ken Atene a va ken Korinte.

²A zua a Oryuda ugen heregh, iti na er Akula, i mar un ken Pontu, a sember van ken Italia, un vea kwase na Prishila, sha ci u Kaloudiu wa tindi er Mbayuda ca ca ve̱ due ken Roma kera yô. Nahan a za hen ve.

³Man er tom na u lu inja i môm a u ve yô, a za kohol ve, ve lu eren tom imôngo, gadia tom ve lu u eren tenti.

⁴Hanma iyange i memen a lu tesen ken shinagoge, lu nôngon u geman Mbayuda man Mbagrika kpaa.

⁵Kpa er Shila man Timoteu za due ken Masedonia, va nôôr her yô, Paulu maa wa iyol sha kwaghôron la je lu pasen Mbayuda sha agee er Yesu ka Kristu.

⁶Tsô er ve lu nyiman ngegh, man tuhwan a tuhwa kpaa yô, a nduur akondo na, a kaa a ve er: Awambe a en a̱ hide sha ityough yenegh; mo yô, m ngu a ishô sha kwagh ne; masen yam yemen ken atôatyev je ne.

⁷A mough heregh a za nyôr hen ya u orgen iti na er: Titiu Yusetu, lu or u cian Aôndo u ya na lu a shinagoge kighikiki.

⁸Krisepu, orvesen u shinagoge kpaa na Ter jighjigh a ya na cii; ior kpishi ken Korinte kpaa, zum u ve ungwa yô, ve na jighjigh i er ve batisema kpaa.

⁹Tsô Ter ôr kwagh a Paulu tugh ken mpase u sha mnenge kaa er: De cie ga, kpa gba ôron kwagh tsô, de huan ga;

¹⁰gadia Mo M ngu a we, ma or ngu u nana bende u ave sha u eren we kwagh u bo ga, gadia M ngu a ior kpishi ken gar ne.

¹¹A tema her inyom i môm man iwer ataratar, lu tesen ve kwaghôron u Aôndo.

¹²Kpa zum u Galiou lu gomna sha Akaya la, Mbayuda mough, ta sha Paulu a ishima i môm ve va a na sha ishigh ki ikônough ki ijirigh,

¹³ve kaa er: Or ne ngu urugh ior sha u ve̱ civir Aôndo, kpa ka sha gbenda u atindigh ga.

¹⁴Kpa Paulu nenge u una bugh zwa yô, Galiou kaa a Mbayuda er: Aluer a lu sha kwagh u bo shin sha aeren a dang yô, ne Mbayuda, ma m lu a ityôikaa i me wa ishima a ven yô.

¹⁵Kpa a lu sha anyimanakaa a sha ishemberkwagh shin ati shin atindi a en yô, gba kuren nen ayol a en tsô, mo yô, kam ka lun or u ôron ijir sha akaa ne ga.

¹⁶Tsô a zenda ve hen ikônough nagh ki orjir kera.

¹⁷Nahan ve cii ve kôr Sosetene, orvesen u shinagoge, ve gbidye un sha ishigh ki ikônough ki orjir la je. Akaa la nahan cii kpaa, Galiou wa iko sha a ga.

¹⁸Er Paulu shi ngôôr her ayange nga kar yô, a lôhô anmgbianev ayem, a maa a nyôr tso, a yem Shiria; Prishila man Akula kpaa lu a na ityô; yô, vande hondon ityough ken Kenkrien kera ve, gadia lu a iceghzwa iyol.

¹⁹Ve va ken Efese; a va undu ve heregh, un iyol na yô, a nyôr ken shinagoge a ôr kwagh a Mbayuda.

²⁰Ve zamber a na er a̱ shi a̱ ngôôr, kpa a rumun ga;

²¹a lôhô ve ayem a kaa er: Aluer Aôndo Una rumun yô, me shi me hide her a ven. Tsô a nyôr tso hen Efese.

²²Va nyer hen Sesaria yô, a za sugh nongo u Kristu, man a kar a yem Antioki ye.

²³Er a za tsa keela ayange nga kar yô, a mough a gba zenden sha tar u Galatia man Ferigia, lu taver mbahenen cii asema.

²⁴Oryuda ugen va ken Efese, iti na er Apolo, i mar un ken Alekesanderia, lu or u fan kwagh kpe kpe, lu a kwaghfan ken icighanruamabera kpishi.

²⁵Or la i vande tesen un gbenda u Ter; man er a tseen ishima sha kwagh kpishi yô, a gba ôron kwagh, tesen akaa sha kwagh u Yesu vighe vighe, kpa fa di batisema u Yohane tsô.

²⁶A gba ôron kwagh vangertiôr ken shinagoge. Kpa er Prishila vea Akula ve ungwa kwaghôron na yô, ve kua a na, ve seer bughun un gbenda u Aôndo wanger wanger.

²⁷Er a ver ishima u karen yemen ken Akaya yô, anmgbianev taver un ishima, man shi ve nger washika hen mbahenen mbala er ve̱ rumun un. Wen di kpaa, er a za nôôr yô, a wase mbananjighjigh sha mrumun u sha mhôôn u i ne un la kpishi je.

²⁸Gadia a hemba Mbayuda kwaghôron sha agee, lu ken igbar je, lu tesen ken icighanruamabera er Yesu ka Kristu je yô.