Read tiv Aerenakaa A Mbaapostoli 19 Bible Online

Aerenakaa A Mbaapostoli 19 - tiv bible

Aerenakaa A Mbaapostoli 19

¹Tsô zum u Apolo lu ken Korinte la, Paulu kar hen tar u u lu ica a zegemnger maa va nyôr ken Efese, a va kohol mbahenen mbagenev her.

²A kaa a ve er: Zum u ne na jighjigh la yô, ne ngohol Icighan Jijingi kpa? Ve kaa a na er: Ei, m-ongo tsô kpaa se mba a ungwa kwagh u Icighan Jijingi ga.

³A kaa er: Tsô lu ken nyi i er ne batisemaa? Ve kaa er: Lu ken batisema u Yohane.

⁴Kpa Paulu kaa er: Yohane yô, er batisema sha batisema u mgemshima, lu kaan a ior er, ve̱ na Un u A lu van ken ijime na la jighjigh ka Yesu je la.

⁵Mba ongo nahan yô, i er ve batisema ken iti i Ter Yesu.

⁶Tsô er Paulu pende ave sha a ve yô, Icighan Jijingi haa sha a ve, ve gba ôron kwagh ken ijô igen, ve ôr kwaghôron u profeti.

⁷Ve cii ve lu er ior pue kar ihiar nahan.

⁸Tsô a nyôr ken shinagoge, iwer itiar je a lu ôron kwagh vangertiôr, lu ôron, tesen akaa a tartor u Aôndo sha agee.

⁹Kpa er mbagenev cighir asema yô, ve wa iko kpaa ga, ve lu ôron kwagh dang sha gbenda la sha ishigh ki ikpelaior je, a due hen ve kera, a sange mbahenen hen a ve kera, hanma iyange lu ôron kwagh ken makeranta u Tiranu.

¹⁰I lu eren nahan kuma anyom ahar je, zan zan mba ve lu ken Ashia cii ungwa kwagh u Ter, Mbayuda kua Mbagrika kpaa.

¹¹Aôndo kpaa er akaa a ageegh a kpilighyol sha ave a Paulu;

¹²zan zan je yô, i tôô mbaadikpo shin iper i un haren la kpaa, i za a mi i za penda sha mba i kpe ve iyol ga yô, angev atô kposo kposo mbu bee ve, ujijingi mba bov kpaa due.

¹³Kpa ior mbagenev lu ken Mbayuda lu mbazenden a zende sha won, ve dughun ujijingi mba bov, ve kpaa ve cihi ve ter iti i Ter Yesu sha mba ve lu a ujijingi mba bov, ve kaa er: M zua ne a Yesu u Paulu a lu ôron kwagh Na la.

¹⁴Ior mba shonov mba ve eren nahan la, lu ior itiankarihiar, lu ônov mba Sekeva, Oryuda, lu pristi u tamen.

¹⁵Tsô jijingi u bo la gema kaa a ve er: Yesu yô, m fa Un, Paulu kpaa m fa un, kpa ne yô, ne mba unô je?

¹⁶Or u jijingi u bo lu ken a na la, tsuwe, ta sha a ve, hemba ve cii, hemba ve sha agee, zan zan ve yevese ve due ken ya la idyelegh a avav iyol.

¹⁷Kwagh la hingir u ior cii vea fa un, Mbayuda kua Mbagrika mba ve lu ken Efese la; nahan mciem gba ve iyol cii, tsô iti i Ter Yesu hingir zegenan.

¹⁸Ior kpishi ken mba ve na jighjigh yô, ve va, ve va rumun kwaghbo ve, ve va pase aeren a ve.

¹⁹Man mbagenev kpishi ken mbaerenahir, ve kohol ityakerada ve, ve va nande sha ishigh ki ior cii, ve ôr ishe i ityakerada ngila, inyaregh kuma agbenger a azurfa dubu akunduahargber,

²⁰kape kwagh u Ter zahemen sha agee tsung, hemba kpaa la.

²¹Akaa ne nga karen kera yô, Paulu wa ishima u yemen ken Yerusalem, er una kar ken Masedonia man Akaya yô; a kaa er: Me za heera kera yô, Roma kpaa me ar me nenge un keng.

²²Nahan a tindi ior ihiar ken mba ve eren un tom la, er ve̱ za ken Masedonia, lu Timoteu man Erasetu; wen iyol na yô, hira lu ken Ashia her.

²³Hen shighe la ayôôso mough kpishi sha kwagh u gbenda la.

²⁴Gadia or ugen, iti na er Demeteriu, or u varen iwa i azurfa, u a varen akav a tempel u Artemi sha azurfa yô, naan mbavareniwa tom, mtsera lu sha mi kpishi.

²⁵A kohol ve kua mba ve eren injatom la cii a kaa er: Ne ior, ne fa, ka sha tom ne se zough a inyaregh yasegh mi ye;

²⁶ne mba nengen, shi ne mba ungwan kpaa, ka ken Efese tseegh ga, shi ciôn ma i lu ken Ashia cii je man Paulu ne a lu ulugh ior kpishi, geman ve je, ngu kaan er, mban mba i eren sha ave ne ka mbaaôndo je ga.

²⁷Man ka tom wase ne tseegh kwagh una va tser u u bo ua hingir kwagh u lahan ga, kpa zan zan kua tempel u Artemi, zegeakombo ne kpaa, á gema un, una hingir gbilinkwagh, shi á dugh un ken icivir na kpaa, á ta kera je, un u Ashia cii kua tar u civir un ne.

²⁸Mba ongo nahan yô, asema nyoon ve, ve gba genger imo, kaan er: Artemi u Mbaefese ka zegekwagh je!

²⁹Gar cii mgbough a anzughul, ve cii ve hembe ayem ve za hen ijiir i nengen iniumbe la, ve kôr Gayu vea Aristareku, mba ve lu ior i ken Masedonia, ve lu akar a Paulu a zende yô, ve gba yemen a ve.

³⁰Er Paulu wa ken ishima u una nyôr ken ikpelaior yô, mbahenen venda a na.

³¹Mbagenev ken mbavesen mba ken Ashia, er ve lu akar a Paulu yô, ve tindi loho her a na, ve zamber a na er, a̱ de ze hen ijiir i nengen iniumbe la ga.

³²Mbagenev ve genger imo ve kaa kwagh ugen, mbagenev di kwagh ugen kposo, gadia ikpelaior nzughul, mbagenev kpishi fa kwagh u i gbe kohol tsô la kpaa ga.

³³Tsô ve due a Alekesander ken ikpelaior, Mbayuda mgbegha un er a̱ kar sha hemen. Tsô Alekesander kende uwegh sha er una ôr ikpelaior kwagh una palegh iyol yô.

³⁴Kpa mba kav er a lu Oryuda yô, ve cii ve gba geren imo i môm zan zan kuma er ahwa ahar nahan je, er: Artemi u Mbaefese ka zegekwagh je!

³⁵Tsô orngeren u gar la va yange ikpelaior ayôôso, a kaa er: Ne ior i Efese, or u nan lan er gar u Mbaefese a lu kuran tempel u zegeartemi man eev mbu mbu gbe sha aôndo la, nan ngu kpa?

³⁶Man er akaa ne a lu a nyiman ga yô, nahan ka u ma ne gbe huan tsô, de eren nen ma kwagh gagh ga.

³⁷Gadia ne va a nomsombaiorov mban hen ijiir ne, man ve kpaa ka mbayan ishar sha akaa a ken utempel shin ka mbatuhwan akombo a ase kpaa ga.

³⁸Man aluer kwagh a gba Demeteriu kua mbavareniwa mba ve lu a na imôngo la, u ôron a ma or yô, ayange a ajirigh nga, mbaajiriv kpaa mba her; yô, de, ve̱ gba za yilan ijir ayol a ve tsô.

³⁹Man a lu kwagh ugen kposo nea keren sha kwagh ne yô, á ôr ijir sha mi sha mkohol u i eren keke la.

⁴⁰Gadia mimi je á fatyô u za yilan se ijir sha ayôôso a nyian a a lu a ityôikaa ga ne; mayange sé zua a ityôikaa i sha mkohol u ikpelaior ne kpaa ga.

⁴¹Kaan nahan yô, maa a na ikpelaior gbenda.