Read tiv Aerenakaa A Mbaapostoli 20 Bible Online

Aerenakaa A Mbaapostoli 20 - tiv bible

Aerenakaa A Mbaapostoli 20

¹Tsô mba til ayôôso yô, Paulu tindi, i yila mbahenen, a taver ve asema, tsô a lôhô ve ayem, A mough u yemen Masedonia.

²Er a kar ken ityar i keela yô, a taver ve asema sha kwaghôron kpishi, maa a va ken tar u Grika.

³A tsa heregh iwer itiar. Tsô Mbayuda zua zwa sha a na shighe u a lu veren ishima u nyôron ken tso u zan ken Shiria yô, nahan a wa ken ishima er una hide sha gbenda u Masedonia.

⁴Tsô Sopater, or u hen Berea, wan u Piru, lu zan a na imôngo kua Aristareku man Sekundu, ka ior i hen Tesalonika je la; man Gayu, or u ken Derebe, kua Timoteu; kpa mba ken tar u Ashia yô, lu Tikiku man Terofimu,

⁵vande hemen a vese, lu za keghen se ken Teroa je.

⁶Tsô ken masejime u ayange a bredi u i we kwa sha mi ga la, se nyôr tso hen Filipi, sha iyange i ataan la se va kohol ve hen Teroa, se tsa her ayange ataankarahar.

⁷Sha iyange i lahadi la, zum u se kohol sha u coon bredi yô, Paulu ôr ve kwagh, lu veren ishima u kper nan una mough; nahan a lihe kwaghôron na zan zan atôutu.

⁸I tsar amenger kpishi ken kpoyou u sha la je, henpe se kohol la.

⁹Wanye kwaor ugen, iti na er Utiku, tema hen windou, tsô mnyam hemba un; er Paulu lihe a kwaghôron na la yô, wanye kwaor la meer mnyam, a osough sha kpoyou u sha utar la je, a gba, i tôô un kpenegh.

¹⁰Tsô Paulu hungwa, samber sha a na, kuve un, a kaa er: De nen ayôôso, gadia uma na ngu her.

¹¹Tsô a shi a hire a unde, a coon bredi, a ya, a shi a lu zan hemen u ôron kwagh a ve zan zan sha use, maa a mough.

¹²I yem a wanye kwaor la uma; nahan asema pever ve kpishi.

¹³Kpa se yô, se vande hemen se za nyôr tso se gba yemen hen Aso sha u sé za tôô Paulu heregh; gadia kape a kaa la, er un iyol na yô, lu un ka zan angahar.

¹⁴Va kohol se hen Aso yô, se tôô un shin tso man se va hen Mitilene.

¹⁵Se mough keela yô, kper nan gen, se tera hen Kio; kper nan gen se kar se za hen Samo; shi kper nan ugen yô, se va hen Milete.

¹⁶Gadia Paulu wa ken ishima er una kar a kar Efese ken tso, sha u ma un timbir hen Ashia ga yô, gadia lu tolough er una fatyô yô, ma un lu ken Yerusalem sha iyange i Pentekosti.

¹⁷Hen Milete la a tindi loho hen Efese, a yila mbatamen mba nongo u Kristu.

¹⁸Mba ve yô, a kaa a ve er: Hii sha iyange i m hii tan nguhar ken Ashia je, ne ayol a en kpaa ne fa inja i mlu wam i m lu a ven sha ayange la cii,

¹⁹er m lu eren tom u Ter, m hide a iyol yam ijime cii, i lu a mliam ashe man a uzayol mba ve lu kohol mo sha mbamzoughzwa mba Mbayuda kpaa;

²⁰man shi ityough yuhwam sha u pasen ne hanma kwagh u lun a inja ga, man u tesen ne akaa ken igbar man ken uya enev kpaa ga,

²¹m lu pasen Mbayuda man Mbagrika kwagh u ishima i geman hen Aôndo man kwagh u jighjigh u nan Ter wase Yesu Kristu la.

²²Hegen yô, nenge, m ngu yemen hen Yerusalem a ikangenev ken Jijingi, fan a fa tsô kpaa, m fa kwagh u una za tserem keregh ga,

²³saa di er Icighan Jijingi A lu pasen mo ken hanma gar er ikangenev man atsan ve lu keghen mo yô.

²⁴Kpa her a mo yô, m wa uma wam iko ga, ngum er ka ma kwagh u ikoogh ga, sha u me kure zende wam man tom u m ngohol hen Ter la kpaa, ka u me pase Loho u Dedoo u sha mhôônom ma Aôndo la.

²⁵Hegen yô, nenge, m fa, ne cii mba m lu zenden her a ven, m lu ôron ne kwagh u tartor u Aôndo ne yô, kera zuan yen ishigh a mo ga.

²⁶Ka sha ci u nahan man m pase ne nyian ye, mo m ngu a ishô sha awambe a ior cii.

²⁷Gadia ityough yuhwam sha u pasen ne awashima u Aôndo ci ca cii ga.

²⁸Kuran nen ayol a en man ikumuile i Icighan Jijingi a ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol Na la.

²⁹Gadia m fa, me mough kera yô, ugbaseela mba vihin asema vea va nyôr her a ven, vea de u eren ikumuile ican ga.

³⁰Man her atô wen je kpaa ior vea mough, vea gba ôron akaa a geseghaa, sha u vea urugh mbahenen ken ijime ve yô.

³¹Sha ci u nahan yô, kuran nen, umbur nen er anyom atar je tugh man tetan, mayange uwer gbam u taver hanmô wen ishima a mliam ashe ga.

³²Hegen yô, m ver ne sha ikev i Ter man shi ikev i kwaghôron Na u sha mhôôn la kpaa, Un u A lu a agee a Una maa ne, Una na ne dyako a mba ve lu uicighanmbaiorov cii imôngo.

³³M tôm azurfa u or ga, shin zenaria shin akondo a nan kpaa ga;

³⁴ne ayol a en kpaa ne fa, m eren tom sha ave am ne, sha ci u ugbayol av kua u mba ve lu a mo imôngo cii.

³⁵Ken akaa cii m tese ne ikav mer, ka sha u eren tom nahan man i doo u né wase mba ve taver ga la ye. Man shi umbur nen akaaôron a Ter Yesu A lu ôr iyol Na yô, er: U nan a na kwagh hembe saan iyol a u ngohol a ngohol kwagh.

³⁶Er akaa ne nahan yô, a gure inya a er msen a ve cii.

³⁷Ve cii ve vaa tsung, ve kuve Paulu, ve gba susen un zwa

³⁸kwagh u hemban vihin ve yum je yô, ka kwagh u a kaa er, mayange vea kera zua ishigh a na ga la. Tsô ve ver un gbenda, ve ar shin tso.