Read tiv Aerenakaa A Mbaapostoli 21 Bible Online

Aerenakaa A Mbaapostoli 21 - tiv bible

Aerenakaa A Mbaapostoli 21

¹Tsô er se undu ve, se mba nyer ken tso yô, se va hen Kos jighilaa. Kper nan gen yô, se ar hen Rode, se kar keela, se va hen Patara.

²Se mba kohol tso u peren zan ken Fenishia yô, se nyôr kimi, se mough.

³Se mba te ashe se mba nengen a Shiperu yô, se gbihi un ken imese se gba yemen hen Shiria, se za hungwa hen Tiru, gadia lu heera man á za dugh ikav shin tso ye.

⁴Se mba kohol mbahenen her yô, se tsa heregh ayange ataankarahar, mbala kaa a Paulu ken Jijingi er, a̱ de te nguhar ken Yerusalem ga.

⁵Se mba tse ayange la nga kom yô, se due, se kôr gbenda wase ave; ve cii a kasev man ônov ve ver se gbenda zan zan ken akôngo a gar je; tsô se gure hen kpezegemnger, se er msen;

⁶tsô se lôhô ve ayem, se se nyôr ken tso, ve ve hide sha ya.

⁷Se mba moughon hen Tiru yô, se va ar hen Potolomai, se kure zende wase u shin tso heregh; se sugh anmgbianev, man se tsa a ve iyange i môm.

⁸Kper nan se due, se va hen Sesaria, se nyôr hen ya u Filibu, orivangeli, un lu u môm ken mba utaankaruhar mbala, se tema her a na.

⁹Or la lu a ônov mba kasev unyiin, anuunaukase, ve ôron kwaghôron u profeti.

¹⁰Tsô er se ngôôr her ayange kpishi yô, profeti ugen, iti na er Agabu, due ken Yudia, va heregh.

¹¹Ve hen vese yô, a tôô tsar u Paulu, a kange angahar a na iyol na kua ave kpaa, a kaa er: Kape Icighan Jijingi A kaa ne er: Kape Mbayuda mba ken Yerusalem vea kange or u tsar ne, vea na un sha ikev i atôatyev la.

¹²Se mba ongo akaa ne nahan yô, se kua mba ve lu her la, se zamber a na ser, a̱ de ze sha Yerusalem ga.

¹³Tsô Paulu gema kaa er: Ka nyi ne eren, ne vaan, ne nem ishima i yinan nahana? Gadia mo yô, m vande kohol iyol, ka sha ci u i̱ kangem a kange tseegh ga, kpa zan zan ku je kpaa, me kpe ken Yerusalem, sha ci u iti i Ter Yesu.

¹⁴Kera ongo imo yase ga yô, se de, se gba kaan ser: I̱ gba eren sha ishima i Ter tsô.

¹⁵Ayange la nga kar kera yô, se kange ikav, se yem ken Yerusalem.

¹⁶Mbahenen mbagenev mba ken Sesaria kpaa za a vese imôngo, ve za a vese hen Manason, or u Shiperu lu orhenen u ken mbahiihii la je, se za tsa hen ya na.

¹⁷Se mba va ar sha Yerusalem yô, anmgbianev rumun se saan saan.

¹⁸Kper nan gen yô, Paulu za a vese hen Yakobu; mbatamen cii kpaa lu her.

¹⁹Sughun ve yô, a ôr ve akaa a Aôndo A er ken atôatyev sha tom na, sha adondo adondo.

²⁰Ve kpaa er ve ungwa yô, ve civir Aôndo; ve kaa a na er: Nenge anmgbian, hen Mbayuda yô, ior mba dubu imôngo je, mba ve ne jighjigh yô, mba veren ishima sha atindiakaa tsung.

²¹Man i ôr ve kwagh wou kpaa er, u ngu tesen Mbayuda mba ve lu ken atôatyev cii, wer, ve̱ ta Mose kera sha ci u u kaan ve wer, ve̱ de tsenge ônov vev ga, man ve̱ de eren sha aeren a uter vev kpaa ga.

²²Nahan yô, á er nana? Er u ve yô, vea ungwa keng.

²³Yô, er kwagh u se kaa u ne: se mba a ior unyiin mba ve lu a iceghzwa iyol.

²⁴Yô, za a ve, za wanger iyol you a ve imôngo, na inyaregh i̱ hondo ve ityouv, nahan ior cii vea fa er mter u i ter u ne, mimi ngu sha mi ga, we iyol you kpaa u we iko sha atindi.

²⁵Kpa sha kwagh u atôatyev a ve rumun jighjigh la yô, se nger ve ishima yase ser: Ve̱ kuran ayol a ve sha kwagh u i senge sha akombo yô, man sha awambe kpaa, man shi sha kwagh u i senge a sôngo ga, kua shi sha idya kpaa.

²⁶Tsô Paulu za a ior mbala; kper nan gen wanger iyol na a ve imôngo kera yô, a nyôr ken tempel, a gba yôôn shighe u ayange a wanger ayol la una bee man á na nagh sha ci u hanmô ve yô.

²⁷Tsô ayange a ataankarahar la nga mgbôghom u been yô, Mbayuda mba ve due ken Ashia, mba nengen a na ken tempel yô, ve vihi ikpelaior cii, ve kôr un,

²⁸ve gba genger imo kaan er: Ne Mbaiserael, wase nen se! Ngun ka or u a tesen ior cii han han sha u ôron ve akaavihin sha nongoior ne, man shi sha atindiakaa kua sha ijiir ne kpaa ne zan zan je yô, a va nyôr a Mbagrika ken tempel a va hôngor a icighanjiir ne kpaa.

²⁹Gadia ve vande nengen Terofimu, or u Efese, a na ityô ken gar, nahan lu ve er, Paulu nyôr a na ken tempel.

³⁰Asema a ior i hen gar cii kende sha, ikpelaior va kohol ayem, ve kôr Paulu, ve kpela un ken tempel kera, ve due a mi ken won; fese nahan i wuhe ihinda.

³¹Mba ngur nôngon pe wuan un yô, torutya u tamen ungwa er Yerusalem cii nzughul;

³²fese nahan a kura mbautyav kua utormbautyav va hembe sha a ve ayem; mba nengen a torutya u tamen a mbautyav yô, ve de u gbidyen Paulu.

³³Tsô torutya u tamen kporom, kôr un, kaa er i̱ kange un sha mshirim m har; man a shi pine sha u una fa shin ka nyi orou, man shi ka nyi a erou.

³⁴Mbagenev ken ikpelaior genger imo, gba ôron kwagh ugen, mbagenev di ve ôr kwagh ugen kposo je; kera zough a ityôikaa sha ci u ayôôso la jim ga yô, a kaa er, i̱ yem a na sha barki.

³⁵Va ar sha agbur a unden sha iyou yô, mbautyav tôô un a tôô sha, sha ci u kume u ikpelaior la,

³⁶gadia ikpelaior lu van ve ijime, genger imo, kaan er: I̱ kar a na kera!

³⁷Mba va mgbôghom u á nyôr a Paulu sha barki yô, a kaa a torutya u tamen la er: U shi rumun mo, m̱ ôr kwagh a we kpa? A gema a pine un er: U ongo zwa u Grika jee?

³⁸Kera ka we or u Igipiti shon u u kpoghol anomaior dubu unyiin, u yem a ve ken taaikôngo hen ayange a a kar la gaa?

³⁹Kpa Paulu kaa er: Mo m ngu or u Yuda je u ken Tarsu ken Shilishia, m ngu or u ken gar u mimi je, yô, m ngu zamber a we, shi rumun mo, m̱ ôr ikpelaior kwagh.

⁴⁰Tsô a rumun un. Paulu, til sha agbur a unden sha iyou la yô, a kende uwegh sha hen ikpelaior. Mba huan ving dedoo yô, a ôr ve kwagh ken zwa u Heberu, a kaa er: