Read tiv Aerenakaa A Mbaapostoli 22 Bible Online

Aerenakaa A Mbaapostoli 22 - tiv bible

Aerenakaa A Mbaapostoli 22

¹Ne anmgbianev man uter, ungwa nen ase iyolpalegh yam i me ôr ne hegen ne!

²Mba ongo gbe ôron kwagh ken zwa u Heberu yô, ve seer huan ving. Tsô a kaa er:

³Mo m ngu Oryuda je, i marem ken Tarsu u ken Shilishia, kpa i yesem ken gar ne, sha ikev i Gamaliel, i tesem atindi a uter asev doo doo, m lu a ishima i tseen sha ci u Aôndo, er ne cii kpaa ne lu nyian nahan.

⁴Man shi m tôv gbenda ne ityô a ican zan zan ku je, m lu kangen nomso a kasev, m lu wan ve ken gaadi;

⁵zegepristi man mkohol u mbatamen cii kpaa vea fatyô u eren mo shiada sha mi; ka hen ve je m ngohol uwashika mba i nger anmgbianev la ye, m yem ken Damaseku sha u me za va a mba ve lu keregh la, hen Yerusalem uikangen, sha u i̱ tsaha ve yô.

⁶Tsô er m lu yemen, m za mgbôghom a Damaseku er iyange sha tembe nahan yô, fese je zegeiwanger due sha, wanger, kasem,

⁷m gba inya, m ungwa imo gba kaan a mo er: Saulu, Saulu, ka nyi u tevem a icanaa?

⁸M gema m kaa mer: Ka We ana, Tere? A kaa a mo er: Ka Mo, Yesu Ornasareti, u u tevem a ican ne.

⁹Ve mba ve lu a mo imôngo yô, ve nenge di iwanger tsô, kpa ve ungwa imo i Un u A er kwagh a mo la ga.

¹⁰M shi m kaa mer: M̱ er nana, Tere? Ter kaa a mo er: Mough sha, yem ken Damaseku, ka keregh man á za ôr u akaa a i ver u sha mi a ú er a la ye.

¹¹Tsô er m kera fatyô u nengen ga sha ci u iengem i iwanger la yô, mba ve lu a mo imôngo la kôrom aga, m va nyôr ken Damaseku.

¹²Tsô orgen, iti na er Anania, or u veren ishima sha atindiakaa, u Mbayuda mba ve tema keela cii wuese un yô,

¹³a va her a mo, a va tile a mo a kaa a mo er: We, anmgbian, Saulu, hingir u nengen kera! Hen shighe la je m kenger un.

¹⁴A shi a kaa er: Aôndo u uter asev vande veren we sha u u̱ fa ishima Na, man shi u̱ nenge Orperapera, man u̱ ungwa imo i ken zwa Na kpaa;

¹⁵gadia ú va hingir or u eren shiada sha kwagh Na hen ior cii sha kwagh u u nenge man u ongo yô.

¹⁶Man hegen yô, ka nyi u timbiri? Mough sha, i̱ er u batisema, i̱ ôô u asorabo a ou kera, i̱ yila sha iti Na.

¹⁷Tsô m hir ken Yerusalem, m ngur eren msen ave ken tempel yô, ishima hingir mo kposo er zuzu karem nahan,

¹⁸m nenge a Na, A lu kaan a mo er: Due ken Yerusalem fese, gadia vea rumun shiada u we u lu eren sha kwagh Wam la ga.

¹⁹M kaa mer: Tere, ve ayol a ve je ve fa er m lu wan mba ve na U jighjigh la ken gaadi, m shi m gbidye ve ken hanma shinagoge kpaa;

²⁰man zum u i lu haan awambe a Sefanu, orshiada Wou la inya yô, mo kpaa m tile heregh, m lu rumun, m lu kuran akondo a mbawuan un mbala.

²¹A gema A kaa a Mo er: Mough, gadia tindin Yam we ken atôatyev ica je.

²²Ve lu veren ato sha a na zan zan ar hen tiônkwaghôron ne tsô ve maa ve gba genger imo, kaan er: I̱ kar a injaor ne sha won kera gadia doo u una lu uma ga.

²³Mba ngur geren akenge, eren akondo haan inya, man shi tsendan vuulevu sha nahan yô,

²⁴torutya u tamen kaa er, i̱ nyôr a na sha barki, shi kaa er, i̱ gbidye un sha u i̱ fa inja i ve geren akenge a na nahan la.

²⁵Tsô mba kangen un sha ikange yô, Paulu kaa a torutya u a tile her la er: U né gba gbidyen or u nan lu Orromanu akpa je er ijir kpaa i lu a kôr nan ga la, nahan kpaa ka sha mi zee?

²⁶Torutya la ongo nahan yô, a za hen torutya u tamen, a za kaa un er: Ka nyi u lu nôngon u erene? Gadia or ne ka Orromanu je.

²⁷Tsô torutya u tamen la va, va pine un er: Kaam ase yôô, u ngu Orromanu jee? A rumun er: Een.

²⁸Torutya u tamen gema kaa er: Mo yô, ka sha inyar kpishi je, m hingir Orromanu ye. Paulu kaa er: Mo yô, i marem a mar.

²⁹Mba ve lu kohol iyol u gbidyen un sha u i̱ fa ityôkwagh la la, maa ve de un fese. Torutya u tamen la kpaa cier un iyol er a ungwa er a lu Orromanu yô, man sha ci u a vande kangen un kera kpaa yô.

³⁰Kper nan gen yô, er i lu un ka fan ityôikaa i Mbayuda ve yila un ijir a mi jim la yô, a sagh un, a kaa er upristi mba tamen man mbaajiriv cii ve̱ kohol; tsô a va a Paulu a ver ve un sha ishi.