Read tiv Aerenakaa A Mbaapostoli 4 Bible Online

Aerenakaa A Mbaapostoli 4 - tiv bible

Aerenakaa A Mbaapostoli 4

¹Tsô mba ngur ôron a ikpelaior nahan yô, upristi man orvesen u mbakurantempel kua Mbasadushi va ande sha a ve.

²Asema vihi ve sha ci u ve lu tesen ikpelaior man ve lu yôôn mnder u shin mbakpenev ken iti i Yesu yô.

³Tsô ve kôr ve, ve wa ken gaadi zan zan sev mbu av gadia iyange i vande been.

⁴Mba ve ungwa kwaghôron la yô, mbagenev kpishi na jighjigh, iyenge ve kuma er dubu utaan nahan.

⁵Tsô kper nan yô, mbavesen vev man mbatamen vev man mbangeren vev ve kohol ken Yerusalem;

⁶Ana, zegepristi kpaa lu her, man shi Kayafa man Yohane kua Alekesander man shi mba ve lu ken nongo u zegepristi la cii.

⁷Mba veren ve her atô yô, ve pine ve er: Ka sha hanma tahav man shi ka ken iti i an ne er kwagh nee?

⁸Nahan er Peteru iv a Icighan Jijingi yô, a kaa a ve er: Ne mbavesen mba nongoior ne man ne mbatamen,

⁹aluer mba tôvon hen vese nyian sha kwagh u doon u i er oruange man nan wer la yô,

¹⁰kwagh ne a̱ hingir ken igbar her a ven cii man shi hen nongoior u Iserael cii kpaa, ka ken iti i Yesu Kristu Ornasareti, u ne mande Un sha terankon, u Aôndo nder Un shin mbakpenev la, ka sha ci Na man or ne a til sha ishigh yenegh heen wanger wanger nahan ye.

¹¹Ngun ka iwen i ne mbamaan ne laha i, kpa i gema i, i hingir sha zongo yô.

¹²Man shi myom ngu ken ma or ugen kpaa ga; gadia ma iti igen i i ne ior i á yima se a mi keng yô, ngi sha won kpaa ga.

¹³Tsô mba nengen vangertiôr u Peteru vea Yohane, man shi mba kaven er ve lu ior mba fan takerada yum kpaa ga, ve lu ior mba lun sha kwarikaa ga yô, kpiligh ve iyol, ve kav er ve luun a Yesu ityô, yô.

¹⁴Man shi er ve nenge a or u i war un la kpaa tile a ve imôngo yô, ve kera fatyô u nyiman ma kwagh ga.

¹⁵Kpa ve kaa a ve er, ve̱ hira due ken mkohol kera, tsô ve kôso kwagh ayol a ve,

¹⁶ve kaa er: Ka nyi je sé er a ior mbana? Gadia er ve er ivande i vesen yô, hingir ken igbar hen ior mba ve tem ken Yerusalem cii ne; man se kpaa se fatyô u nyiman i ga.

¹⁷Kpa sha u ugwa ne u̱ de samber hen ior ga yô, se cir nen ve zwa er mayange ve̱ de kera ôron ma or kwagh ken iti ne ga yô.

¹⁸Tsô ve yila ve, ve ta ve icin er, mayange ve̱ de kera ôron ma kwagh ken iti i Yesu ga shin ve̱ de kera tesen kwagh ken iti Na kpaa ga.

¹⁹Kpa Peteru man Yohane gema kaa a ve er: Aluer a lu vough sha ishigh ki Aôndo u sé hemba wan ne iko a Aôndo yô, kaa nen ase!

²⁰Gadia se yô, se fatyô u den u ôron kwagh u se ongo man se nenge ne ga.

²¹Tsô shi mba te kume a ve taveraa yô, ve pase ve, ve tuhwa, sha ci u ve zua a ityôikaa i vea tsaha ve ga yô, man shi sha ci u ikpelaior kpaa, gadia ior ca ca cii lu civir Aôndo sha ci u kwagh u i er la.

²²Gadia or u i er ivande i waren ne her a na la, anyom a na hemba akunduahar je.

²³Mba pase ve mba toho yô, ve za hen ior, ve za ôr akaa a upristi mba tamen man mbatamen ve er a ve cii.

²⁴Tsô mba ongo nahan yô, ve genger imo ve sôn Aôndo a ishima i môm er: Tere, ka We u U er Sha man tar man zegemnger kua akaa a a lu ken ve cii kpaa ye.

²⁵Man shi U kaa sha Icighan Jijingi sha ikev i ter wase Davidi, wanakiriki Wou Wer: Ka nyi man atôatyev a zough num, man akuraior kpaa a henen ugbilinmbaakaava?

²⁶Utor mba sha won ve mough ahendan, mbavesen kpaa ve zua imôngo, ve hendan a Ter kua shi a Kristu Na kpaa.

²⁷Gadia mimi je, ken gar ne Herode man Pontiu Pilatu kohol a atôatyev man nongoior u Iserael cii imôngo sha Wanakiriki Wou, Yesu, u U shighe Un mkurem la,

²⁸sha u vea er akaa a uwegh Ough man awashima Wou vande veren cii er á er yô.

²⁹Hegen yô, Tere, nenge myange ve ne, yô, na ikpan You ne ve̱ ôr kwagh vangertiôr,

³⁰er U naregh uwegh Ough sha u been angev, man er á er uivande man akaa a kpilighyol ken iti i Icighan Wanakiriki Wou, Yesu.

³¹Tsô mba eren msen kera yô, ijiir i ve kohol her la, i tenger, ve cii i iv ve a Icighan Jijingi, ve gba ôron kwaghôron u Aôndo vangertiôr.

³²Ikpelaior i i na jighjigh yô, asema a ve man mhen ve hingir kwagh môm, man shi sha akaa a hanmô ve nan lu a mi la yô, ma or kera kaa er, ka kwagh u nan iyol i nan je la ga, ve nungwa akaa a ve lu a mi la hingir kwagh môm.

³³Man mbaapostoli er shiada sha agee je sha mnder u Ter Yesu la, man m mrumun u sha mhôôn kpaa lu sha a ve cii.

³⁴Gadia ker a ve cii kwagh kera ban ma or ga; gadia mba ve lu a ishule shin uya kpaa, ve tee, ve va a inyaregh ki ve yam yô,

³⁵ve va ver ki sha ikev i mbaapostoli; i kar i na hanma or vough sha gbayol u nan.

³⁶Yosev, u mbaapostoli seer un iti er Barnaba (inja na yô, er, ka wan u surun ishima je la), lu or u Levi, man tsombor na yô, lu or u Shiperu,

³⁷er wen lu a sule yô, a tee u, a va a inyaregh, a va ver sha ikev i mbaapostoli.