Read tiv Aerenakaa A Mbaapostoli 6 Bible Online

Aerenakaa A Mbaapostoli 6 - tiv bible

Aerenakaa A Mbaapostoli 6

¹Tsô sha ayange la er mbahenen lu ngeen yô, ahon gba Mbayuda mba ve lu ken Mbagrika la a Mbaheberu sha ci u i wa kasev mba côgholov vev iko sha gbayol ve u ayange ayange ga yô.

²Tsô mba pue kar uhar mbala yila ikpelaior i mbahenen cii, kaa er: Doo u sé undu kwaghôron u Aôndo, sé gema sé ver ishima sha tom u karen kwaghyan la ga.

³Nahan yô, anmgbianev, ker nen ior utaankaruhar ken a ven, mba i wuese ve, man ve iv a Jijingi man mfe kpaa yô, sha u se̱ ver ve sha tom ne.

⁴Kpa se yô, sé taver ishima sha msen u eren man sha tom u kwaghôron ne.

⁵Kwaghôron la doo ikpelaior cii; nahan ve tsuwa Sefanu, or u ivin a jighjigh u nan man Icighan Jijingi, man Filibu man Prokoru man Nikanor man Timon man Parmena kua Nikolau u a due ken Antioki a nyôr a nyôr nongo u Mbayuda yô.

⁶Ve ver ve her atô u mbaapostoli; mba eren msen kera yô, ve penda ve ave sha ityo.

⁷Kwaghôron u Aôndo seer ngeen; iyenge i mbahenen seer ken Yerusalem kpishi; upristi kpishi kpaa lu wan jighjigh u nan la iko.

⁸Kpa Sefanu, er a iv a mrumun u sha mhôôn man agee yô, a er akaa a kpilighyol man uivande mba vesen hen ikpelaior.

⁹Kpa mbagenev ken mba ve lu ken shinagoge u i yilan er shinagoge u Mbalibertini, man u Mbaserene man u Mbaalekesander kua shi mba ve due shin Shilishia man Ashia la kpaa, ve gema ve lu sendegh kwaghôron a Sefanu.

¹⁰Kpa mayange ve fatyô u hemban mfe man Jijingi u un ôron kwagh a min la ga.

¹¹Tsô ve mgbegha ior mbagenev ityô mba ve kaan er: Se ungwa un ngu ôron akaa a uityuhwan sha Mose man sha Aôndo kpaa.

¹²Nahan ve kende ikpelaior asema sha kua mbatamen man mbangeren kpaa, ve va ta sha a na, ve kôr un, ve va a mi hen mkohol,

¹³ve ver mbashiada mba aiev mba ve kaan er: Or ne yô, mayange de u ôron akaa a vihin sha icighanjiir ne man sha atindi kpaa ga.

¹⁴Gadia se ungwa er a kaa er: Yesu Ornasareti ne Una yôhôl ijiir ne kera man shi Una gema aeren a Mose lu na se la kpaa.

¹⁵Tsô mba ve lu ken mkohol la cii ve haa ashe sha a na, ve nenge ishigh nagh yô, ki lu er ka ishigh ki ortyom u Sha nahan.