Read tiv Aerenakaa A Mbaapostoli 7 Bible Online

Aerenakaa A Mbaapostoli 7 - tiv bible

Aerenakaa A Mbaapostoli 7

¹Nahan zegepristi kaa er: Akaa ne kape a lu nee?

²Tsô Sefanu kaa er: Anmgbianev man uter, ver nen ato, Aôndo u iengem ande hen ter wase Aberaham zum u a lu ken Mesopotamia, je er a lu a tema ken Haran ga la.

³A kaa a na er: Due ken tar wou kera, man hen ityô you kpaa, yem hen tar u Me tese u yô.

⁴Tsô a mough ken tar u Mbakaldi, a za tema ken Haran; keela la kpaa, er ter na kpe kera yô, A mough a na, A va a na ken tar u ne lu ker hegen ne.

⁵A na un ma dyako ken u ga, shin iaven i nguhar i môm tsô kpaa ga; kpa A tôndo zwa er Una na un u u̱ hingir kwagh na kua u tsombor na ken ijime na kpaa, er lu a lu a wan ga je.

⁶Aôndo ôr kwagh, a na kaa er, tsombor na ua lu shir ken tar ugen, a kôr u ikpan, á kighir u a ican anyom deri unyiin kpaa.

⁷Man ikurior i ia kôr u ua hingir kpan la, Mo Me ôr i ijir, kape Aôndo A kaa la; ken masetyô u akaa ne yô, vea due, vea va civir Mo hen ijiir ne.

⁸A Shi A na un ikuryan i icôngo kpaa; nahan a mar Isaka, a tsôngo un sha iyange i sha anigheni. Isaka di va mar Yakob, Yakob gema mar di uter mba tamen mba pue kar uhar mbala.

⁹Uter mba tamen mbala kpaa, er ve gba Yosev iwuhe yô, ve tee un ken Igipiti; kpa Aôndo lu a na,

¹⁰A yima un ken atsan a na cii, A na un mkpeyol man mfe sha ishigh ki Farao, tor u Igipiti man sha ya na cii kpaa.

¹¹Tsô ijen i va gba man ican i vesen i va nyôr ken tar u Igipiti cii kua ken Kanaan kpaa, tsô uter asev zua a kwaghyan u waren iyol a mi ga.

¹²Kpa er Yakob ungwa gwa er alakema ngu ken Igipiti yô, a tindi uter asev sha hiihii la.

¹³Man u sha kwa har la yô, Yosev pase iyol na hen anmgbianev nav, tsombor u Yosev kpaa due ken igbar hen Farao.

¹⁴Tsô Yosev tindi, i za yila ter na Yakob, man ityô na cii, ve lu ior akunduatargber kar utaan.

¹⁵Yakob kpaa sen shin Igipiti; za kpe keregh, un kua uter asev kpaa;

¹⁶i tôô ve, i za a mi ken Shekem, i za ii ken uwar u Aberaham yam sha inyar hen ônov mba Hemor ken Shekem la.

¹⁷Kpa er shighe u ityendezwa i Aôndo tôndo a Aberaham la mgbôghom yô, nongoior la seer a seer ken tar u Igipiti,

¹⁸zan zan tor ugen va tema tor ken Igipiti, fa kwagh u Yosev ga.

¹⁹Un shon la er ayom sha ityô yase, a er uter asev ican sha u kighir ve er ve̱ ta anikundanev vev kera, sha u ve̱ de lu uma ga yô.

²⁰Ka hen shighe la je i mar Mose ye; un doo ashe kpee. I koso un iwer itiar ken ya u ter na.

²¹Er i kende un kera yô, wan u tor Farao tôô un, koso un er a̱ hingir wan na.

²²Tsô i tese Mose mfe u Mbaigipiti cii, hingir or u ageegh ken akaaôron a na kua aeren a na kpaa.

²³Kpa va kom anyom akunduahar yô, kende un ken ishima u za sôron anmgbianev nav, Mbaiserael.

²⁴Er a za nenge i lu eren a orgen sha mi ga yô, a wase un, a yima or u i lu eren un ican la, a wua or u Igipiti la.

²⁵Lu un er anmgbianev nav ve kav er i lu sha ikev na je man Aôndo Una yima ve yô, kpa ve kav ga.

²⁶Kper nan gen kpaa shi a ande hen ve, ve lu nôngon num; tsô a kaa er: Ne nomso, ne mba anmgbianev je, man ka nyi ne eren kwagh u sha mi ga hen ayol a en nahana?

²⁷Kpa u a lu eren a anmgbian na sha mi ga la, gema hure un kera, kaa er: Ka an nan ver u orvesen man orjir sha a vese?

²⁸Ka u ka wuan mo er nyen u wua or u Igipiti la nahana?

²⁹Mose ongo mkaanem man nahan yô, a yevese, a yem shir ken tar u Midian; keregh la a za mar ônov uhar.

³⁰Tsô anyom akunduahar nga kar yô, ortyom u Ter ande her a na ken taaikôngo u hen uwo u Senai, a ande ken nomborusu.

³¹Er Mose nenge a na yô, kpiligh un iyol sha kwaghnengen la; tsô imo i Ter due kaa er:

³²Ka Mo Aôndo u uter ou, Aôndo u Aberaham man u Isaka man u Yakob kpaa. Nahan ikarikase gbidye Mose iyol, a kera cihi u kenger sha mi ga.

³³Tsô Ter kaa a na er: Tsuwa akôv a ou shin angahar kera, gadia ijiir i u til ne, ka icighannya je.

³⁴M nenge ican i lu eren nongoior Wam mba ve lu ken tar u Igipiti la je, shi M ungwa mtoghor ve kpaa, nahan M sen sha u yiman ve. Nahan yô, va, M̱ tindi u hen Igipiti.

³⁵Ka Mose shon u ve venda un, ve kaan er: Ka an nan ver u orvesen man orjirighi? Ka un shon je man Aôndo tindi un sha u a̱ za lu ortaregh man oryiman sha ikev i ortyom u a ande her a na ken ageva la ye.

³⁶Ka un je a due a ve ye, a er akaa a kpilighyol man uivande ken Igipiti kua hen zegemnger u Nyian man ken taaikôngo kpaa, kuma anyom akunduahar je.

³⁷Ka Mose shon je man a kaa a Mbaiserael er: Aôndo Una ver ne profeti ken anmgbianev enev er mo nahan ye.

³⁸Ka un je man a lu ken mkohol u ken taaikôngo a ortyom u a ôr kwagh a na la imôngo sha uwo u Senai, man a uter asev kpaa ye, man shi a ngohol mkaanem ma umam sha u una na se ma kpaa yô.

³⁹Kpa lu uter asev ka wan imo na iko ga, zan zan ve mgbegha un kera; ken asema a ve yô, ve gema ve hide ken Igipiti je;

⁴⁰ve kaa a Aron er: Er se mbaaôndo mba vea hemen se yô; gadia Mose u a due a vese ken tar u Igipiti ne yô, se fa kwagh u a er un ga.

⁴¹Sha ayange la ve er eev mbu wanbua ve va a nagh ve va na eev mbula, saan ve iyol a ityom i ave a ve la.

⁴²Kpa Aôndo de ve ve gba civir ikum i akaa a Sha, er i nger ken takerada u uprofeti nahan er: We ya u Iserael, anyom akunduahar ken taaikôngo, ne lu nan Mo nagh sha ilev mbi i senge man sha iniav mbigenev kpa?

⁴³Ne tôô tabernakel u Moleki, man shi ishan i aôndo wen Romfa kpaa, ka ieev mbi ne er mbi sha ci u civir mbi je la. Kpa Mo yô, Me yem a ven uikangen, kar Babilon yem ken hemen.

⁴⁴Uter asev lu a tenti u shiada ken taaikôngo er Un u A ôr kwagh a Mose la A kaa er i̱ er un sha ikav na i a nenge a mi la.

⁴⁵Ngun kpaa uter asev gema ngohol, nyôr di a mi a Yosua ityô, zum u ve ngohol tar u atôatyev a Aôndo vande mgbeghan a sha ishigh ki uter asev kera la, zan zan ar sha ayange a Davidi je,

⁴⁶u a zua a mrumun u sha mhôôn sha ishigh ki Aôndo, a zamber er ma un er Aôndo, u Yakob ijiir i teman.

⁴⁷Kpa lu Solomon va maa Un iyou la ye.

⁴⁸Kpa Uhembansha la yô, tem ken uya mba i maa sha ave ga, er profeti lu kaa yô, er:

⁴⁹Sha ka ikônough Yagh ki torough, tar yô, gema ka kwagh Wam u pendan angahar sha mi. Ka nyi iyou je né maama? Kape Ter A kaa la. Shin ijiir Yam i memen yô, ka nyi?

⁵⁰Shin kera ka uwegh Agh man ku er akaa ne cii gaa?

⁵¹Ne mbatavertyough mban, ne mbatsôngon asema man ato ga ne, ne mba hendan a Icighan Jijingi gbem je; er uter enev lu er nahan, kape ne kpaa ne eren je ne.

⁵²Ka hanmô ken uprofeti je man uter enev tôv nan a ican ga? Ve wua mba ve lu tsengan ôron mve u Ormimi, man hegen ne kpaa ne hingir mbanengen Un mker shi ne wua Un kpaa;

⁵³ka ne mba ne ngohol atindi sha ave a mbatyomov mba Shaav je, kpa ne we a iko ga ne.

⁵⁴Mba ongo akaa ne yô, asema gba ve awambe, ve gba yan anyi sha ci u kwagh na la.

⁵⁵Kpa un, er a iv a Icighan Jijingi yô, a kende ashe Sha, a nenge iengem i Aôndo man Yesu tile ken uwegh ku yanegh ku Aôndo,

⁵⁶a kaa er: Nenge, m nenge i bugh Sha man Wan u or tile ken uwegh ku yanegh ku Aôndo.

⁵⁷Nahan ve gbidye ivaa genger genger, ve cir ave sha ato, ve hembe ishima i môm, ve za ta sha a na.

⁵⁸Ve gbihi un ken won gar, ve ta un awen; mbashiada mbala va haa akondo a ve hen ikum i wanyekwaor ugen u i yilan un er Saulu la.

⁵⁹Ve ta Sefanu awen, lu yilan kaan er: Ter Yesu, ngohol jijingi wam!

⁶⁰Tsô a gure inya, a genger imo taver taver er: Tere, de ne ve ibo sha isholibo ne ga! Kaan nahan yô, maa a sule.