Read tiv Aerenakaa A Mbaapostoli 9 Bible Online

Aerenakaa A Mbaapostoli 9 - tiv bible

Aerenakaa A Mbaapostoli 9

¹Yô, er Saulu lu suwen u tan kume sha mbahenen mba Ter man shi u wuan ve kpaa yô, a za hen zegepristi

²a za sôn un er a̱ nger uwashika hen ushinagoge mba ken Damaseku sha u aluer una za zua a mba ve lu sha gbenda la yô, a lu nomso shin kasev kpaa, una va a ve uikangen ken Yerusalem.

³Tsô ngur yemen, za mgbôghom a Damaseku yô, fese nahan iwanger due sha aôndo, wanger, kase un;

⁴a gba inya a ungwa imo lu kaan a na er: Saulu! Saulu! Ka nyi u tevem a icana?

⁵A kaa er: Ka We ana, Tere? Ter gema kaa er: Ka Mo, Yesu u u tevem a ican ne!

⁶Kpa mough sha, za nyôr ken gar, tsô á ôr u kwagh u a doo u ú er yô.

⁷Ior mba ve lu zan a na imôngo la tile, kondo ve iyol gbong, ve ungwa imo la, kpa ve nenge a ma or ga.

⁸Tsô Saulu kighir mough sha; er ashe na bugh yô, kera nenge kera ga; i kôr un aga, i nyôr a na ken Damaseku.

⁹Ayange atar cii, a nenge ga, kwaghyan kpaa ya ga, kwaghman kpaa ma ga.

¹⁰Yô, orhenen ugen lu ken Damaseku, iti na er Anania. Ter kaa a na ken mpase u sha mnenge er: Anania! Wen kpaa rumun er: Mo ne, Tere.

¹¹Ter kaa a na er: Mough sha, za sha gbenda u i yer u er Nôô la, hen ya u Yuda, tsô u za pine or iti na er Saulu, ka or u Tarsu, gadia nenge, ngu eren msen,

¹²man a nenge or, iti na er Anania, ngu nyôron pendan un ave sha ityou, sha u a shi a nenge kera.

¹³Kpa Anania gema kaa er: Tere, M ungwa gwa u or la hen ior kpishi, er a er uicighanmbaiorov Ou akaa a vihin kpishi ken Yerusalem yô.

¹⁴Heen kpaa ngu a tahav mbu a ngohol hen upristi mba tamen sha u una kange mba ve yer sha iti You la cii yô.

¹⁵Kpa Ter kaa a na er: Gba zan tsô, gadia un ka ikagh ki i tsegh ki sha ci Wam sha u una zende a iti Yam sha ishigh ki atôatyev man utor kua Mbaiserael kpaa yô.

¹⁶Gadia Me tese un atsan a ngeen yum a una ya a sha ci u iti Yam keng la.

¹⁷Tsô Anania mough, za nyôr ken ya la. Pende un ave iyol yô, a kaa er: Anmgbian wam Saulu, Ter Yesu u A ande her a we sha gbenda u u lu van la, ka Un je A tindim hen we sha u ú zua a mnenge kera, man er á iv u a Icighan Jijingi kpaa ye.

¹⁸Fese nahan ankaam er apusu nahan, due un ker ashe, haa inya; a hingir u nengen kera. Tsô a kighir a mough sha, maa i er un batisema.

¹⁹A ya kwaghyan a zua a agee a iyolough.

²⁰A tsa a mbahenen mba ve lu ken Damaseku la anyangem kpeghee, maa a gba pasen ken ushinagoge er Yesu ka Wan u Aôndo je.

²¹Mba ve ungwa la cii, lan ve ishima, ve kaa er: Kera ka or u a lu tôvon mba ve lu ken Yerusalem mba ve yer ken iti ne a ican ne gaa? Man iyange va heen kpaa, lu veren ishima er una za a ve uikangen sha ishigh ki upristi mba tamen je.

²²Kpa Saulu lu hemban zuan a zua a agee, lu nan Mbayuda mba ve tem ken Damaseku anzughul sha u tesen wanger wanger er: Ngun ka Kristu je ne.

²³Tsô ayange nga kar kpishi yô, Mbayuda zua zwa er vea wua un.

²⁴Kpa Saulu ungwa awashima ve la; nahan ve kura ihindagar tugh man tetan sha u vea wua un yô.

²⁵Kpa mbahenen nav tôô un tugh, wa shin ikese, due, shiligh a mi sha kpekpegar ken won.

²⁶Zum u a va ken Yerusalem yô, lu nôngon pe zuan imôngo a mbahenen mbala; kpa ve cii, ve lu cian un, gadia ve na jighjigh er un ka orhenen mimi ga.

²⁷Kpa Barnaba kua a na va a na hen mbaapostoli, va ôr ve er a nenge a Ter sha gbenda, Ter ôr kwagh a na kpaa yô, man shi er a lu ôron kwagh vangertiôr ken iti i Yesu ken Damaseku kpaa.

²⁸Tsô lu ken Yerusalem lu nyôron man duen a ve imôngo;

²⁹lu ôron kwagh vangertiôr ken iti i Ter, shi lu ôron hendan kwagh a Mbayuda mba ve lu ken Mbagrika la; kpa ve lu keren un a ku.

³⁰Anmgbianev mba fe nahan yô, ve za a na ken Sesaria, ve za ver un gbenda er, a̱ yem Tarsu.

³¹Nahan bem gba sha nongo u Kristu u u lu ken Yudia cii, man Galilia kua Samaria kpaa; er i lu maan ve a maa, man ve lu zenden ken mciem ma Ter man ken msurshima u Icighan Jijingi yô, ve seer a seer ngeen.

³²Tsô zum u Peteru lu zenden ken tar la cii yô, a va hen uicighanmbaiorov mba ve lu ken Lida la kpaa.

³³Keregh la a za kohol orgen, iti na er Enia, u angev mbu kpen alegh kôr un, lu sha gambe anyom anigheni.

³⁴Peteru kaa a na er: Enia, Yesu Kristu ngu been we angev, mough sha, sôr gambe wou. Fese nahan a kighir, a mough sha.

³⁵Mba ve lu ken Lida cii man Saron kpaa, ve nenge a na, nahan ve gema ishima hen Ter.

³⁶Orhenen ugen u kwase lu ken Yopa, iti na er Tabita, inja na yô, er Dorka. Kwase la lu a aeren a dedoo kpishi, man iwua i nan kpaa.

³⁷Tsô sha ayange la a gba angev, maa a kpe je; mba ee un iyol yô, ve ver un sha kpoyou u sha.

³⁸Er Lida lu ikua ikua a Yopa man mbahenen ungwa er Peteru ngu her yô, nahan ve tindi ior ihiar her a na, ve za zamber a na er: De ngôôr u van hen vese ga.

³⁹Tsô Peteru mough, gba yemen a ve imôngo. Za ar yô, ve unde a na sha iyou i sha. Kasev mba côgholov cii tile a na, lu vaan tesen uriga man akondo a Tabita lu kor, zum u lu a ve imôngo her yô.

⁴⁰Kpa Peteru due a ve kera cii, a gure inya, a er msen; tsô a gema ashe hen ikom la, a kaa er: Tabita, mough sha! A bugh ashe; nengen a Peteru yô, a mough, a tema sha.

⁴¹A kôr un sha uwe, a mough a na sha. Tsô a yila uicighanmbaiorov man kasev mba côgholov, a gema un uma a na ve.

⁴²Kwagh ne hingir ken igbar ken Yopa cii; man ior kpishi gema na Ter jighjigh.

⁴³Tsô a tsa hen Yopa ayange kpishi hen Shimon, or u nyian akôv.