Read tiv Mbaromanu 16 Bible Online

Mbaromanu 16 - tiv bible

Mbaromanu 16

¹M ngu eren shiada u dedoo pasen ne kwagh u Fibi, anmgbian wase u kwase, un ka ortom ken nongo u Kristu u ken Kenkria la,

²mer, rumun nen un ken Ter er i kom hen uicighanmbaiorov nahan. Wase nen un sha hanma kwagh u una gba un cii, gadia un wasen ior kpishi je, mo iyol yam kpaa a wasem.

³Sugh nen Prishila man Akula, nam nen, ka mbaerentom a mo imôngo ken Kristu Yesu.

⁴Mban yô, ve ver mon ve sha ci u uma wam, ka mo tseegh m lu sughun ve ga, ka iniongo i Kristu i ken atôatyev cii kpaa.

⁵Shi sugh nen nongo u Kristu u ken ya ve kpaa. Sugh nen Epineto, or u doon mo ishima la nam nen. Un ka iyiagh ki tsutswagh ki ken Ashia sha ci u Kristu.

⁶Sugh nen Maria u a er tom kpishi ken a ven la nam nen.

⁷Sugh nen Anderoniku man Yunia mba ve lu ityô yam shi ve lu mbakwarev a mo imôngo kpaa la.

⁸Sugh nen Ampiliatu or u doon mo ken Ter la, nam nen.

⁹Sugh nen Urbanu u a lu ortom a mo imôngo ken Kristu man Setaku or u doon mo la kpaa, nam nen.

¹⁰Sugh nen Apele u i rumun un ken Kristu la nam nen. Shi sugh nen mba ve lu ken ya u Aristobulu kpaa nam nen.

¹¹Sugh nen Herodion or u ken ityô yam nam nen. Shi sugh nen mba ken ya u Narkisu mba ve lu ken Ter la nam nen.

¹²Sugh nen Terufina man Terufosa mba ve eren tom tsung ken Ter nam nen. Sugh nen Perse un u a doom ishima, a er tom kpishi ken Ter la nam nen.

¹³Sugh nen Rufu u a lu icuwanor ken Ter, shi sugh nen ngô na kpaa u a lum er ka ngôm la nam nen.

¹⁴Sugh nen Asunkritu man Felegon man Herme man Pateroba man Herma kua anmgbianev mba ve lu a ve imôngo la cii nam nen.

¹⁵Sugh nen Filologu man Yulia man Neriu kua anngô na u kwase man Olumpa kua uicighanmbaiorov mba ve lu a ve imôngo cii nam nen.

¹⁶Sugh nen ayol a en sha icighanzwa u susen. Iniongo i Kristu cii ngi sughun ne.

¹⁷Anmgbianev, m ngu wan ne kwagh mer, mbala mba ve lu van a mbampav man ameen, i lu sha ityesen i i tese ne la ga yô, palegh nen ve.

¹⁸Gadia ambaaior la yô, ka Ter wase Kristu ve eren Un tom ga kpa ka iyav vev ve eren mbu tom ye. Ka sha zwanyohon man zwaovon ve lu tsumen a asema a mbakavenkwagh ga la ye.

¹⁹Iko yen i wan la i fa i sha won cii, ka nahan man m lu ember sha kwagh wen ye. Kpa sarem ka lu nen mbafankwagh sha kwagh u a lu u dedoo yô, kpa gema lu nen wang sha kwagh u bo la.

²⁰Ica ia gba ga je tsô Aôndo u bem Una cagh Satan shin angahar a en. Mrumun u sha mhôôn u Ter Yesu a̱ lu sha a ven.

²¹Timoteu u a lu eren tom a mo imôngo ngu sughun ne kua Lukiu man Yason man Sosipater mba ve lu ityô yam.

²²Mo Tertiu u m lu ngeren washika ne kpaa, m ngu sughun ne ken Ter.

²³Gayu u mo kua nongo u Kristu cii ka se tsa her a na la ngu sughun ne. Erasetu ornengen sha inyaregh ki ken gar ngu sughun ne. Kwaretu anmgbian wase kpaa ngu sughun ne. [

²⁴Mrumun u sha mhôôn u Ter Yesu Kristu a̱ lu sha ven cii.]

²⁵Un u A lu a agee a̱ taver ne sha ivangeli yam man sha myee u i lu yôôn kwagh u Yesu Kristu man sha mpase u kwaghmyer u a lu ken iuv hii sha ashighe a tsuaa la je zan zan.

²⁶Kpa i va a mi ken igbar hegen shi mba pasen un sha uruamabera mba uprofeti hen akuraior cii, sha u a̱ wa jighjigh u nan la iko—

²⁷Aôndo u A lu a kwaghfan Un tswen ne, iengem i̱ lu i Na ken Yesu Kristu gbem sha won. Amen.