Read tiv Mbaromanu 6 Bible Online

Mbaromanu 6 - tiv bible

Mbaromanu 6

¹Nahan sé kaa nana? Sé gba lun ken isholibo gbem sha u mrumun u sha mhôôn a̱ hemba ngeene?

²Mayange ga! Á er nan man se mba se kpe sha kwagh u isholibo shi sé lu uma kimi?

³Shin ne kera fa er se cii mba i er se batisema ken Kristu Yesu, i lu ken ku Na je i er se batisema ye gaa?

⁴Nahan i ii se a Na imôngo sha batisema u ken ku la sha u er i nder Kristu ken mbakpenev sha iengem i Ter yô, kape se kpaa se zenden ken uma u he je la.

⁵Gadia aluer i zua se a ibeen i i bee ku Na la yô, shi á va zua se a ibeen i i bee mnder Na u shin ku la kpaa.

⁶Kwagh ne se fa un, i mande tseor wase a Na imôngo sha terankon sha u i̱ kar a iyol i isholibo kera, se se̱ de kera luun ikpan sha ikev i isholibo ga.

⁷Gadia or u nan kpe yô, i pase nan sha ikev i isholibo i tuhwa.

⁸Er se kpe a Kristu imôngo yô, se mba nan jighjigh ser, shi sé lu uma a Na imôngo kpaa.

⁹Gadia se fa, er Kristu A nder shin mbakpenev yô, mayange Una kera kpe ku ga, ku kera ya tor sha a Na kpaa ga.

¹⁰Ku u A kpe la, A kpe sha kwagh u isholibo kwa môm vough, man uma u A lu la, ngu uma sha kwagh u Aôndo.

¹¹Nahan ne kpaa, nengen nen ayol a en er ne lu kpenegh sha kwagh u isholibo kpa ne gem ne lu uma sha ci u Aôndo ken Kristu Yesu yô.

¹²Nahan yô, isholibo i̱ de kera ye tor ken iyol yen i va kpen la sha u né ungwa imo i asaren a i la ga,

¹³shi de ne nen alegh a en sha ikev i isholibo a̱ hingir ikav mbi tomov mbi ifer ga, kpa na nen ayol a en sha ikev i Aôndo er ka mba ve dugh ken ku kera ve hingir mbaumav nahan, alegh a en a̱ lu ikav mbi tomov mbi perapera sha ci u Aôndo.

¹⁴Isholibo yô, ia ya tor sha a ven ga, gadia ne mba sha ikev i atindi ga, ka sha ikev i mrumun u sha mhôôn ne lu ye.

¹⁵Nahan yô, ka nana? Sé gbaa eren isholibo tsô er se kera lu sha ikev i atindi ga, i gem i lu sha ikev i mrumun u sha mhôôn yôô? Mayange ga.

¹⁶Ne kera fa gaa? Aluer ne na ayol a en sha ikev i kwagh sha u lun ikpan na man shi u ungwan imo na yô, ne mba ikpan i kwagh u ne ongo imo na la, shin a lu isholibo u zan ken ku, shin a lu iko i wan, u zan ken perapera.

¹⁷Kpa i̱ wuese Aôndo er ne lu ikpan i isholibo kpa ne gem ne hingir mbaungwan ityesen i i ne ken ven la sha asema a en je yô.

¹⁸Shi er i pase ne sha ikev i isholibo kera i toho yô, ne hingir ikpan i perapera.

¹⁹M gbe ôron sha inja i or tsô sha ci u isheer yen i sha inja i or la. Gadia er lu ne na alegh a en ken kpan sha ikev i kwagh u hôngorough man u yemen a yem hemen sha u vendan atindi la, kape hegen na nen alegh a en ken kpan sha ikev i perapera u zan ken mtsegh je la.

²⁰Gadia zum u ne lu ikpan i isholibo la ne lu uikangen sha ikev i perapera ga.

²¹Shighe la lu nyi injar ne zua a mini? Lu akaa a kunya u ker ne sha mi hegen ne. Man mkur u akaa angara yô, ka ku je.

²²Kpa hegen yô, i pase ne sha ikev i isholibo kera i tuhwa ne, ne gema ne hingir ikpan i Aôndo, injar yen yô, ka mtsegh, man mkur yô, ka uma u tsôron.

²³Gadia injar i isholibo i kimbin yô, ka ku, kpa iwua i sha mrumun u sha mhôôn u Aôndo yô, ka uma u tsôron ken Kristu Yesu Ter wase.