Read tiv Mbaromanu 9 Bible Online

Mbaromanu 9 - tiv bible

Mbaromanu 9

¹Ka mimi m lu ôron ken Kristu ye, ka aie m eren ga. Imo i ken ishima yam kpaa ngi eren shiada a mo imôngo ken Icighan Jijingi

²er zegeijungwen ngum ken ishima, ishima kpaa i vihin mo gbem.

³Mo yô guda u ma i wem ifan ma i pavem a Kristu sha ci u anmgbianev av mba ve lu ityô yam ken iyol la.

⁴Ve yô, ka Mbaiserael, ka ve ve lu a mlu u uôn man iengem man uikurmbayan man atindi a i na la, man tom u civir Aôndo man uityendezwa kpaa ye.

⁵Mba a uter mba tamen la kpaa man shi ka ken ve man i mar Kristu ken iyol kpaa ye. Un ka Aôndo u hemban akaa cii, i̱ wuese Un gbem sha won. Amen.

⁶Kpa unguer kwaghôron u Aôndo hingir gbilinkwagh ga, gadia mba ve lu ken Iserael la ka ve cii ve lu Iserael ga.

⁷Man shin er ve lu vor u Aberaham nahan kpaa, ka ve cii ve lu ônov nav ga, gadia ka ken Isaka man á va yilan er ka tsombor wou ye.

⁸Inja na yô, ka ônov mba ken iyol la man ve lu ônov mba Aôndo ga, kpa ka ônov mba ityendezwa la man i we ve ken tsombor ye.

⁹Gadia kwaghôron u ityendezwa kaa nahan er: Shighe ne nahan Me hide, Sara kpaa una lu a wan u nomso.

¹⁰Ka nahan tseegh ga, Rebeka kpaa jile iyol a or môm, ka ter wase Isaka je la.

¹¹Kpa er i lu a mar ve ga la je, ve lu a er kwagh u bo shin u doon kpaa ga, lu sha u awashima u Aôndo sha mtsough u Una tsuwa ve la a lu her,

¹²i̱ de lu sha aeren a or ga, kpa i̱ lu sha Un u A lu yilan la yô, i kaa a na er, u vesen la una shiren u kiriki la tom.

¹³Ka vough er i nger nahan er: Yakob doom ishima kpa Isou yô, M kôr un ihom.

¹⁴Tsô sé kaa nana? Kwagh u a lu u perapera ga kpaa ngu hen Aôndo shinii? Mayange ga.

¹⁵Gadia A kaa a Mose er, Me zungwe or u M zungu nan la mhôônom man shi mhôônom maa kôrom a or u ma kerem a nan la.

¹⁶Nahan kera ka kwagh u or u i sar nan la shin or u nan nenge ngegh la ga, kpa ka sha mhôônom ma Aôndo.

¹⁷Gadia icighanruamabera ngu kaan a Farao er, ka sha ci u kwagh ne je M ver u u lu uma ye, ka sha u Me tese agee a Am ken a we man shi i̱ yôô iti Yam sha won cii kpaa.

¹⁸Nahan yô ka A zungwe or u i sar Un la mhôônom, kpa or u i sar Un u cighir nan ishima yô, A cighir di je.

¹⁹Nahan ú kaa a mo wer: Tsô ka nyi man shi A ne ibo? Gadia ka an nana fatyô u vendan awashima Naa?

²⁰We or, u ngu di nyi ve u hendan kwagh a Aôndo, kwagh u i er un a er la una fatyô u kaan a u a er un la er: Ka nyi u erem nahan, kpa?

²¹Shin ormaantyegh kera ngu a tahav sha inyatyuu sha u una maa ikagh i môm sha u eren kwagh u icivirigh a mi man shi ikagh kigenegh sha u eren kwagh u lun a icivir ga, sha ijennya shon la i môm i môm ga ase?

²²Aluer Aôndo soo u tesen iyugh Na man shi u pasen agee a Na, kpa A lu wan ishima tsung a ikav mbi iyughuv mbi i ver mbi sha ci u mtim la yô,

²³ka sha u tesen iengem Na i ngeen yum la sha ikav mbi i zungu mbi mhôônom mbi A vande veren mbi sha ci u iengem la.

²⁴Ka se mba A yer se je la, ka ken Mbayuda tseegh ga, ka ken atôatyev kpaa.

²⁵Kape i nger ken Hosea kpaa la er: Me yila mba ve lu nongoior Wam ga la Mer: nongoior Wam, u a doo ishima ga la kpaa Me yila Mer: U doon ishima.

²⁶Man ka ken ijiir i i kaa a ve er: Ne mba nongoior Wam ga, la je á yila ve er: Ônov mba Aôndo u uma, ye.

²⁷Yesaia kpaa genger imo sha kwagh u Iserael kaa er: Shin er iyenge i ônov mba Iserael ia lu er waarawa u hen zegemnger nahan kpaa, ka asande tsô aa war ye.

²⁸Gadia Ter Una kure ikaa shin tar, á lu vough á lu fese kpaa.

²⁹Kape Yesaia kpaa a tsengaôron je la er: Aluer Ter u akum a Sha Una ver se vor her ga yô, ma se hingir vough er Sodom nahan, 2 ma i gem se ma se hingir er Gomora nahan.

³⁰Tsô se kaa nana? Se kaa nahan ser, atôatyev a a lu zendan perapera ityô ga la a zua a perapera je, ka perapera u sha jighjigh u nan je la.

³¹Kpa Iserael mba ve lu zendan perapera u sha atindi la ityô yô, ve yina sha atindi la.

³²Lu sha ci u nyi? Lu sha ci u ve ker un sha jighjigh u nan ga gema lu er ka sha aeren nahan yô. Ve nôngo gbev sha iwen i nan gbev mbu nôngon la.

³³Kape i nger kpaa la er: Nenge, M ngu veren iwen i keman nguhar sha mi ken Shion, man shi vande u nôngon gbev sha mi. Or u nan ne Un jighjigh yô, nana va ahenge ga.