Read tiv 1 Mbakorinte 4 Bible Online

1 Mbakorinte 4 - tiv bible

1 Mbakorinte 4

¹Se yô, i̱ nengen se er se lu mbatomov mba Kristu yô, man shi mbakarenkwar u akaa a myer a Aôndo kpaa.

²Kwagh ugen u i veren ishima sha mi hen mbakarenkwar yô, ka u ve̱ lu ior mba jighjigh.

³Kpa mo yô, u ne né time kwagh wam né kure, shin a lu ma mkohol u ior u ôron ijir kpaa, kam kwagh je ga. M time kwagh wam iyol yam, m kure kpaa ga.

⁴M fa ma ityôikaa sha iyol yam ga, kpa heera tseegh yô, nam u me lu a ishô ga. Ka Ter A lu timen kwagh wam, kuren un ye.

⁵Nahan yô, de gbe ôron nen ma ijir er shighe a lu a kuma ga la ga, saa Ter Una va Una due a akaa a myer a ken ime la, Una va a mi ken iwanger, man Una pase mbaawashima mba ken asema a ior kpaa, ka ken shighe la man hanma or nana zua a iwuese i nan hen Aôndo ye.

⁶Akaa ne yô, anmgbianev, m gema a m zua sha iyol yam kua Apolo kpaa; ka sha ci wen sha u ne̱ zua a ityesen hen a vese er, i̱ de karen akaa a i nger la ken inya ga yô, sha er ma or nana̱ de gengese iyol a ma or sha kwagh u orgen la ga.

⁷Ka an nan ver u u hembee? Ka nyi u lu a mi i u ngohol a ngohol ga? Man aluer u ngohol yô, ka nyi u gengese iyol er u ngohol a ngohol ga nahana?

⁸Ne ide kera ve, ne hingir mbanyarev kera ve, ne ya tor, kpa se lu ga. Ma ne ye tor, se kpaa ma se ye tor a ven imôngo.

⁹Gadia beem er Aôndo ver se mbaapostoli se hemba gban ijime cii, bee er ka ior mba i er ve ijir i kuugh yô; gadia se hingir kwagh u tar man mbatyomov mba Shaav kua ior kpaa ve kenger un yô.

¹⁰Se yô, se mba abumeaior sha ci u Kristu, kpa ne yô, ne gema ne mba mbafankwagh ken Kristu. Se yô, se mba aseeraior, kpa ne yô, ne mba mbataveragee. Ne yô, ne mba mbaiciviriv, kpa se yô, se mba mbaaheenev.

¹¹Zan zan hegen je kpaa, se mba ijen, imura kpaa ngi ker se, se mba idyelegh, mba gbidi se, se mba mba azende azende sha won.

¹²Man se mba eren tom sha ican sha ave ase ayol ase. Ka a tuhwan se kpaa, se gema se naan iveren i dedoo. Ka a lu tôvon se a ican kpaa, se gba wan ishima tsô;

¹³ka a teren se sha dang kpaa, se gema se ôron kwagh bem bem. I gema se se hingir kwagh u hôngorough sha won, zan zan hegen se mba ingbôrakembegh hen ior cii.

¹⁴M nger ne akaa ne ka u van ne ahenge ga, kpa m ngu wan ne kwagh er ônov av mba doon mo ishima nahan.

¹⁵Gadia shin nea lu a mbakuran ken Kristu vea ngee gande u ôron je kpaa ne mba a uter imôngo ga, gadia ka mo m mar ne ken Kristu Yesu sha Loho u Dedoo ye.

¹⁶M ngu wan ne kwagh mer: Hingir nen mbakaven mo.

¹⁷Ka sha ci u nahan man m tindi Timoteu her a ven ye. Un ka wan wam u doon mo ishima man u jighjigh ken Ter kpaa. Una umbur ne igbenda i m lu zan sha mi ken Kristu Yesu la, er m tesen hanma ijiir ken hanma nongo u Kristu cii yô.

¹⁸Kpa mbagenev gengese iyol, mba henen er m kera ngu van hen a ven ga.

¹⁹Kpa me va her a ven fefa, aluer Ter Una rumun yô, man me fa agee a mbagengeseyol mbala, á kera lu kwaghôron ve la tsô ga.

²⁰Gadia tartor u Aôndo yô, ka sha kwaghôron u lu ga, kpa ka sha agee je.

²¹Ka nyi i sar ne? M̱ va her a ven a akpa shinii, i̱ lu sha dooshima man jijingi u legh leghee?