Read tiv 2 Mbakorinte 13 Bible Online

2 Mbakorinte 13 - tiv bible

2 Mbakorinte 13

¹Ka kwa tar je m lu van ken ven ne. Ka sha zwa u mbashiada uhar shin utar man hanma kwaghôron una kure vough ye.

²Mba ve lu vanden eren asorabo la kua mbagenev cii m vande wan ve kwagh er m lu a ven sha kwa har la, hegen er m lu her ga kpaa shi m ngu wan kwagh her mer, aluer me shi me va yô, me kera gba den ga,

³gadia ne mba keren ikav sha u fan er Kristu A lu ôron kwagh ken mo yô. Un yô ngu isheer sha kwagh wen ga, ngu a agee ken ven.

⁴I mande Un sha terankon ken isheer, kpa gema ngu uma ken agee a Aôndo. Se kpaa se mba isheer ken a Na, kpa her a ven yô, sé lu uma ken agee a Aôndo.

⁵Kar nen ayol a en sha u né fa aluer nea lu ken jighjigh u nan yô, time nen ken ayol a en. Ne kera fa er Yesu Kristu A lu ken a ven gaa? Saa nea yina ikaren tsô.

⁶Kpa m ngu veren ishima mer, né va kav er se se yen ikaren ga yô.

⁷Se mba sônon Aôndo ser, ma ne er ma kwaghbo ga, ka sha u i̱ nenge se er se kom ikaren kpee ga, kpa ka sha u ma ne er kwagh u doon shin er se sea lu er se kuma ikaren ga nahan kpaa.

⁸Gadia se fatyô u eren kwagh u vihin a vihi mimi ga, saa u wasen a wase mimi tsô.

⁹Se mba ember shighe u se lu isheer kpa ne ne gem ne taver yô. Shi se mba eren msen sha kwagh ne sha u ma ne kom vough yô.

¹⁰Ka nahan m lu ngeren akaa ne er m lu a ven imôngo ga je ne ye, sha u zum u me va lu a ven yô, i̱ de lu u me er kwagh taveraa sha tahav mbu Ter A nem mbu maan a maa, i kera lu mbu yôhôl a yôhôl ga la ze.

¹¹Kwagh u a shi yô, anmgbianev, ember nen, sôr nen mbamlu enev, ungwa nen kwaghwan, lu nen ishima i môm, lu nen bem bem man Aôndo u dooshima man u bem Una lu a ven ye.

¹²Sugh nen ayol a en sha icighanzwa u susen.

¹³Uicighanmbaiorov cii mba sughun ne.

¹⁴Mrumun u sha mhôôn u Ter Yesu Kristu man dooshima u Aôndo man mzough u Icighan Jijingi ve̱ lu sha a ven cii. Amen.