Read tiv 2 Mbakorinte 5 Bible Online

2 Mbakorinte 5 - tiv bible

2 Mbakorinte 5

¹Se fa tenti u shin tar ne u se tse ker ne, aluer á sough un kera kpaa, se mba a iyou i Aôndo, ka ya u tsôron u Sha u i maa un sha ave ga yô.

²Ka sha ci u nahan man se lu toghor iyol kpaa ye, ka hangen se u ma i cir se iyou yase i i dugh Sha la;

³sha er se cir ayol a ase yô, ma i kohol se idyelegh ga yô.

⁴Se mba se lu ken tenti her yô, se mba toghor iyol, kwagh tsule se, sar se pe i̱ bugh se ikondo kera ga, kpa i̱ hemba cirin se a cir i iyol, sha u uma a̱ gema a̱ mena kwagh u a lu u kpen kera la.

⁵Un u A lu sôron se sha ci u kwagh ne yô ka Aôndo, ka Un A ne se ibumun kpaa ye, ka Jijingi je la.

⁶Nahan yô, ishima taver se gbem, se fa, er se lu ken iyol heregh yô, se kera mba ken Ter ga.

⁷Gadia ka sha jighjigh u nan se lu zenden ye, ka sha mnenge a nenge ga.

⁸Ishima i taver se, hemba saren se u duen ken iyol kera za lun vea Ter.

⁹Nahan yô, se mba veren ishima u ma se doo Un, shin sea lu ken iyol her shin sea kera lu ken iyol ga kpaa.

¹⁰Gadia se cii sé va tile ken igbar sha ishigh ki ikônough ki ijirigh ki Kristu keng, sha er hanma or nana ngohol kwagh u nan lu eren ken iyol la shin a lu u doon shin a lu u bo kpaa.

¹¹Nahan yô, er se fe er Ter a lu u cian yô, se mba sendegh a ior; sha ishigh ki Aôndo yô, kwagh wase ngu gbar gbar, man m ngu veren ishima mer, ken imo i ken asema a en di kpaa kwagh wase ngu gbar gbar je.

¹²Se mba wuese ayol a ase sha ishigh yenegh ga, kpa se mba nan ne ityôkwagh i tan ihagh sha kwagh wase, sha u né lu a kwagh u ôron a mba ve te ihagh sha mnenge u sha ashe la, i lu kwagh u ken ishima ga la.

¹³Gadia shin sea lu hunden kpaa, ka sha ci u Aôndo, shin sea lu kaven kwagh kpaa, ka sha ci wen.

¹⁴Dooshima u Kristu ngu mgbeghan se, sha mnenge wase yô or môm kpe sha ci u ior cii, nahan yô, ve cii ve kpe je ve.

¹⁵Man A kpe ka sha ci u ior cii sha u mba ve lu uma yô, ve̱ de kera lu uma sha ci ve ayol a ve ga, kpa i̱ lu sha ci u Un u A kpe sha ci ve shi i nder Un kpaa la.

¹⁶Nahan se yô, hii hegen je se kera fa ma or sha inja i iyolough ga. Aluer se vande fan Kristu sha inja i iyolough kpaa, hegen yô, se kera fa Un nahan ga.

¹⁷Nahan yô, aluer or ngu ken Kristu yô, i gba nan hegh je ve, akaa a tse la kar kera, nenge a hingir a he.

¹⁸Akaa ne cii ka hen Aôndo A dugh ye, Un u A him se a iyol Na ken Kristu, shi A ne se tom u mhim la sha ikev kpaa la.

¹⁹Inja na yô, Aôndo lu ken Kristu, lu himen tar a iyol Na, kera na ve ibo sha mbamper mba ve per tindi la ga, shi A na se loho u mhim la sha ikev kpaa.

²⁰Nahan yô, se mba mbaôronkwagh sha ci u Kristu za iyol er ka Aôndo A lu ôron kwagh a ven ken a vese yô. Se mba zamber a ven sha ci u Kristu ser, i̱ hime ne a Aôndo.

²¹A gema Un u A fe isholibo ga la, hingir isholibo sha ci wase sha u se se̱ hingir perapera u Aôndo ken a Na yô.