Read tiv 2 Mbakorinte 8 Bible Online

2 Mbakorinte 8 - tiv bible

2 Mbakorinte 8

¹Anmgbianev, se mba pasen ne kwagh u mrumun u sha mhôôn u Aôndo u i ne iniongo i Kristu i ken Masedonia la,

²gadia sha mkar u i kar ve sha atsan kpishi la iember ve i tsung kua ibanave ve i tsung la i na ve hemba eren iwua gengee gengee.

³M ngu eren shiada sha kwagh ve mer, ve na sha agee ve, ve na hemba agee ve ken inya kpaa, ve na sha asema a ve je,

⁴ve zamber a vese ngeelee er i̱ na ve ian, ve kpaa vea lu ave sha iwasen i i lu nan sha ci u uicighanmbaiorov la.

⁵Ve kera er er se we ishima la tseegh ga, kpa ve gema ayol a ve ve na Ter shi ve na se kpaa sha ishima i Aôndo.

⁶Nahan se wa Titu kwagh ser, a̱ kure tom u dooshima ne ken ven vough er a vande hiin u nahan.

⁷Yô er ne nôngo tsembelee sha hanma kwagh, sha kwagh u jighjigh u nan man kwaghôron man kwaghfan man hanma ishima i veren man mdoo u se doo ne ishima la, kape nôngo nen tsembelee sha tom u dooshima kpaa ne.

⁸M ngu ôron kwagh ne ka sha u wan a wa tindi ga, kpa m ngu tôôn ishimaveren i mbagenev m ngu karen mimi u dooshima wen a mi.

⁹Gadia ne fa mrumun u sha mhôôn u Ter wase Yesu Kristu la. A ngee a akaa kpa A gema A hingir or u ibanave sha ci wen, sha u ne ne̱ gema ne̱ hingir mbanyarev sha ibanave Na la.

¹⁰Sha kwagh ne yô m ngu nan mhen wam gadia ka ne a inja; kwagh u ne hii eren inyom i i kar la shi lu hangen ne kpaa la,

¹¹kure nen u eren sha mi nahan vough, sha kwagh u ne lu a mi sha ave la.

¹²Gadia aluer gbashima una lu yô, á rumun un sha kwagh u or nan lu a mi la, ka sha kwagh u nan lu a mi ga la ga.

¹³M kaa nahan ka u heghem mbagenev ikav geman seer ne a seer ican ga.

¹⁴Sha gbenda u vough yô, kwagh u ne lu a mi kpishi la ngu wasen sha ibanave i mbala ken shighe ne, sha u kwagh u ve lu a mi kpishi la a̱ wase sha ibanave yen, sha u kwagh a̱ lu vough vough yô.

¹⁵Kape i nger kpaa la er, Un u a kor kpishi la kwagh neer un ga man un u a kor kpuaa la kpaa kwagh yina un ga.

¹⁶Kpa i̱ wuese Aôndo u A ne ne imbagbashima ne sha kwagh wen ken ishima i Titu kpaa la,

¹⁷gadia a rumun zamber wase la tseegh ga, kpa er a lu a ishima i tseen yum yô, a za hen ven sha ishima na je.

¹⁸Shi se tindi anmgbian u a ze gwa sha kwagh u Loho u Dedoo ken iniongo i Kristu cii la a na imôngo.

¹⁹Ka nahan tseegh ga, kpa iniongo i Kristu ver un a ver je er a̱ zenden a vese imôngo sha tom u dooshima ne u se lu eren u sha ci u iengem i Ter man sha u tesen iko i wan yase kpaa.

²⁰Se mba palegh sha u i̱ de teren se sha kwagh u zegeiwua u se lu eren tom sha mi ne ga.

²¹Gadia se mba veren ishima sha akaa a dedoo la, ka sha ishigh ki Ter tseegh ga, kpa ka sha ishigh ki iorov kpaa.

²²Anmgbian wase u se kar un sha akaa kpishi se nenge er a lu a ishimaveren la kpaa, se tindi un a ve imôngo man hegen a hemba veren ishima cii sha ci u a ne ne jighjigh yô.

²³Titu yô, ka ijende yam man shi ikarem u tom sha ci wen, anmgbianev asev mban yô, ka mbatyomov mba iniongo i Kristu tindi ve sha ci u iengem i Kristu yô.

²⁴Nahan yô tese nen ve ikav i dooshima wen kua ihagh i se te ven la sha ishigh ki iniongo i Kristu kpaa.