Read tiv Mbagalatia 4 Bible Online

Mbagalatia 4 - tiv bible

Mbagalatia 4

¹Kpa m ngu kaan mer sha ayange a or u yan dyako nan lu iyev la yô, nan ngu kposo a kpan ga, shin er nan lu ter u akaa cii nahan kpaa.

²Nan ngu sha ikev i ior mba nengen sha nan kua mbakuran zan zan ar sha shighe u ter u nan, nan vande veren la.

³Kape se kpaa zum u se lu iyev la yô, se lu sha ikev i ujijingi mba taregh mba hiihii la er ka ikpan nahan.

⁴Kpa er shighe va kuma vough yô, Aôndo tindi Wan Na, kwase va mar Un, i mar Un sha ikev i tindi,

⁵sha u Una paa mba ve lu sha ikev i tindi, sha u se̱ zua a mrumun u i rumun se se lu ônov la.

⁶Man sha ci u ne lu ônov yô, Aôndo tindi Jijingi u Wan Na ken asema a en, ngu genger imo er: Aba, Tere.

⁷Nahan yô, u kera ngu kpan ga, u ngu wan je. Man aluer u ngu wan je yô, u ngu or u yan dyako ken Aôndo kpaa.

⁸Kpa hen shighe u ne lu a fa Aôndo ga la, ne lu sha ikev i akaa a, sha inja i a, a lu mbaaôndo ga yô.

⁹Kpa hegen er ne va fe Aôndo yô, shin guda er ne va lu mba Aôndo A fe ne yô, hii nan man shi ne lu hiden hen ujijingi mba ikoogh ga mbagban kera tsung la, shi i lu saren ne u shi hiden sha ikev ve er ka ikpan nahana?

¹⁰Ne mba kor ayange man iwer man ashighe kua anyom.

¹¹M ngu cian mer, alaghga m er tom ker a ven, lu gbilin tsô.

¹²M ngu zamber a ven anmgbianev av, hingir nen er mo nahan, gadia mo kpaa m hingir er ne nahan. Ne nzughul a mo mayange ga.

¹³Ne fa, lu sha ci u angev mbu ken iyol man m ôr ne Loho u Dedoo sha hiihii ye.

¹⁴Shin er kwagh u ken iyol yam la a hingir ne ikaren kpaa, ne laha ga, ne gema ijime kpaa ga, ne nyôr a mo er ka ortyom u Aôndo, er ka Kristu Yesu nahan je.

¹⁵Msaan u i saan ne iyol hen shighe la yô, ngu han ahegene? Gadia m ngu eren shiada sha a ven mer, aluer nea fatyô yô, yan ma ne tsuwa ashe a en ma ne nam.

¹⁶Nahan m gema m hingir orihom wen er m lu ôron ne kwagh u mimi yôô?

¹⁷Ka ve nôngo kwagh sha ci wen ngegh kpa ka sha gbenda u mimi ga, sar ve pe gbihin ne ken won sha u ma ne nenge kwagh sha ci ve tsung yô.

¹⁸U nôngon sha kwagh u dedoo tsung gbem yô, doo, kpa i̱ de luun sha shighe u ka m lu a ven imôngo la tseegh ga.

¹⁹Mbayev av, m shi m ngu toghor mar wen zan zan á va jile Kristu ken a ven.

²⁰Hangem pe ma m lu a ven hegen, ma m er kwagh a ven sha imo i bem, gadia m ngu yan ican ken ishima sha kwagh wen.

²¹Kaam nen ase yôô, ne mba i sar ne pe lun sha ikev i atindi yô, ne mba ungwan kwagh u atindi a kaa la gaa?

²²Gadia i nger er, Aberaham lu a ônov uhar. U môm yô, i mar un a kpankwase, ugen yô, i mar un a kwase jim.

²³U ken kpankwase la yô, i mar un, sha inja i iyolough, kpa u ken kwase jim la yô, i mar un sha ityendezwa.

²⁴Kwagh ne ka ikav. Kasev mba uhar mbala ka uikurmbayan mba uhar. U môm ka u hen uwo u Senai, ngu maren ikpan, ka Hagar je la.

²⁵Hagar ka uwo u Senai u ken tar u Arabia la, ngu tesen ikav sha Yerusalem u ainge. Ngu ken kpan a ônov nav.

²⁶Kpa Yerusalem u Sha ngu ken kpan ga, ka ngô wase je la.

²⁷Gadia i nger er: Ember, we ikômkwase u maren ga ne, Ngor ikenge, nande imo, we u u toghor mar ga ne. Gadia ônov mba kwase u a lu tseeneke la, hemba ngeen a ônov mba kwase u lun a nom la.

²⁸Nahan anmgbianev, se yô, se mba ônov mba ityendezwa er Isaka nahan.

²⁹Kpa er un u i mar un sha inja i iyolough a lu tôvon u i mar un sha inja i Jijingi la a ican sha shighe la yô, kape hegen kpaa i lu je ne.

³⁰Kpa icighanruamabera kaa nana? Zenda kpankwase kua wan na, wan u kpankwase a̱ de ye dyako vea wan u kwase u a lu kwase jim la imôngo mayange ga.

³¹Nahan yô, anmgbianev, se mba ônov mba kpankwase ga, kpa ka ônov mba kwase jim je.