Read tiv Mbagalatia 5 Bible Online

Mbagalatia 5 - tiv bible

Mbagalatia 5

¹Ka sha u se̱ de luun ken uikangen ga, man Kristu pase se tuhwa ye. Nahan yô, tile nen dông, i̱ de kera shi wan ne igbur i ikpan ga.

²Nenge, mo Paulu, me kaa ne, aluer ne tsôngo yô, Kristu Una kera lu ne a inja sha ma kwagh ga.

³M ngu kimbir u eren hanma or u nana va tsôngo shiada mer, atindi ci ca cii kpaa ka u nana̱ kura keng.

⁴Mba ve lu keren ishô sha tindi yô, ve pav a pav a Kristu je ve, ve due ken mrumun u sha mhôôn kera kpaa.

⁵Kpa se yô, ka sha Jijingi kua sha jighjigh u nan man se lu keghen ishimaverenkeghen i perapera ye.

⁶Gadia ken Kristu Yesu yô, icôngo kera ngi a ma inja ga shin ipusu kpaa ga, saa di jighjigh u nan u a eren tom sha dooshima yô.

⁷Ne lu yevese dedoo; man ka an nan yange ne u ne kera ungwa imo i mimi la ga ase?

⁸Msendegh ngula due ken Un u A lu yilan ne la ga.

⁹Ankwa u kpeghee ka a zua sha ijenmwe cii.

¹⁰Sha kwagh wen yô, mo m fa ken Ter dedoo mer né va hen kposo a mo ga, kpa or u nan lu kenden ne asema sha la yô, nana ya mtsaha, a lu anti or kpaa.

¹¹Mo yô, anmgbianev, aluer mea lu yôôn kwagh u icôngo heregh yô, ka nyi man shi i lu tôvon mo a icana? A lu nahan yô, kwagh u nan anzughul sha terankon yum la, ma a kera lu ga.

¹²Mba ve lu tumbul a ven la yô, ma ve gbe tôndon ase ayol a ve tsô.

¹³Gadia ne yô, anmgbianev, i yila ne sha u ne̱ lu ken uikangen ga, kpa mlu wen u ne lu ken uikangen ga la yô, a̱ de hingir ityôikaa i iyolough ga, kpa eren nen ayol a en tom sha dooshima.

¹⁴Gadia atindi cii kure sha kwaghôron môm er: or u nan we ndor a we yô, nana̱ doo u ishima er we iyol you nahan.

¹⁵Kpa aluer ne nyuma ayol a en, ne ya ayol a en yô, ver nen ishima sha er né mena ayol a en ga yô.

¹⁶M ngu kaan mer, zende nen sha Jijingi nahan né kera eren sha asaren a iyolough ga.

¹⁷Gadia asaren a iyolough nga hendan a Jijingi, asaren a Jijingi di kpaa nga hendan a iyol, ve yô, mba hendan ayol a ve, nahan ne kera fatyô u eren akaa a i sar ne la ga.

¹⁸Kpa aluer ka Jijingi Una hemen ne yô, ne kera mba sha ikev i atindi ga.

¹⁹Gadia aeren a iyolough nga ken igbar je, ka idya man hôngor man ijimba i eren,

²⁰man u civir akombo man ahir a eren man ihom i kôron man iyongo i keren man iwuhe man ishima i nyoon man u wan iyol you iko tseegh, man u hendan akaa, man mbampav,

²¹man mtôm man ihundugh ki msôrough man ugurgurmbaakaav kua ambaakaa ne cii. M ngu wan ne kwagh er m vande wan ne kwagh mer, mba ve eren ambaakaa ne yô, vea ya dyako u tartor u Aôndo ga.

²²Kpa ityamegh ki Jijingi yô, ka dooshima man msaanyol man bem man ishima i wan man sar sar man mlu u dedoo man jighjigh

²³man ishima i legh legh man u kôron iyol tsaha. Anzaakaa ne yô, tindi yange a ga.

²⁴Mba ve lu mba Kristu Yesu yô, ve mande iyol a ishima i kenden kua asaren a i sha terankon imôngo ve.

²⁵Aluer se lu uma sha Jijingi yô, shi sé zenden nen sha Jijingi kpaa.

²⁶Se̱ de kera tan ihagh sha ayol a ase ga, shi se̱ de vemben ayol a ase man se̱ de eren iwuhe ayol a ase kpaa ga.