Read tiv Mbaefese 4 Bible Online

Mbaefese 4 - tiv bible

Mbaefese 4

¹Mo orkwar u ken Ter ne, m ngu wan ne kwagh mer, zende nen zende u u kom sha myer u i yila ne la,

²a iyolgengese ga, man a ishima i legh legh, man a ishima i wan kpaa, kundu nen asema a ayol a en sha dooshima.

³Nôngon nen tsung u kuran mzough u ken Jijingi sha mkange u bem.

⁴Iyol ngi môm, Jijingi kpaa ngu môm di er i yila ne sha ishimaverenkeghen môm i sha myer wen la nahan.

⁵Ter ngu môm, jighjigh u nan kpaa ngu môm, batisema kpaa môm,

⁶Aôndo kpaa ngu môm, ka Ter u uuma cii. A tav A kar uuma sha cii, man ngu eren kwagh ken uuma cii man ngu lun ken uuma cii kpaa.

⁷Kpa i na hanmô wase mrumun u sha mhôôn ser ser sha kwar u Kristu A lu karen yô.

⁸Ka nahan man A kaa er: Zum u A kôndo sha yô, A kua a mbakwarev, A yem a ve, man A na ior uiwua kpaa.

⁹Ape i kaa er: “A kôndo” la, inja na nana saa di Una vande senen shin ajiir a zan a masen shin, a shin tar laa?

¹⁰Un u A sen la, shi ka Un je A kôndo sha, A kar Usha cii sha u Una iv akaa cii.

¹¹Ka Un je A ne mbagenev ve lu mbaapostoli, mbagenev yô, ka uprofeti mbagenev ka mbaivangeli, mbagenev ka mbakuran man mbatesen.

¹²Ka sha u nan uicighanmbaiorov ve̱ kuma sha tom u eren, sha u maan iyol i Kristu,

¹³zan zan se cii sé va kuma sha mzough u ken jighjigh u nan, man mfe u fan Wan u Aôndo man sha mlu u igandenor man ikaren i mluyol u m-iv u Kristu la.

¹⁴Ka nahan man sé kera lu mbayev mba ka i daase a ve i yem a ve wue wue sha ahumbe a ityesen, sha atseregh a ior, sha mtsugh u tsughun ior tsumen a ve sha wayo la ga ye.

¹⁵Kpa er se luun ken mimi sha dooshima yô, sé vesen sha akaa cii ken Un u A lu ityough, ka Kristu je la.

¹⁶Ka ken a Na man iyol cii er i magh i, i zua i sha iwasen i hanma ijuan i i lu ker yô, sha tom u hanma ilyeegh ki lu eren sha inja i ki la, i lu vesen i lu maan iyol i i ken dooshima ye.

¹⁷M ngu ôron kwagh ne ken Ter m ngu eren shiada mer, mayange de kera zenden nen er atôatyev a zenden sha mhen ve u gbilinigh la nahan ga.

¹⁸Mfe ve la wa ime, mba paleghaa a uma u Aôndo, sha ci u lanegh ku ku lu ken ve sha asema ve a cighir la.

¹⁹Asema a ve wa akpema, ve na ayol a ve sha ijimba i eren sha u keren hanma kwagh u hôngorough sha hua.

²⁰Kpa ne yô, i tese ne kwagh u Kristu nahan ga,

²¹gayô ne ungwa kwagh Na shi i tese ne ken a Na er mimi a lu ken Yesu je yô.

²²Er nen tseor la kera u a lu sha inja i zende u tsuaa la, u a vihi kera sha asaren a icughugh la.

²³Hingir nen hegh ken jijingi u mhen wen,

²⁴man haa nen orhe iyol u i gbe un sha inja i Aôndo ken perapera u mimi man mtsegh u mimi.

²⁵Nahan yô, dugh nen aie kera, hanma or nana̱ ôron kwagh sha mimi a or u nan we ndor a nan yô gadia se mba alegh ayol a ase.

²⁶Nyoon nen ishima, kpa de eren nen isholibo ga, iyange i̱ de been ne a ishima i vihin her ga.

²⁷De ne nen diabolo ian ga.

²⁸Or u iin nana̱ de kera shi iin ga, kpa guda yô, nana̱ nôngo tsung, nana̱ er tom u mimi sha ave a nan, tsô nana lu a kwagh u panden nan orgen u kwagh a gbe nan yô.

²⁹Ma kwaghôron u dang a̱ de dugh ken zwa wen ga, saa di u doon u una fatyô u maan a maa kwagh ape kwagh a gbe sha mi yô, nahan mba vea ungwa kpaa vea zua a mrumun u sha mhôôn.

³⁰De vihin nen Icighan Jijingi u Aôndo ishima ga u i ver ne ikav sha a Na sha ci u iyange i mpaa la.

³¹Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera kua hanma inja i dang kpaa.

³²Kpa lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan.