Read tiv Mbaefese 5 Bible Online

Mbaefese 5 - tiv bible

Mbaefese 5

¹Nahan yô, lu nen mbakaven Aôndo er ônov mba doon ishima nahan.

²Man zenden nen ken dooshima, er Kristu kpaa se doo Un ishima man A na iyol Na sha ci wase nahan, lu nagh ku nanden man nagh ku sôngon nan Aôndo sha ci u ihuma i doon.

³Kpa idya man hanma inja i hôngorough kua hua u eren yô, u teren tsô kpaa, de teren her a ven ga er i kom uicighanmbaiorov yô.

⁴Hwanger man kwaghôron u sha beer man asenge a doon ga la cii, a̱ de luun ken ven ga, guda yô, i̱ lu iwuese.

⁵Kwagh ne a̱ wanger ne dedoo, hanma or u idya shin or u hwangeregh shin or u hua, ka or u civir akombo je la, nan ngu a dyako ken tartor u Kristu man u Aôndo la je ga.

⁶Ma or nana̱ de kera bumen ne sha akaaôron a gbilinigh ga. Ka sha ci u akaa angan ne man iyugh i Aôndo i lu van sha ônov mba ihembeato ye.

⁷Nahan de nyer nen nongo a ve je ga.

⁸Tsuaa la yô, ne lu ime kpa hegen yô, ne mba iwanger ken Ter, zende nen er ônov mba iwangerev nahan.

⁹Gadia ityamegh ki iwangeregh yô, ki ken hanma kwagh u doon, man kwagh u perapera man kwagh u mimi cii.

¹⁰Karen nen faan nen kwagh u a doo Ter ishima yô.

¹¹Man de nyer nen nongo a aeren a imegh a a lu a inja ga la ze, kpa guda yô, pase nen a ken igbar.

¹²Akaa a ve eren myer la, kunya kôr u ôron a je.

¹³Hanma kwagh u iwanger i pase un yô, ka a due ken igbar, gadia hanma kwagh u a lu ken igbar yô, ka iwanger je.

¹⁴Ka nahan man i kaa er: Nder, we u u yav ne, mough shin mbakpenev, man Kristu Una ta iwanger sha a we bong ye.

¹⁵Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan.

¹⁶Man waan nen ian yen iko, gadia ayange ne ka a bo je.

¹⁷De luun nen mbabumen ga, kpa kav nen er ishima i Ter i lu yô.

¹⁸De hundu nen msôrom ga, dang ngu keregh, kpa iv nen a Jijingi.

¹⁹Ôron nen kwagh ayol a en sha upasalami man atsam man amo a gberen a ken jijingi, man dugh nen amo, waan nen Ter atsam ken asema a en.

²⁰Sughun nen Aôndo Ter hanma shighe sha akaa cii ken iti i Ter wase Yesu Kristu.

²¹Ungwan nen ayol a en sha ci u cian Kristu.

²²Kasev, ungwan nen imo i noov enev er ka Ter nahan.

²³Gadia nom ka ityough ki kwase di er Kristu kpaa A lu ityough ki nongo Na nahan man ka Un je A lu Oryiman u iyol Na la kpaa ye.

²⁴Nahan er nongo u Kristu u lu ungwan imo i Kristu yô, kape kasev kpaa, ve̱ ungwa imo i noov vev ken akaa cii je la.

²⁵Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan,

²⁶sha u Una tsegha u er A wanger u sha m-ee u A ôô u sha mnger sha kwaghôron Na,

²⁷sha u Una ver nongo Na sha ishigh Nagh, u̱ engem u̱ de kera lu a ahuar shin adivir shin mô u ken ambaakaa la kpaa ga, kpa u̱ lu ken mtsegh, u̱ de lu a acôghol iyol ga.

²⁸Kape noov kpaa, kasev vev ve̱ doo ve ishima keng er ayol a ve nahan la. Or u kwase u nan a doo nan ishima yô, ka iyol i nan je i doo nan ishima ye.

²⁹Gadia mayange ma or nana kôr iyol i nan ihom ga kpa nan koson i shi nan kor i kpaa di er Kristu kpaa A eren a nongo na Nahan,

³⁰gadia se mba alegh a Na.

³¹Sha ci u nahan yô, or nana undu ter u nan kua ngô u nan, nana gema nana var a kwase u nan man ve uhar yô, vea lu iyôgh i môm je.

³²Kwagh u myer ne vese tsô kpa m ngu ôron ka sha Kristu man sha nongo Na.

³³Nahan ne kpaa, hanma or kwase u nan a̱ doo nan ishima er iyol i nan nahan, kwase kpaa, a̱ cia nom u nan.