Read tiv Mbakolose 1 Bible Online

Mbakolose 1 - tiv bible

Mbakolose 1

¹Paulu apostoli u Kristu Yesu u sha ishima i Aôndo man Timoteu anmgbian

²mba sughun anmgbianev mba ken Kristu mba ken Kolose mba ve lu uicighanmbaiorov shi ve lu mbananjighjigh kpaa la. Mrumun u sha mhôôn a̱ lu sha a ven kua bem kpaa, mba ve dugh her Aôndo Ter wase.

³Se mba sughun Aôndo Ter u Ter wase Yesu Kristu sha ci wen gbem zum u ka sea eren msen sha ci wen yô;

⁴gadia se ungwa kwagh u jighjigh wen u nan u ken Kristu Yesu la man shi dooshima u uicighanmbaiorov cii ve doo ne asema

⁵sha ci u ishimaverenkeghen i i koso Sha sha ci wen la. Ne vande ungwan kwagh u i sha kwaghôron u mimi u Loho u Dedoo la.

⁶U nyôr ken ven di er u nyer sha won cii nahan, ngu umen atam, ngu vesen di er ken ven nahan, hii sha iyange i ne ungwa man ne va fa mrumun u sha mhôôn u Aôndo sha mimi la.

⁷Kape i tese ne sha ikev i Epafera or u eren tom a vese imôngo u doon ishima la. Un ka ortom u jighjigh u Kristu sha ci wen.

⁸Shi ka un kpaa a pase se dooshima wen u ken Jijingi la ye.

⁹Sha ci u nahan yô, hii sha iyange i se ungwa kwagh la je se kera mem u eren msen man shi u zamber sha ci wen ga, ser ma i iv ne a mfe u fan ishima Na sha kwaghfan cii man mkav u ken jijingi kpaa,

¹⁰sha u ne̱ zende zende u u kom Ter, ne̱ doon Un ken akaa cii, ne̱ umen atam ken hanma tom u dedoo, shi ne̱ vesen ken kwaghfan u Aôndo,

¹¹i̱ taver ne sha agee cii sha inja i agee a iengem Na la sha u taver ishima man shi u wan ishima saan saan kpaa,

¹²ne̱ sugh Ter u A na ne ne kuma u lun a kwar ken dyako u uicighanmbaiorov ken iwanger.

¹³A yima se A due a vese ken tahav mbu imev kera A nyôr a vese ken tartor u Wan Na u doon ishima.

¹⁴Ka ken a Na man se lu a mpaa ye, ka mde u asorabo je la.

¹⁵Un ka ibeen i Aôndo u i nengen a Na ga la, ka Waniunda ken akaa a i gbe a cii,

¹⁶gadia ka ken a Na man i gbe akaa cii ye, a a lu Sha, man a a lu shin tar kpaa, a i nengen a mi la kua a i nengen a mi ga la kpaa, shin a lu mkônom ma torom, shin a lu tor u yan shin a lu mbatarev, shin a lu tahav. Akaa ne cii ka sha a Na i gbe a ye shi ka sha ci Na kpaa.

¹⁷Un vande a akaa cii man ka ken Na a lu zan hemen her ye.

¹⁸Ka Un kpaa A lu ityough ki iyolough ye, ka nongo u Kristu je la. Ka Un A lu mhii ye, ka Waniunda u ken mbakpenev, sha er Un Una lu u hiihii ken akaa cii yô.

¹⁹Gadia doo m-iv u Aôndo cii u teman ken a Na je.

²⁰Man er A va a bem sha awambe a sha terankon Na la yô, lu sha a Na je man Aôndo hime akaa cii a iyol Na ye, akaa a a lu shin tar man akaa a a lu Sha kpaa.

²¹Man ne mba ngise ne lu paleghaa, ne lu mbaihomov ken mhen wen sha aeren a bo la, ne kpaa

²²A hime ne sha iyol Na i inyam la sha ku, sha u Una ver ne sha ishigh Nagh, né lu icighan man wang man a acôghol iyol ga.

²³Saa né tile sha jighjigh u nan dông, né tenger ga, man á mgbeghan ne sha ishimaverenkeghen i Loho u Dedoo u ne ungwa la kera kpaa ga, u i yôô u hen akaa a i gbe a sha won cii, man mo, Paulu, m hingir ortom u u.

²⁴Hegen yô, m ngu ken atsan a m lu yan sha ci wen man m ngu ivin kwagh u a shi sha atsan a Kristu la ken iyol yam, ka sha ci u iyol Na, ka nongo Na je la.

²⁵M hingir ortom u u sha tom u Aôndo A nem sha u ivin kwaghôron u Aôndo ken a ven.

²⁶Ka kwaghmyer u a lu myer hii sha shighe u shighe lu a lu ga man ikov i ior kpaa lu a lu ga la, kpa hegen yô, i pase uicighan Nav kwagh la.

²⁷Ka ve mba i sar Aôndo pe ve̱ fa er iengem i ngeen yum i kwaghmyer ne i lu ken atôatyev yô. Inja na yô, ka Kristu ken a ven je la, ka ishimaveren keghen iengem la.

²⁸Ka Un se lu yôôn kwagh Na, se lu wan ior cii kwagh, se lu tesen ior cii sha hanma kwaghfan ye, sha u veren hanma or nana̱ lu vough ken Kristu yô.

²⁹Ka sha kwagh ne je m lu eren tom, m lu nôngon ngegh sha ieren Na i A eren ken mo sha agee la.