Read tiv 1 Mbatesalonika 4 Bible Online

1 Mbatesalonika 4 - tiv bible

1 Mbatesalonika 4

¹Nahan hegen yô, anmgbianev, se mba zamber a ven shi se mba taver ne asema ken Ter Yesu, er ne ungwa hen vese er i doo u né zende man á doo Aôndo yô, kape ne lu zenden kpaa la shi yemen nen hemen sha mi kpaa.

²Gadia ne fa akaa a se wa ne sha imo i Ter Yesu.

³Gadia ishima i Aôndo yô, ka i ne, ka mtsegh wen; nyagh nen idya.

⁴Hanma or ker a ven nana̱ fa er nana er kwase u nan iyol i nan sha icighanmlu man iko i wan kpaa.

⁵I̱ de luun sha ishima i kenden i isharen i bo er atôatyev a a fe Aôndo ga la nahan ze.

⁶Ma or môm nana̱ de kera tsughun anmgbian u nan sha kwagh ne, nana̱ eren nan kwagh u vihin ga, gadia Ter ka u oron iyev sha akaa ne cii er se vande kaan ne shi se pase ne nahan kpaa.

⁷Gadia Aôndo yila se ka sha ci u hwanger ga kpa ka sha icighanmlu je.

⁸Nahan yô, or u nan vende kwagh ne yô, kera ka or nan vende ga, kpa ka Aôndo je u A ne ne Icighan Jijingi Na yô.

⁹Sha kwagh u dooshima a anmgbianev yô, kera gba u á nger ne ga, gadia ne ayol a en kpaa, Aôndo tese ne u doon ayol a en.

¹⁰Man kape ne lu eren a anmgbianev mba ve lu ken Masedonia cii kpaa la, kpa se mba taver ne asema, anmgbianev, shi yemen nen hemen sha mi.

¹¹Nôngo nen ngegh je sha u teman ving, lu nen sha kwagh wen ayol a en, eren nen tom sha ave a en er lu se wa ne kwagh nahan,

¹²sha u né zende vough hen mba ve lu ken inya la, man shi ma kwagh môm a̱ de banen ne ga yô.

¹³Kpa, anmgbianev, sar se ka ma ne lan kwagh u mba ve kpe kera la ga, sha u ne̱ de kera zungwen er mbagenev mba ve lu a ishimaverenkeghen ga la nahan ga.

¹⁴Aluer se na jighjigh ser, Yesu kpe, shi hide nder yô, kape mba ve kpe ken Yesu la kpaa, Aôndo Una va a ve a Na imôngo.

¹⁵Gadia kwagh ne yô, se mba kaan ne un ka sha imo i Ter je ser: se mba se lu uma, se lu her zan zan m-ande u Ter yô, sé vande a mba ve kpe kera la je ga.

¹⁶Gadia Ter iyol Na Una sen Sha sha ikenge i kaan, sha imo i ortyom u tamen, sha mkaa u ikpamkor i Aôndo, tsô mba ve kpe ken Kristu la vea vande nderen.

¹⁷Ken masejime, se mba se lu uma, se lu her la, á feese se a ve imôngo sha abeen, sé za kohol Ter sha kwavaôndo. Kape sé za lu a Ter gbem je la.

¹⁸Nahan yô, sur nen ayol a en asema sha akaaôron ne.