Read tiv Yosua 14 Bible Online

Yosua 14 - tiv bible

Yosua 14

¹Mban ka udyako mba Mbaiserael ya ken tar u Kanaan, mba pristi Eleasar man Yosua wan u Nun, man mbavesen mba uya mba uter mba ikwe i Mbaiserael kar ve

²sha ishor i eren, hingir dyako ve ne, sha imo i TER kaa Mose, Mose gema ôr ve la, sha ci u ikwe i itiankarinyiin man vegherkwe la.

³Gadia Mose vande nan ikwe ihiar man vegherkwe la dyako ve yande Yordan; kpa Mbalevi yô, a na ve ma dyako ga.

⁴Gadia ônov mba Yosev lu ikwe ihiar, Manase man Eferaim; Mbalevi yô, i na ve ma kwar ken tar la ga, saa di agar a vea tema ker tsô, kua akôngo a a sha ci u ilev vev kua inyarev vev cii.

⁵Er TER kaa a Mose nahan, kape Mbaiserael er je la, ve kar tar la.

⁶Tsô ônov mba Yuda va hen Yosua hen Gilgal; nahan Kalebu wan u Yefune Orkenishi kaa a na er: U fa kwagh u TER lu kaa a Mose, or u Aôndo, sha a mo vea we hen Kadeshi-barnea la.

⁷M lu anyom akunduahar zum u Mose wanakiriki u TER tindim, m mough hen Kadeshi-barnea sha u za nengen tar la mker; tsô m hide un a kwaghôron u a lum ken ishima yô.

⁸Nahan kpaa anmgbianev av mba ve kôndo a mo imôngo ve na ior iyol i kpen; kpa mo yô, m ver ishima sha TER, Aôndo wam, jighilii.

⁹Tsô Mose bum sha iyange la je kaa er: Mimi je, tar u u zende sha mi la ua hingir dyako wou a ônov ou gbem, sha er u ver ishima sha TER, Aôndo wam, jighilii yô.

¹⁰Hegen yô, nenge, TER dem, m ngu her uma er A kaa yô. Ka anyom akunduahar kar ataan, hii hen shighe u TER ôr kwagh ne a Mose, zum u Iserael lu zenden ken desereti la; man nenge, hegen yô, anyom am ka akunduanyiin kar ataan je ne.

¹¹Nahan kpaa m ngu a agee iyol her er iyange i Mose tindim la nahan; er agee am lu hen shighe la kape hegen kpaa a lu ne, sha u nôngon ityav man sha u duen man u nyôron.

¹²Hegen yô, nan uwo ne, u TER ôr kwagh u u sha iyange la, gadia sha iyange la je u ungwa er Mbaanaki lu ker yô, man agar a vesen a lun a ugir je; alaghga TER Una lu a mo, me zenda ve kera er TER A kaa yô.

¹³Tsô Yosua ver un doo doo, a gema Heberon a na Kalebu wan u Yefune, er a lu dyako na.

¹⁴Tsô Heberon hingir dyako u Kalebu wan u Yefune Orkenishi zan zan nyian, sha ci u a ver ishima sha TER, Aôndo u Iserael, jighilii yô.

¹⁵Kpa iti i Heberon tsuaa yô, er, Kiriati-arba; Arba lu orvesen ken Mbaanaki cii. Tar la maa mem ityav.