Read tiv Yosua 18 Bible Online

Yosua 18 - tiv bible

Yosua 18

¹Tsô mkohol u Mbaiserael cii zua hen Shilo, ve tim tenti u kohol ker heregh; tar hingir sha ikev ve.

²Ken Mbaiserael shi ikwe itiankarihiar i i lu a kar dyako u i ga yô.

³Tsô Yosua kaa a Mbaiserael er: Ka hanma shighe je man né de hwev né za ngohol tar u TER, Aôndo u uter enev, A ne ne?

⁴Ver nen ior utar utar sha hanma kwe, nahan me tindi ve, ve̱ mough ve̱ zende ken tar cii, ve̱ nger mlu u u sha dyako ve, man ve̱ hide ve̱ va her a mo.

⁵Ve̱ kar u avegher ataankarahar; Yuda una tema ken tar na, vegher u ken imbusutariyan, ya u Yosev kpaa una tema ken tar na, vegher u ken imbusutarimese.

⁶Pav nen tar atôôn ataankarahar, nger, va nen a mi her a mo; yô, me er ne ishol sha mi sha ishigh ki TER, Aôndo wase.

⁷Mbalevi mba a ma ci ken a ven ga, gadia ka tom u pristi u TER u lu dyako ve ye; Gadi man Ruben man vegherkwe u Manase yô, ve vande ngohol dyako ve yande Yordan vegher u sha ityoughkitaregh, u Mose wanakiriki u TER na ve la.

⁸Tsô ior mbala mough za; mba ve za sha u ngeren mlu u tar la, Yosua kaa a ve er: Za, za zende nen ken tar la, nger nen mlu u u, shi hide nen her a mo; yô, me er ne ishol sha mi sha ishigh ki TER hen Shilo.

⁹Nahan ior mbala za za kar her atô u tar la, ve nger mlu u u ken takerada sha mlu u agar a u, ve pav u avegher ataankarahar; tsô ve va hen Yosua hen afo ken Shilo.

¹⁰Yosua er ve ishol sha ishigh ki TER hen Shilo; ka heregh je Yosua kar Mbaiserael tar la sha uipaven vev ye.

¹¹Kwar u kwe u Mbabenyamin gba sha icombor ve, ipaven u ishol i tese ve yô, lu hen atô u ônov mba Yuda man ônov mba Yosev.

¹²Ikighirtar ve, vegher u ken imbusutarimese la, hii hen Yordan je; ikighir la kôndo za unde sha ikooso-woogh i Yeriko vegher u ken imbusutarimese, kôndo kar tar u iwoogh yem vegher u shin ityôtar, za kure ken desereti u Bete-aven.

¹³Keela yô, ikighir yem hen ian i Lushi zan zan za ar hen ikooso-woogh i Lushi (ka Betel je la) vegher u ken imbusutariyan; ikighir la sen za ar hen Ataroti-adar, tera sha uwo u u lu Bete-horon u shin vegher u ken imbusutariyan la.

¹⁴Ikighir gese hurugh ken ian i vegher u shin ityôtar yem ken imbusutariyan, hen uwo u u ver ishigh sha Bete-horon vegher u ken imbusutariyan la; i za kure hen Kiriati-baal (ka Kiriati-yearim je la), ka gar u ônov mba Yuda; ingin ka ikighir na i ken vegher u shin ityôtar.

¹⁵Ikighir i ken vegher u imbusutariyan hii hen pe Kiriati-yearim a kur la, gema ver ishigh shin ityôtar, kar za ar shin amboramnger a Nefetoa;

¹⁶ikighir la sen za ar shin mkur u uwo u u lu sha ishigh ki pev u wan u Hinom u a lu shin pev u Rafaim vegher u ken imbusutarimese la; i sen i za ar shin pev u Hinom hen ikooso-woogh u Mbayebushi Vegher u ken imbusutariyan la, i sen i za ar shin En-rogel;

¹⁷i kar vegher u ken imbusutarimese za ar hen En-shemese, i kar i za ar hen Geli-loti u a lu sha ishigh ki mkende u Adumim la, kar sen za ar hen iwen i Bohan wan u Ruben;

¹⁸i kar hen ikooso-woogh sha ishigh ki Araba vegher u ken imbusutarimese la, kar sen za ar shin Araba;

¹⁹ikighir la kar hen ikooso-woogh u Bete-hogela vegher u ken imbusutarimese, za kure hen zongough ku Zegemnger u Bar, ku ku lu vegher u imbusutarimese la, hen iasegh i Yordan vegher u ken imbusutariyan.

²⁰Yordan lu ikighir i u, vegher u sha ityoughkitaregh. Ka dyako u ônov mba Benyamin je la, sha akighir a na cii ningir tser, sha icombor ve.

²¹Agar a kwe u ônov mba Benyamin sha icombor ve yô, lu Yeriko man Bete-hogela man Emeki-keshise

²²man Bete-araba man Semaraim man Betel

²³man Avim man Para man Ofera

²⁴man Kefaramoni man Ofeni man Geba; agar pue kar ahar kua agar a kiriki a a kase a la;

²⁵Gibeon man Rama man Beeroti

²⁶man Misepe man Kefira man Mosa,

²⁷man Rekem man Irpeel man Tarala

²⁸man Sela man Ha-elev man Yebushi (ka Yerusalem je la), man Gibeati kua Kiriati; ka agar pue kar anyiin je la, kua agar a kiriki a a kase a la. Ngun ka dyako u ônov mba Benyamin sha icombor ve.