Read tiv Yosua 6 Bible Online

Yosua 6 - tiv bible

Yosua 6

¹Yô, Yeriko wuhe ihinda gbong gbong sha ci u Mbaiserael; ma or due ga, ma or nyôr kpaa ga.

²TER kaa a Yosua er: Nenge, M na Yeriko a tor na kua anomaior a utya a na sha ikev you.

³Ningir nen gar la, mbautyav cii; ningir nen gar kwa môm; er nen nahan ayange ataratar.

⁴Upristi utaankaruhar ve̱ tôô ikor i iyôngo i tôngon, ve̱ kar a mi sha hemen u areki; sha iyange i sha utaankaruhar la, ningir nen gar kwa taankaruhar, upristi mbala ve̱ tôngo ikor la.

⁵Tsô zum u vea tôngo ikoriyôngo tuee yô, man zum u né ungwa imo a ikor i tôngon yô, ior cii ve̱ genger imo, ve̱ gbidye ivaa taver taver, tsô gilgar una yôhôl, ior cii ve̱ nyôr hanma or nana̱ nyôr sha ishigh ki nan jighilii.

⁶Tsô Yosua, wan u Nun, yila upristi, kaa a ve er: Tôô nen areki u ikuryan, upristi utaankaruhar ve̱ tôô ikoriyôngo itiankarihiar, ve̱ hemen areki u TER.

⁷Shi a kaa ior er: Kar ningir nen gar, mbautyav ve̱ kar ve̱ hemen areki u TER.

⁸Tsô, shighe u Yosua ôr kwagh a ior yô, upristi utaankaruhar mba ve tôô ikoriyôngo sha ishigh ki TER la, ve kar sha hemen, ve tôngo ikor la, areki u ikuryan u TER dondo sha a ve.

⁹Mbautyav hemen upristi mba ve tôngo ikor la, mba ken ijime la dondo sha areki, upristi lu tôngon ikor zan.

¹⁰Tsô Yosua wa ior kwagh kaa er: De gbir nen ivaa ga, i̱ de ongo imo yen ga, ma kwaghôron kpaa a̱ de dugh ken zwa wen ga, saa iyange i me kaa a ven mer: Gbire nen ivaa la, man né gbire ivaa ye.

¹¹Tsô a na areki u TER ningir gar, a ningir kwa môm; tsô ve hide her afo, ve tsa her afo.

¹²Nahan Yosua mough pepe pepe, upristi kpaa tôô areki u TER.

¹³Upristi utaankaruhar mba ve tôô ikoriyôngo itiankarihiar ve hemen areki u TER la, ve lu tôngon ikor zan; mbautyav hemen; mba ken ijime dondo sha areki u TER, upristi lu tôngon ikor zan.

¹⁴Sha iyange i sha uhar la kpaa, ve ningir gar kwa môm man ve hide her afo ye; kape ve eren nahan zan zan ayange ataratar.

¹⁵Tsô, sha iyange i sha utaankaruhar la, ve mough dindee dindee, ve ningir gar er ve vande eren nahan kwa taankaruhar; ka sha iyange la tseegh ve ningir gar kwa taankaruhar ye.

¹⁶Tsô ka kom kwa taankaruhar, upristi mba ngur tôngo ikor la yô, Yosua kaa a ior er: Gbire nen ase ivaa, gadia TER na ne gar ne ve.

¹⁷Kpa gar ne yô, á tsegha un sha ci u TER, a akaa a lu kimi cii; saa Rahabi idyakwase ne tseegh, una lu uma ye, un kua mba ve lu a na ken ya cii, gadia un yer mbatyomov mba se tindi la.

¹⁸Ne kpaa kura nen iyol sha kwagh u i te icin sha mi la, i̱ de kera lu u zum u né tsegha un yô, né gema né tôô kwagh sha akaa a i te icin sha mi la ga; sha kwagh ne nea gema afo a Iserael aa hingir a ifan iyol, man né er a ican kpaa.

¹⁹Kpa azurfa man zenaria kua ikav mbi togula man mbi iyôôv cii, ka uicighanmbaakaav mba TER, á wa mbi sha inyaregh ki TER.

²⁰Tsô ior gbire ivaa, i tôngo ikor kpaa; zum u ior ungwa ikor la yô, ve gbire ivaa taver taver, gilgar yôhôl cii, haa inya; nahan ior nyôr ken gar, hanma or sha ishigh ki nan jighilii, ve ngohol gar la.

²¹Ve tim akaa a ken gar la sha zwa u sanker ca ca, nomso kua kasev, man mbayev kua ior mba been iyol, man ibua man iyôngo kua ujaki.

²²Tsô Yosua kaa a ior mba uhar mba ve nenge tar la mker er: Nyôr nen hen ya u idyakwase la, due nen a na kua mba ve lu mba nav cii, sha mbum u lu ne bum a na la.

²³Tsô mbayevikaior, mbamkerev mbala, ve nyôr ve due a Rahabi kua ter na man ngô na man anngôôv nav kua akaa a na cii; ve due a ior nav cii, ve va ver ken akôngoafogh a Iserael.

²⁴Ve nande gar kua akaa a lu kimi cii sha usu, saa azurfa man zenaria man ikav mbi togula kua mbi iyôôv tseegh, ve wa sha inyaregh ki ken iyou i TER ye.

²⁵Kpa Rahabi idyakwase la a ior mba ter na, kua akaa a na cii yô, Yosua de ve uma; un maa tema ken Iserael zan zan nyian, sha ci u a yer mbatyomov mba Yosua tindi sha u nengen Yeriko mker la.

²⁶Tsô Yosua ta ve icin sha mbum hen shighe la, a kaa er: Or u nana mough, sha u maan gar u Yeriko ne yô, ifan ia kôr nan sha ishigh ki TER. Ka sha ku u waniunda u nan je nana tim imagh nagh ye, shi ka sha ku u wan u nan u masetyô nana wa ihinda na ye.

²⁷Kape TER lu a Yosua la; gwa na samber ken tar la cii.