Read tiv Yosua 9 Bible Online

Yosua 9 - tiv bible

Yosua 9

¹Tsô zum u utor cii mba ve lu yande Yordan, sha tar u iwoogh man ken tar u pev, man hen kpe u zegemnger u tamen cii, sha ishigh ki Lebanon, ka Mbahiti man Mbaamor man Mbakanaan man Mbaperishi man Mbahivi man Mbayebushi, ve ungwa gwa yô,

²ve kohol ayol a ve sha u nôngon ityav a Yosua man Iserael a ishima i môm.

³Kpa zum u ior mba Gibeon ve ungwa kwagh u Yosua er a Yeriko kua Ai la yô,

⁴ve kôr ayom, ve za er er ve mba mbatyomov nahan; ve tôô aba a tse sha ujaki vev, man akpa a ikôv a wain a tse a anden a i cinge a kpaa,

⁵man akôv a tse a i sôr a gege kuma iyol, ve wa shin angahar, shi ve lu a akondo a tse iyol kpaa; bredi ve u yan gbenda cii uma, hingir akpoghol akpoghol.

⁶Ve za hen Yosua hen afo hen Gilgal, ve za kaa un kua ior mba Iserael er: Se yô, se due ken tar ugen u caa je; yô, ya nen ikur a vese.

⁷Tsô ior mba Iserael kaa a Mbahivi mbala er: Alaghga ijiir yen ngi hen atô wase, nahan sé er nan sé ya ikur a vene?

⁸Tsô ve kaa a Yosua er: Se mba ikpan you. Yosua kaa a ve er: Ne mba unô? Man ne due hana?

⁹Ve kaa a na er: Ka ken tar ugen u caa tsung je, ikpan you i za ve sha ci u iti i TER, Aôndo wou, ye, gadia se ungwa gwa u icivir Na, man akaa a A er ken tar u Igipiti la cii,

¹⁰kua akaa cii a A er utor mba uhar mba Mbaamor, mba ve lu yande Yordan la, ka Shihon tor u Heshebon kua Ogo tor u Bashan u a lu hen Ashetaroti la.

¹¹Mbatamen asev kua mba ve tem ken tar wase cii ve ôr kwagh a vese, ve kaa er: Tôô nen kwaghyan u yan gbenda, za kohol nen ve; yô, kaa nen ve ner: Se mba ikpan yen, yô, ya nen ase ikur a vese.

¹²Bredi wase ne iyange se tôô un acivin hen uya asev sha ci u kwaghyan u gbenda, sha iyange i se due sha u van hen a ven ne, nenge hegen a uma, hingir akpoghol akpoghol;

¹³akpa a wain ne kpaa yan se iv a la, lu a he je, nenge hegen a ande; akondo ase ne kpaa kua akôv a ase a hingir a been iyol sha ci u gôgôzende wase.

¹⁴Tsô ior pande kwaghyan ve u gbenda la, kpa ve pine ishima i TER ga.

¹⁵Tsô Yosua zua a ve, a ya ikur a ve kpaa er, una de ve uma; mbahemenev mba mkohol u ior kpaa bum a ve.

¹⁶Tsô ayange nga kar kera atar a ve ya ikur a ve la yô, ve ungwa er ve lu mbawanndor a ve je yô, shi ve tema hen atô ve kpaa.

¹⁷Nahan Mbaiserael mough, sha iyange i sha utar la ve ar hen agar a ve. Agar a ve yô, ka Gibeon man Kefira man Beeroti kua Kiriati-yearim.

¹⁸Mbaiserael ta num sha a ve ga, sha ci u mbahemenev mba mkohol u ior vande bumun TER, Aôndo u Iserael, a ve je yô, nahan ior cii gba hunan iker sha kwagh u mbahemenev la.

¹⁹Kpa mbahemenev cii kaa a ior er: Se vande bumun TER, Aôndo u Iserael, a ve je, nahan ahegen se fatyô u benden ve ave ga.

²⁰Kwagh u sé er a ve yô, sé de ve uma, sha er iyugh i̱ de kera ve sha a vese ga, sha ci u mbum u se bum a ve yô.

²¹Mbahemenev kaa a ve er: De ve, ve̱ lu uma; tsô ve hingir ior mba gberen ikon man mba kesen mngerem sha ci u mkohol u ior cii er mbahemenev vande ôron ve nahan.

²²Tsô Yosua kaa, i yila ve; a ôr kwagh a ve, a kaa er: Ka nyi ne tsugh se, ne kaa ner: Se mba a ven ca tsung je; man nenge, ka hen atô wase je ne lu ne gaa?

²³Hegen yô, ne mba a ifan iyol, né va de u lun ikpan man u gberen ikon man u kesen mngerem sha ci u iyou i Aôndo wam ga.

²⁴Ve gema ve kaa a Yosua er: I ôr ikpan you er TER, Aôndo wou, kaa a wanakiriki Na Mose er a̱ na ne tar ne cii kpee, né tim mba ve tem ken tar ne cii sha ishigh yenegh kera, nahan yô, se cia ne tsung sha ci u uuma asev, kape i lu man se er nahan ne.

²⁵Nenge hegen yô, se mba sha ikev you, kwagh u a doo u man a lu u vough u eren a vese yô, gba eren tsô.

²⁶Kape a er a ve la, a yima ve sha ikev i Mbaiserael er ve̱ de woo ve ga yô.

²⁷Sha iyange la je Yosua gema ve, ve hingir ior mba gberen ikon man mba kesen mngerem sha ci u mkohol u ior man sha ci u atse a TER a nanden nagh sha mi kpaa, hen ijiir i Una tsuwa yô, zan zan nyian.