Read tiv 2 Mbatesalonika 1 Bible Online

2 Mbatesalonika 1 - tiv bible

2 Mbatesalonika 1

¹Paulu man Siluanu man Timoteu mba sughun nongo u Kristu u Mbatesalonika u ken Aôndo Ter wase man Ter Yesu Kristu.

²Mrumun u sha mhôôn man bem mba ve dugh her Aôndo Ter man Ter Yesu Kristu, ve̱ lu sha a ven.

³Ka u sé sugh Aôndo ayange ayange sha ci wen, anmgbianev, er i doo u eren yô, gadia jighjigh wen u nan ngu seer je zua iyol ga, man dooshima u hanmô wen hen ayol a en kpaa ngu ngeen je,

⁴zan zan se ayol a ase kpaa se mba tan ihagh a ven ken iniongo i Kristu i Aôndo sha ishima yen i wan man jighjigh wen u nan ken mbamtev mba i lu tôvon ne a atsan man atsan a ne lu taver ishima sha mi la cii.

⁵Ka ikav i ijirôron i mimi i Aôndo i tesen er ne kuma tartor u Aôndo u ne lu yan ican sha ci u u la.

⁶Gadia ka Aôndo kwagh u vough u oron mba ve lu tôvon ne a ican la iyev eren ve ican.

⁷Man ne mba i eren ne ican yô, Una na ne mmem a vese imôngo sha mpase u á va pase Ter Yesu Sha, a mbatyomov Nav mba ageev imôngo

⁸ken igyamusu; Una tsaha mba ve fe Aôndo ga man shi mba ve we Loho u Dedoo u Ter wase Yesu iko ga la kpaa.

⁹Vea ya mtsaha u mtim u tsôron, vea lu ica a ishigh ki Ter man iengem i agee a Na,

¹⁰zum u Una va sha iyange la sha u á civir Un ken uicighan Nav man á kpiligh ior iyol a Na ken mba ve ne jighjigh la cii; gadia ne na mpase wase la jighjigh.

¹¹Ka nahan man se lu eren msen sha ci wen gbem ye, sha er Aôndo A̱ nenge ne er ne kuma myer u i yila ne la man A̱ gema hanma isharen i sha kwagh u dedoo man hanma tom u sha jighjigh u nan sha agee, ve̱ lu vough,

¹²sha u á civir iti i Ter wase Yesu Kristu ken a ven, ne di kpaa i̱ civir ne ken a Na, sha injamlu i mrumun u sha mhôôn u Aôndo wase man Ter Yesu Kristu.