Read tiv 2 Mbatesalonika 2 Bible Online

2 Mbatesalonika 2 - tiv bible

2 Mbatesalonika 2

¹Se mba zamber a ven, anmgbianev, sha kwagh u m-ande u Ter wase Yesu Kristu man mkohol wase u sé va kohol a Na imôngo la,

²i̱ de kenden ne asema gagh ga, asema a̱ de nyian ne kpaa ga, shin a lu sha jijingi, shin a lu sha kwaghôron, shin a lu sha washika inja er ka se se nger, er iyange i Ter i kuma ve ga.

³Ne yô, ma or môm nana̱ de tsughun ne sha nyityôkwagh kpaa ga, gadia saa m-undu u hiden ijime la una vande van ve, man saa á pase or u vendan atindi, ka wan u mtim je la.

⁴Ka orhendan u kenden a iyol na sha er un hemba hanma kwagh u i yer un er Aôndo man hanma kwagh u i civir un la kpaa zan zan una tema ken tempel u Aôndo, una yôô er ka un je un lu Aôndo ye.

⁵Ne kera umbur er m lu ôron ne akaa ne zum u m lu a ven la gaa?

⁶Ne fa kwagh u a lu yangen hegen, sha u á va pase un sha shighe na yô.

⁷Gadia kera je kpaa kwaghmyer u mvende u vendan atindi la ngu eren tom, zan zan un u a lu yangen hegen la á va kar a na sha,

⁸ka zum la man á pase un u a vende atindi la ken igbar ye. Ter Yesu Una wua un sha iôôn i sha zwa Na man Una tim un kera sha mve Na man m-ande Na.

⁹Ka un u mve na a lu sha injatom i Satan sha uivande man akaa a kpilighyol a aiegh,

¹⁰man sha hanma inja i icugh i sha ifer ken mba vea tim yô, gadia ve ngohol dooshima u sha kwagh u mimi u ma ve war sha mi la ga.

¹¹Ka nahan man Aôndo Una tindi ve a icugh i taver i ia er vea na aie la jighjigh ye,

¹²sha er á ôr ior cii ijir mba ve ne kwagh u mimi jighjigh ga man ifer i gem i maa ve iyol la.

¹³Kpa se yô, ka u sé sugh Aôndo sha ci wen gbem, ne anmgbianev mba ne doo Ter ishima gadia Aôndo tsuwa ne sha hiihii je u zan ken myom sha mtsegh u sha Jijingi man sha u nan kwagh u mimi la jighjigh.

¹⁴Ka nahan je man A yila ne sha ivangeli yase sha u zuan a iengem i Ter wase Yesu Kristu la ye.

¹⁵Nahan yô, anmgbianev, tile nen dông, kôr nen akaa a i tese ne la gbang, shin a lu sha kwaghôron, shin a lu sha washika wase kpaa.

¹⁶Ter wase Yesu Kristu iyol Na man Ter wase Aôndo u se doo Un ishima man A ne se msurshima u tsôron man shi ishimaverenkeghen i dedoo sha mrumun u sha mhôôn la,

¹⁷A̱ sur ne asema, A̱ taver a sha hanma tom u dedoo kua kwaghôron u dedoo kpaa.