Read tiv 1 Timoteu 3 Bible Online

1 Timoteu 3 - tiv bible

1 Timoteu 3

¹Kwaghôron ne yô, ka u jighjigh, aluer or ngu keren u lun orkuran yô, ka tom u dedoo u sar nan ye.

²Orkuran yô, ka u nana̱ lu a acôghol a wan iyol ga keng je, nana̱ lu or u kwase môm, man or u kundun ishima, man or u tsev tsev, man or u eren kwagh sha inja, man or u eren dedoo a mbavannya, man or u fan ityesen kpaa.

³Nana̱ de lu or u cihin msôrom ga, nana̱ de lu or u cihin num kpaa ga, kpa nana̱ lu or u lun inja legh legh, nana̱ de lu or u hiin iyongo ga, shin u eren hua sha inyar kpaa ga.

⁴I̱ lu or u nengen sha ya u nan dedoo, nana̱ nengen sha ônov mba nan ve̱ tema sha inja sha inja, ve̱ lu mbaungwan kwagh.

⁵(Gadia aluer or nana fa u nengen sha ya u nan ga yô, á er nan man nana kura nongo u Kristu u Aôndo?)

⁶I̱ de lu or u nan sember geman ishima ga, sha u nana̱ de moron iyol nana̱ gbe ken ibo i yan i diabolo la ga yô.

⁷Ka u nana̱ lu a shiada u dedoo hen mba ken inya keng sha u nana̱ de gbe ken iheen nana̱ gba ken to u diabolo ga yô.

⁸Kape udiakon kpaa ve̱ lu la, ve̱ lu ior mba mimi, ve̱ de lu mba ijô ihiar ga, ve̱ de lu mbacihin wain ga, ve̱ de lu mbaeren hua sha mtsera u keren kpaa ga,

⁹ve̱ luun a kwaghmyer u jighjigh u nan ken imo i nan ibo ga i ken ishima.

¹⁰Kpa mban yô, á vande karen ve, aluer vea lu a acôghol iyol ga yô, ve̱ er tom u diakon.

¹¹Kape kasev kpaa, ve̱ lu mbamimi je la, ve̱ de lu mbaangerev ga, ve̱ lu mbakundunasema, ve̱ lu jighjigh ken akaa cii.

¹²Udiakon ve̱ lu ior mba lun a kwase môm môm, ve̱ nengen sha ônov vev dedoo kua sha uya vev kpaa.

¹³Mba ve eren tom u diakon dedoo yô, vea zua a iti i dedoo man shi vangertiôr kpishi sha jighjigh u nan u ken Kristu Yesu.

¹⁴M ver ishima u van hen we fefa, kpa m ngu ngeren we akaa ne,

¹⁵sha u aluer me timbir kpaa, ú fa er i doo u eren ken ya u Aôndo, ka nongo u Kristu u Aôndo u uma je la, ka ityôgh man imagh ki mimi a suur sha mi yô.

¹⁶Mimi je, kwaghmyer u a lu sha mcivir u se civir Aôndo la, vese tsô. I pase Un ken iyol i or ken igbar, i na Un ishô ken Jijingi, mbatyomov mba Shaav nenge a Na, i pase kwagh Na ken atôatyev, i na Un jighjigh sha won, i yem a Na sha ken iengem.