Read tiv 2 Timoteu 4 Bible Online

2 Timoteu 4 - tiv bible

2 Timoteu 4

¹M ngu wan we kwagh sha ishigh ki Aôndo man Kristu Yesu u Una va ôr mbaumav man mbakpenev ijir la, sha m-ande Na man tartor Na la,

²mer, yôô kwaghôron Na wa iyol sha mi keghen a kegh, a lu sha ian i doon, shin a lu sha ian i doon ga kpaa, kôôm, yangen, waan kwagh, sha ishima i wan tsung man sha ityesen kpaa.

³Gadia shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô.

⁴Vea tôô ato a ve sha kwagh u mimi la kera vea gema vea ver sha ukwaghhir.

⁵Kpa we yô, kundu ishima sha akaa cii, taver ishima sha ican you; er tom u ivangeli, kure u doo doo.

⁶Mo yô, mba urun mo kera er nagh ku urun nahan. Shighe u myem wam kuma.

⁷M nôngo ityav mbi dedoo ve. M kure ayem am vough, m saa a jighjigh u nan.

⁸Mase shin tsar u mhembe u perapera u i verem, u Ter Una nam sha iyange la yô, man ka mo tseegh ga kpa ka mba m-ande Na a doo ve la cii.

⁹Nôngo, va kohol mo fefa.

¹⁰Gadia Dema undum sha ci u tar u ainge ne u doo un yum yô, a yem a nagh Tesalonika. Keresene za Galatia, Titu za Dalematia.

¹¹Ka Luka tsô a shi vea mo ye. Kua a Marku, va a na, gadia ngum a inja kpishi sha tom.

¹²Tikiku yô, m tindi un ken Efese.

¹³Zum u ú vaan yô, vam a ikondo i cirin iyol i m undu ken Teroa sha ikev i Karepu la, kua ityakerada kpaa, jim je yô ka i i er sha akôv la.

¹⁴Alekesander or u varen togula la a er a mo dang kpishi. Ter Una or un iyev sha aeren a na la.

¹⁵We kpaa, sulan un, gadia a hendan a akaaôron a ase kpishi.

¹⁶Sha iyolpalegh yam i sha hiihii yô, ma or ta ken mo ga, i kendem tswen, kpa i̱ de ne ve ibo sha mi ga.

¹⁷Nahan kpaa Ter yô tile a mo her, A nam agee sha u m̱ ôr kwaghaôndo m̱ kure, atôatyev cii a̱ ungwa. Kape i yiman ken zwa u begha kera ne.

¹⁸Man Ter Una yimam sha hanma tom u dang, Una warem sha u m̱ nyôr tartor Na u Sha. Icivir i̱ lu i Na gbem sha won. Amen.

¹⁹Sugh Prishila man Akula man mba ken ya u Onesiferu, nam.

²⁰Erasetu ngu ken Korinte her. Terofimu yô, m undu un ken Milete uange.

²¹Nôngo, va kohol mo je er fam u lu a gba ga ne. Ubulu man Pudene man Lunu man Keloudia kua anmgbianev cii mba sughun we.

²²Ter A̱ lu a jijingi wou. Mrumun u sha mhôôn a̱ lu sha a ven.