Read tiv Titu 1 Bible Online

Titu 1 - tiv bible

Titu 1

¹Paulu, kpan u Aôndo man apostoli u Yesu Kristu sha inja i jighjigh u nan u uicuwan mba Aôndo man sha inja i mkav u kaven mimi u sha mciviraôndo la,

²ka sha ishimaveren keghen uma u tsôron, u Aôndo u A eren aie ga la, A tôndo zwa je er shighe lu a lu ga la.

³Kpa zum u shighe va kuma vough yô, A pase kwaghôron Na sha u yôôn un a yôô, man myee shon yô, i wam sha ikev sha imo i Aôndo Oryiman wase.

⁴M ngu sughun Titu, ka wan wam mimi ken jighjigh u nan u se zough sha mi la. Mrumun u sha mhôôn man bem mba ve dugh her Aôndo Ter wase man Yesu Kristu Oryiman wase, ve̱ lu sha a we.

⁵Kwagh u m undu u ken Kerete yô, ka sha u sôr akaa a kwagh a shi sha mi yô, shi ver mbatamen sha agar agar er lu m kaa u nahan.

⁶I̱ ver ior mba ve lu a acôghol iyol ga man ior mba ve lu a kwase môm môm man ônov vev kpaa i lu mbananjighjigh mba i ne ve ibo sha ijimba i eren ga shin sha ipila i eren kpaa ga yô.

⁷Orkuran yô, ka or u nengen sha ya u Aôndo, ka u nana̱ lu a acôghol iyol ga keng je shin or u norom ikaa shin or u yuwen fefa shin or u cihin msôrom shin or u cihin num shin or u keren mtsera u dang kpaa ga,

⁸kpa i̱ lu or u eren a mbavannya dedoo, man or u kwagh u dedoo a doo nan man or u tsev tsev man or u jighjigh man icighanor man or u kôron iyol na tsaha kpaa,

⁹nana̱ kôr ave taveraa sha kwaghôron u jighjigh er i tese nahan, sha u nana̱ fatyô u wan ior kwagh sha inja i ityesen i dedoo la man shi sha u nana̱ yangen kwagh a mba ve nyiman la.

¹⁰Gadia ior mba ve aren ave ve ngee, ka mbalamen gbilin gbilin man mbatsughunior, hemba kan mbaicôngov.

¹¹I̱ kusu ve ijô keng gadia ka ve nzughul uya mbagenev jimin cii sha ityesen i ma ve tese ga la sha u zuan a mtsera u dang.

¹²Orgen u ken ve lu profeti ve ayol a ve, a kaa er: Mbakerete ka mbaerenaie gbem je, ka inyamtoho i bo, ka mbauhweev mba eren fuul sha kwaghyan.

¹³Mpase ne ka u mimi je. Nahan yô, yange ve coholoo sha u i̱ kpe jighjigh ve u nan la iyol,

¹⁴man ve̱ de veren ishima sha ukwaghhir mba Mbayuda ga shin sha atindi a ior mba ve undu mimi la kpaa ga.

¹⁵Mba ve lu wang yô, akaa cii nga ve wang je, kpa mbahôngorough man mbanan jighjigh ga yô, ma kwagh ngu ve wang ga, kpa mhen ve kua imo i ken ishima cii hôngor.

¹⁶Ka ve pase er ve fa Aôndo kpa mba gem mba nyiman Un sha aeren a ve la; kwagh ve ndôhôr ishima, ka mbahembanato kpaa, ve kuma u eren ma kwagh u injaa ga.