Read tiv Mbaheberu 10 Bible Online

Mbaheberu 10 - tiv bible

Mbaheberu 10

¹Gadia tindi hira ngu di a mure u akaa a doon a a lu van la tsô, kera ka eev mbu akaa la jim ga. Mayange una fatyô u geman mba ve kporom la vea hingir vough sha iniav mbi shonov i môm i môm mbi i lu van a mi gbem la ga.

²A lu nahan ga yô, ma i mem u van a mbi gaa? Mba ve lu civir Aôndo la kpaa, aluer i wanger ve kwa môm kera yô, ma ve kera lu kaven asorabo a ve heregh ga.

³Kpa ken iniav mbila yô i lu umbur asorabo sha anyom anyom.

⁴Gadia awambe a anomabua man ivo aa fatyô u tôôn asorabo kera je ga.

⁵Ka nahan man Kristu er A va nyôr shin tar yô, A kaa er: Nagh ku sôngon man ku nan sar U ga, kpa ka iyol je U serem ye.

⁶Iniav mbi nanden jimin man mbi sha ci u asorabo yô, saan We iyol a mbi ga.

⁷Tsô M kaa mer: Nenge, M va,—ken ihurenruamabera i nger kwagh Wam ne,—ka sha u eren ishima You, Aôndo.

⁸A vande kaan er: Iniav mbi sôngon man mbi nan kua mbi nanden jimin man shi mbi sha ci u asorabo la sar U ga, saan We iyol a mbi kpaa ga, shin er i lu nan mbi sha tindi nahan kpaa.

⁹A shi A kaa er: Nenge, M va, ka sha u eren ishima You. A bunde kwagh u hiihii sha u Una ver u sha uhar la.

¹⁰Ka sha awashima ne man i tsegh se kwa môm bee, sha nagh ku i ne sha iyol i Yesu la ye.

¹¹Hanma pristi ka a tile use use u eren tom na man shi u va nan iniav mbi shonov i môm i môm mbila hanma shighe, mbi mbia fatyô u tôôn asorabo kera mayange ga.

¹²Kpa Un yô, A va na nagh môm tseegh sha ci u asorabo, maa A za tema sha uwegh ku yanegh ku Aôndo gbem.

¹³Ngu masen keghen zan zan á va gema mbaihomov Nav vea hingir Un kwagh u pendan angahar a Na sha mi.

¹⁴Gadia ka sha nagh môm je A gema mba i lu tseghan ve la, ve hingir vough gbem ye.

¹⁵Icighan Jijingi kpaa ngu eren shiada hen vese. Ken masejime u A kaa er:

¹⁶Ngin ka ikuryan i Me ya a ve ne er ayange ne aa bee yô, Ter shi kaa er: Me na atindi a Am ken asema a ve man ka ken mbamhen vev je Me nger a ye.

¹⁷Man asorabo a ve kua mvende u ve venda atindi la yô, Me kera umbur a je ga.

¹⁸Yô, ape mde u asorabo angan a lu yô, kwagh kera gba a nagh ku nan sha ci u asorabo ga.

¹⁹Nahan yô, anmgbianev, se mba vangertiôr u nyôron ken icighanjiir, ka sha awambe a Yesu,

²⁰sha gbenda u he man u uma u A bugh se la, ka u karen ken ikondo i yisan, inja na yô, ka iyol Na je la.

²¹Shi se mba a Pristi u tamen u A lu sha ya u Aôndo cii kpaa.

²²Nahan yô, se kporom nen a ishima i mimi, man a jighjigh u nan u lun a akpelan je ga er i mishi asema ase, i wanger imo i bo i ken ishima la kera, shi i ôô ayol a ase sha mngerem ma wang kpaa yô.

²³Se kôr nen ave gbang sha mpase u ishimaverenkeghen yase, i̱ de tenger ga, gadia Un u A tende zwa a vese la yô ka u jighjigh je.

²⁴Sé wa nen ayol a ase iko, sé taver nen ayol a ase asema u lun a dooshima man aeren a dedoo.

²⁵Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.

²⁶Aluer se mba eren asorabo sha apera zum u se ngohol mfe u mimi la kera yô, ma nagh sha ci u asorabo kera ku ga,

²⁷kpa kwagh u i lu masen keghen yô cier iyol, ka ijirôron kua igyamusu i ia hia mbahendan mbala kera yô.

²⁸Aluer or nana per tindi u Mose sha apera yô, ka nan kpe sha shiada u ior uhar shin utar, mhôônom ma zungwen ma kera lu ga.

²⁹Ne mba nengen nana? Or u nan ndyar Wan u Aôndo shin angahar a nan shi nan nenge er awambe a ikuryan a i tsegh nan sha mi la ka kwagh u hôngorough man shi nan laha Jijingi u mhôôn la yô, mtsaha u nan una kpen vihin nan sha wonoo?

³⁰Gadia se fa Un u A kaa er: Ka Mo je iyev i oron i lu i Yam ye, ka Mo Me na injar ye, man shi: Ter Una ôr nongoior Na ijir je.

³¹U gban sha ikev i Aôndo u uma yô, ka kwagh u cier iyol je.

³²Umbur nen ayange a karen la zum u kwagh va wanger ne la, ne nôngo ngegh sha atsan a a tser ne la.

³³Shighe ugen yô, i hee ne, i er ne ican ken igbar, shighe ugen ne nyôr nongo a mba i lu eren a ve nahan la.

³⁴Gadia mbakwarev kpaa, mhôônom kôr ne a ve; zum u i ya ne ishar kpaa, vihi ne ga ne lu saan saan je gadia ne ayol a en kpaa ne fa er ne lu a kwagh u hembandoon man u lun gbem yô.

³⁵Nahan yô, de te nen vangertiôr wen kera ga gadia ngu a injar i vesen.

³⁶Gadia gba u né lu a ishima i taver sha u eren ishima i Aôndo man né ngohol kwagh u i tende zwa a ven la.

³⁷Gadia: Shi côhin tseegh man Un u A lu van la Una va, ngôôr Na je ga.

³⁸Kpa or u perapera Wam nana lu uma sha jighjigh u nan, man aluer nana hide ijime yô, á kera saan uma Wam iyol a nan ga.

³⁹Kpa se yô, se mba mbahirenjime sha u za saan ishe ga, kpa se mba mbananjighjigh sha er uma una war yô.