Read tiv Mbaheberu 11 Bible Online

Mbaheberu 11 - tiv bible

Mbaheberu 11

¹Jighjigh u nan yô, ka u fan kwagh u ishimaverenkeghen yase i lu sha mi la dedoo a akpelan a tan ga, ka ikav i akaa a i nengen a mi ga la.

²Gadia ka sha kwagh u jighjigh u nan man i er mbayiase shiada u dedoo ye.

³Ka sha jighjigh u nan man se kav er i gbe tar cii sha mkaanem ma Aôndo ye, nahan akaa a i nengen a mi la kpaa, i er a sha akaa a i nengen a mi ga yô.

⁴Ka sha jighjigh u nan man Abel na Aôndo nagh ku hemban doon a ku Kain ye. Ka sha mi kpaa man i er un shiada er a lu or u perapera ye, Aôndo kpaa er shiada u dedoo sha uiwua nav mbala. A kpe, kpa sha jighjigh na u nan la yô, shi ngu ôron kwagh her.

⁵Ka sha jighjigh u nan man i yem a Heno Sha ye nahan a kera nenge a ku ashe ga, man i kera zua a na ga, gadia Aôndo yem a na. Gadia er i lu a yem a na ga je tsô i er shiada sha a na er a doo Aôndo ishima.

⁶Á fatyô u doon Aôndo ishima ga, saa sha jighjigh u nan. Gadia or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.

⁷Ka sha jighjigh u nan man Noa kpaa, zum u Aôndo wa un kwagh sha akaa a i lu a nenge a mi ga la yô, a wa iko a gba tso sha u yiman ya na. Ka sha jighjigh u nan ne kpaa man a na tar ibo ye shi a hingir or u yan dyako u perapera u a lu sha jighjigh u nan la.

⁸Ka sha jighjigh u nan man Aberaham zum u i yila un yô, a wa iko a due a gba yemen hen ijiir i una va ya dyako sha mi la, a due kpa a fa ape a lu zan je ga.

⁹Ka sha jighjigh u nan man a za tema ken tar u ityendezwa la ye, er ka tar na ga nahan a tsaan ken utenti vea Isaka man Yakob mba ve lu mbayandyako imôngo sha dyako shon la môm môm je.

¹⁰Gadia a lu keghen gar u a lu a imagh, u Aôndo A lu Orkaren man Ormaan un la.

¹¹Ka sha jighjigh u nan man Sara iyol na kpaa a ngohol agee a jilen iyol ye, shin er shighe na kar nahan je kpaa, gadia a fa ken ishima er Un u A tende zwa la A lu u jighjigh yô.

¹²Nahan yô or môm u a lu je er ka orkpen nahan la a mar ônov ngee er asan a sha kwavaôndo nahan man er waarawa u hen kpezegemnger nahan, gande u ôron.

¹³Ka ken jighjigh u nan man mban cii ve kpe ye, ve lu a ngohol uityendezwa ga, kpa ve nenge a ve ken ica, ve ember ve, ve pase gbar gbar er ve lu mbavannya man ushirmbaiorov shin tar yô.

¹⁴Gadia ve mba ve ôr anza akaa ne yô mba tesen er mba keren tar ve,

¹⁵gadia aluer vea lu umbur tar ve, u ve undu la yô, ma ve lu a ian i hiden je.

¹⁶Kpa hegen yô, ka u u hembe doon la u sar ve ye, inja na yô, ka u Sha je la. Ka nahan man Aôndo kpaa kunya u ker Un u i̱ yila Un er Aôndo ve ga ye, gadia A sôr ve gar.

¹⁷Ka sha jighjigh u nan man zum u i kar Aberaham yô, a na nagh sha Isaka ye, man un u a ngohol uityendezwa la yô, a na nagh sha wan na u môm môm la.

¹⁸Ka un u i kaa a na er: Ka sha Isaka man á ii tsombor wou iti ye.

¹⁹A fa ken ishima er Aôndo ngu a agee a nderen un shin mbakpenev je kpaa; ka shimi je man a shi a zua a na er ka ikav i tesen nahan kpaa ye.

²⁰Ka sha jighjigh u nan man Isaka ver Yakob kua Isou doo doo sha akaa a a lu van ken hemen la ye.

²¹Ka sha jighjigh u nan man Yakob zum u a lu nôngon ku la yô, a ver hanma wan u Yosev doo doo man a ngurum sha ityough ki gboough a er msen ye.

²²Ka sha jighjigh u nan man Yosev zum u uma na a bee yô, a ter mdugh a ônov mba Iserael vea va due la man a wa ve kwagh sha akuhe a na kpaa ye.

²³Ka sha jighjigh u nan man Mose zum u i mar un la, mbamaren un yer un kuma iwer itiar ye, gadia ve nenge er wan la doo ashe yô, tindi u tor kpaa ve kera cia ga.

²⁴Ka sha jighjigh u nan man Mose er a vese a kera rumun u i̱ yila un er wan u Wanfarao ga ye.

²⁵Lu un guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.

²⁶A nenge iheen i Kristu hemba lun un a inja a akaa a injaagh a Igipiti cii, gadia a ver ashe sha injar.

²⁷Ka sha jighjigh u nan man a undu Igipiti ye, iyugh i tor kpaa, a kera cia ga, gadia a taver ishima er ngu nengen a u i nengen a Na ga la nahan.

²⁸Ka sha jighjigh u nan man a ver Paseka kua awambe a mishin la ye, sha u ortimin ônov mba iundav la a̱ de benden ve ave ga yô.

²⁹Ka sha jighjigh u nan man ve per Zegemnger u Nyian er ka tareghnyaagh nahan ye, kpa Mbaigipiti mba nenge u ve kpaa vea er nahan yô, ve saa mnger.

³⁰Ka sha jighjigh u nan man zum u i ningir ugilmbaagarev mba Yeriko ayange ataankarahar yô, ve gba ye.

³¹Ka sha jighjigh u nan man Rahabi agbagakwase la tim a mbahembanato imôngo ga ye, gadia a nyôr a mbamkerev mbala bem bem.

³²Tsô me shi me kaa nana? Ian ia va yinam u me ôr kwagh u mba Gidion man Baraki man Samson man Yefeta man Davidi kua Samuel man uprofeti kpaa.

³³Mban yô, ve hemba ityartor ityav sha jighjigh u nan, ve er perapera, ve ngohol uityendezwa, ve cir ubegha ijô,

³⁴ve pir usu agee a u, ve war akur a sanker, i taver ve agee ken isheer, ve hingir mbataveryol ken utya, ve zenda akumautya a akuraior agen, yevese.

³⁵Kasev ngohol mbakpenev vev sha mnder u shin ku. Mbagenev yô, i er ve ican sha apera, ve kera rumun u waren ga, sha u ma ve zough a mnder u hemban doon.

³⁶Mbagenev yô, i kar ve sha aheen man akpa u gbidyen, shi i seer ahye man gaadi sha mi kpaa.

³⁷I ta ve awen, i mee ve, i tôndo ve atôôn ahar sha jerto, i wua ve sha sanker, ve zenden ve cir akôv a iyôngo man a ivo iyol, ibanave kohol ve, ican kpaa i tser ve, i er a ve dang dang je—

³⁸Ve yô, tar kuma sha ve kpaa ga—ve zenden ken taaikôngo man sha iwo man ken ubar kua ken avur.

³⁹Mban cii ka sha jighjigh u nan man lu i er ve shiada u dedoo ye, nahan kpaa ve lu a ngohol kwagh u i tende zwa sha mi la ga,

⁴⁰gadia Aôndo vande veren kwagh u hemban doon sha ci wase, sha er vea gba hingir vough ga saa se kpaa sé lu a ve imôngo.