Read tiv Mbaheberu 12 Bible Online

Mbaheberu 12 - tiv bible

Mbaheberu 12

¹Nahan yô, se kpaa er ikpela i mbashiada i vesen ve kase se yô, sé shir nen hanma ikav kua isholibo i ka i tseren se abur abur la, sé gba nen ayem sha ishima i taver tsung sha gesa u ayemegh u i ver se sha ishi la.

²Sé veren nen ashe sha Yesu Orhemen man Orkuren u jighjigh wase u nan, Un u A taver ishima a terankon, a kera wa kunya iko ga sha ci u iember i i ver Un sha ishi la, A za tema sha uwegh ku yanegh ku ikônough ki Aôndo ki torough.

³Ver nen ishima sha Un u A taver ishima sha imbaanyiman i mbaasorabo sha iyol Na la, sha u uma wen u ken ishima la a̱ de kera vôron ga, ishima kpaa, i̱ de yen ne ga.

⁴Er ne lu nôngon ityav a isholibo yô, ne mba a hendan a i, i ar ken ku ga.

⁵Shi kwaghwan hungul ne u i we ne er ka ônov nahan la er: Wan Wam, de lahan mkôôm u Ter ga, ishima i̱ de kera yinan we zum u A lu tsahan we la ga.

⁶Gadia or u nan doo Ter ishima yô, ka nan man A kôôm nan ye, man shi gbidi hanma wan u A rumun nan yô.

⁷Taver nen ishima sha mkôôm u i lu kôôm ne la. Aôndo ngu eren a ven er ka ônov nahan, gadia ka hanma wan man Ter A de kôôm nana?

⁸Aluer mba kôôm ne er mbagenev ve nyer sha mi cii nahan ga yô, ka umaramôndo ne lu ye kera ka ônov jim ga.

⁹Kwagh ugen yô, se lu a uter asev mba ken iyol, ve lu kôôm se, se lu ungwan imo ve man hire Ter u ujijingi la, se kera hemba ungwan imo Na man se lu uma ye gaa?

¹⁰Ve yô, ve lu kôôm se sha anyangem kpeghee er ve nenge i doo yô, kpa Un yô, ka sha u ma i kpe se iyol sha u ma se lu a kwar sha mtsegh Na.

¹¹Hanma mkôôm yô, sha shighe la ka i bee er ka kwagh u iember ga, kpa i lu kwagh u ijungwen, kpa ken masejime yô, ka a ume atam a perapera bem bem sha ci u mba i tsaase ve a tsaase sha mi la i var ve yô.

¹²Nahan yô, taver nen ave a a shir la kua anu a a kpe la kpaa.

¹³Dugh nen ihyange i nôô sha ci u angahar a en sha u kwagh u a keer la yô, a̱ de ndivir ga, kpa guda yô, a̱ hingir dedoo.

¹⁴Nôngo nen ngegh u lun bem a ior cii shi nôngo nen sha u lun a icighanmlu kpaa, u ma or u nana ban a mi yô, nana nenge a ter ga la.

¹⁵Shi kura nen sha er mhôônom ma Aôndo ma de bundu ma or ga yô, ma mise u yuan kpaa u̱ de menden u̱ ne anzughul man ior kpishi ve̱ zua a hôngor sha mi ga.

¹⁶Ma or nana̱ de luun or u idya shin dangor er Isou u a tee tamen na sha ankwaghyan ityô i môm tseegh nahan la ga.

¹⁷Gadia ne fa zum u i mase saren un pe yan dyako sha iveren i dedoo yô, i venda un gadia a kera zua a ian i geman ishima ga shin er a ker i ngegh, a mliam ashe je kpaa.

¹⁸Gadia ne kera mgbôghom a kwagh u i fetyô u benden un ave la ga, man a usu u yeghen, man ime, man dimii, man ijeverahumbe,

¹⁹man ikpamkor i kaan, man imo i ôron kwagh i mba ve ungwa i yô, ve zamber er i̱ de kera shi seer ôron ve kwagh ga la kpaa ga.

²⁰Gadia ve kera fatyô u taver ishima a icin i i ta ve la ga, er: Aluer ma zendenya tsô kpaa una bende sha uwo la yô, a ta un awen.

²¹Ivandeikaa la cier iyol je Mose kpaa kaa er, cier mo iyol yum, ikarikase gbidyem iyol.

²²Kpa ne mgbôghom a uwo u Shion man hen gar u Aôndo u uma, ka Yerusalem u Sha je la man ikpela i mbatyomov mba Shaav ngee gande u ôron, mba ve lu eren iniongo,

²³man mkohol u mbaiundav mba i nger ve ati Sha, man Aôndo, Orjir u akaa cii, man ujijingi mba mbaperapera mba i gema ve ve hingir vough la,

²⁴man shi Yesu, Orhimen u ikuryan i he, man awambe a mishin a a hembe ôron kwagh u doon a a Abel la.

²⁵Ver nen ishima, de vende nen Un u A lu ôron kwagh la ga. Gadia aluer mbala mba ve vende Un zum u A wa ve kwagh shin tar la ve war ga yô, man hire se mba se vende Un hegen er A lu ôron kwagh a vese Sha yee?

²⁶Sha shighe la imo Na tenger tar, kpa hegen yô, a tôndo zwa er: I shi kwa môm u Me tenger á kera lu tar tseegh ga, á kua Usha kpaa.

²⁷U kaan er, “shi kwa môm” yô, tese sha mkar u á va kar a akaa a a fetyô u tenger la kera, ka akaa a i gbe a je la, sha u akaa a a fetyô u tenger ga la yô, a̱ lu her.

²⁸Nahan yô, se ember nen er se ngohol tartor u u lu u tenger ga yô, ka nahan man sé er Aôndo tom u u doo Un ye, sha mcieaôndo man iyol i sulen.

²⁹Gadia Aôndo wase ka usu u hian kwagh kera.