Read tiv Mbaheberu 4 Bible Online

Mbaheberu 4 - tiv bible

Mbaheberu 4

¹Nahan yô, er ityendezwa i nyôron ken mmem Na i lu her yô, se cia nen sha u i̱ de nengen sha hanmô wen er i bunde nan ga.

²Gadia se kpaa, i ôr se Loho u Dedoo vough er i ôr mbala nahan. Kpa loho la lu ve a inja ga gadia u zua a jighjigh u nan hen ve mba ve lu ungwan la ga.

³Kpa se mba se ne jighjigh ne yô, ka se je se lu nyôron ken mmem ne ye, er i kaa yô, er: Er M bum sha ishimanyoon Yam nahan, vea nyôr ken mmem Wam mayange ga, Shin er ityom Na i kure hii sha mgbetar nahan kpaa.

⁴Gadia A ôr kwagh mape sha kwagh u iyange i sha utaankaruhar la er: Sha iyange i sha utaankaruhar la Aôndo mem ityom Na cii.

⁵Man ken ijiir ne A kaa er: Vea nyôr ken mmem Wam mayange ga.

⁶Nahan yô er i shi u mbagenev vea nyôr ker, man mbala mba ve vande zuan a Loho u Dedoo la ve kera nyôr ga sha ci u ihembeato yô,

⁷shighe kar vese, tsô A shi a ôr kwagh sha imo i Davidi, A ver iyange igen, A kaa er: Nyian je, er i vande kaan nahan la: Nyian je, aluer nea ungwa imo Na yô, de kera cighir nen asema a en ga.

⁸Aluer Yosua una ne ve mmem yô, mayange ma A kera ter iyange igen kposo ken masejime ga.

⁹Nahan yô, mmem shi her sha ci u nongoior u Aôndo er u sha iyange i Memen la nahan.

¹⁰Nahan u nan nyer ken mmem Na yô, nan mem ityom i nan er Aôndo iyol Na kpaa A mem i Na nahan.

¹¹Yô, se nôngo nen tsung u nyôron ken mmem la sha er ma or nana̱ de gbaan sha inja i ihembeato la ga.

¹²Gadia mkaanem ma Aôndo ma uma je, ma tem gbilin ga, ma hemba esen a hanma sanker u esen akur ahar cii, ka ma nyôr zan zan ma pav uma a jijingi man shi uijuan a mshiam kpaa, ka ma kar mbamhen kua mbaawashima kpaa.

¹³Ma kwagh u i gbe sha won kpaa ngu myer sha ishigh Nagh ga, akaa cii nga gbar gbar, i tar a tar a kpaa sha ashe a Wen u kwagh a zough se a Na la.

¹⁴Er se lu a Zegepristi u tamen u A nyôr Usha A haa ve ijime cii, ka Yesu Wan u Aôndo je la, nahan yô, se kôr nen ave gbang gbang sha mpase u jighjigh wase u nan la je.

¹⁵Gadia se mba a zegepristi u A fetyô u zungwen a vese imôngo ken aseer a ase ga ze, kpa ka u i mee Un sha hanma gbenda cii vough er se nahan, saa di isholibo tsô A er ga ye.

¹⁶Nahan yô, se kporom nen hen ikônough ki torough ki mhôôn vangertiôr sha u sé ngohol mhôônom ma zungwen man shi i̱ rumun se sha mhôôn, i̱ wase se sha shighe vough.