Read tiv Yakobu 1 Bible Online

Yakobu 1 - tiv bible

Yakobu 1

¹Yakobu, kpan u Aôndo man u Ter Yesu Kristu ngu sughun ikwe i pue kar ihiar i i sambe la.

²Anmgbianev av, i̱ lu ne kwagh u iember tseegh shighe u ameen atô kposo kposo aa va tser ne yô,

³gadia ne fa, mkar u i lu karen jighjigh wen u nan la ka a na ishima i taver.

⁴Ishima i taver yô, i̱ kure tom u i vough sha u né lu vough man jimin, né kera yina sha kwagh môm môm ga yô.

⁵Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.

⁶Kpa nana̱ sôn sha jighjigh u nan, nana̱ de te akpelan sha ma kwagh ga, gadia or u tan akpelan yô, nan bee igôndomnger i ahumbe a mough a mi a yemen a mi yô.

⁷Imbaor la yô, nana̱ de kera henen er nana zua a ma kwagh hen Ter ga,

⁸ka or u asema ahar, nan ngu ta ta ta sha igbenda i nan cii.

⁹Anmgbian u lun a icivir ga yô, nana̱ ta ihagh sha indi i nan,

¹⁰u nan lu ornyar yô, nana̱ ta ihagh sha mlu u nan u icivirigh ga la gadia nana va kar kera er ikparentoho nahan.

¹¹Gadia iyange ka i due i tsee, toho u use, ikparen u u kpaa a ndoor, mdoom ma mluashe na la kpaa ka ma kar kera. Kape ornyar nana use kua ityom i nan eren la cii kpaa.

¹²Or u nan taver ishima ken imeen yô, saan nan iyol, gadia zum u nana kar ikaren i i lu karen nan la yô, nana ngohol tsar u uma u A tende zwa sha mi a mba A doo ve ishima yô.

¹³Aluer á va mee ma or yô, nana̱ de kera kaan er ka Aôndo A meem ga, gadia á fatyô u meen Aôndo sha kwagh u ifer ga, man Un yô meen ma or ga.

¹⁴Kpa hanma or ka i mee nan zum u asaren a nan iyol i nan ka a urugh nan a hôn nan la.

¹⁵Zum u isharen ka i a jile iyol kera yô, i gema i mar isholibo. Isholibo di ia va vese yô i gema i dugh ku.

¹⁶De tsumen nen ga, anmgbianev av mba doon mo ishima.

¹⁷Hanma nagh ku dedoo man hanma iwua i vough kpaa ka Sha hen Ter u iwanger ve dugh, ve senen ye. Un yô, ma mgem ngu ken a Na ga, shin mure u mgem tsô kpaa ga.

¹⁸Ka sha awashima Na A mar se sha kwaghôron u mimi la ye. Ka sha u se̱ lu er ka iyiav mbi tsutswav nahan ken akaa a Un gbe la.

¹⁹Anmgbianev av mba doon mo ishima, fa nen kwagh. Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa.

²⁰Gadia iyugh i or yô, ngi ve a perapera sha ishigh ki Aôndo ga.

²¹Nahan yô, gbihi nen hanma kwagh u hôngorough man shi ifer i i dumbur la kera, ngohol nen kwaghôron u i môôr un ken a ven la sha ishima i legh legh, u una fatyô u yiman uuma enev.

²²Hingir nen mbaeren a er sha kwaghôron la, i̱ de lu mbaungwan a ungwa tseegh, tsughun ayol a en ga.

²³Gadia aluer ma or ngu ungwan kwaghôron la, kpa nan ngu eren sha mi ga yô, nan ngu inja er or u nan nenge ishigh ki nan ki marami la ken ijingi nahan.

²⁴Gadia ka nan nenge iyol i nan, kpa nan yemen kera yô, fese je i hungul nan er nan lu yô.

²⁵Kpa or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii, gadia u ungwan kwagh yô, nan ngu or u kwagh hungul nan fefa ga, kpa nan ngu or u eren tom je.

²⁶Aluer ma or ngu henen er nan cie Aôndo, kpa nan ker nombor u nan tsaha ga nan tsughun ishima i nan iyol i nan yô, mcieaôndo u nan la, ka gbilin tsô.

²⁷Mcieaôndo u wang u a lu a acôghol iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve, man shi u kuran iyol you wang sha kwagh u taregh.