Read tiv Yakobu 4 Bible Online

Yakobu 4 - tiv bible

Yakobu 4

¹Ka han man ityav mbi dugh ken a vene? Man shi ka han man iniumsuwen kpaa i dugh hen a vene? Kera ka sha asaren a en a a lu nôngon num ken alegh a en la gaa?

²Kwagh ka a sar ne, kpa ne mba a kwagh ga. Ne mba tômon ior ku, ne mba gban iwuhe, kpa ne mba fan ityô u zuan a kwagh ga; ne mba nôngon num kua ityav.

³Ne mba a kwagh ga, sha ci u ne eren msen vough ga yô, ka sha u za vihin sha asaren a en je la.

⁴Ne mbadyarev, ne fa er u yan ikar a tar i lu u lun ihom a Aôndo gaa? Nahan yô, or u i sar nan ka lun ikar a tar yô, nan hingir orihom u Aôndo je ve.

⁵Shin ne mba henen ner, ka gbilin tsô icighanruamabera a kaa er: A penda ishima sha jijingi u A na er a̱ tema ken vese la je zan zan iwuhe i gban kpaa yee?

⁶Kpa ka A na mrumun u sha mhôôn a ngee je a hemba a hemba. Ka nahan man A kaa er: Aôndo hendan kwagh a mba ve gengese ayol, kpa mba ve hir ayol a ve ijime la yô, ne ve mrumun u sha mhôôn.

⁷Gema nen ayol a en, na nen sha ikev i Aôndo man hendan nen a diabolo tsô una yevese ne.

⁸Kporom nen hen Aôndo, Un kpaa, Una kporom her a ven. Wanger nen ave a en, ne mbaasorabo, man shi kile nen asema a en, ne mba asema a lu ne ahar ne.

⁹Lu nen kususu, zungwe nen, vaa nen. Ahan a en la a̱ gema a̱ hingir ijungwen, iember yen kpaa, i̱ hingir iuren.

¹⁰Hire nen ayol a en ijime sha ishigh ki Ter man Una kende ne sha ye.

¹¹Anmgbianev, de er nen kwagh dang sha ayol a en ga. U nan er kwagh dang sha anmgbian shin nan gbe nan anmgbian u nan ibo tsô yô, ka atindiakaa nan lu ôron sha mi dang ye, shi ka atindiakaa man nan gbe nan a ibo tsô kpaa ye. Aluer u ngu nan tindi ibo yô, u kera ngu or u eren sha tindi ga, kpa u hingir or u ôron tindi ijir.

¹²Un u A we atindi, man shi Un u A lu Orjir ngu môm tsô, ka Un u A lu a tahav mbu yiman man shi tahav mbu timin kpaa ye. Kpa we yô, u ngu di nyi ve u gbe nan or u nan we ndor a we la ibo tsôô?

¹³Man ne mba ne kaan ner, nyian shin kper sé za ken gar ngula, sé za tema heera inyom i môm sé er kasua sé zua a mtsera;

¹⁴ne mba kper tsô kpaa ne kera fe er uma wen una lu ga ne. Gadia ne mba tulugh u ka a due i nenge a mi sha ashe kpeghee maa a shi a sambe kera ne.

¹⁵Ma ne kaa ner: Aluer Ter Una rumun yô, se lu uma, sé er nahan, shin nahan.

¹⁶Kpa hegen yô, ne mba tan ihagh sha imbwase yen i kaan. Imbaihagh ne cii ka ifer je.

¹⁷Nahan yô, or u nan fe u eren dedoo kpa nan kera er nahan ga yô, hingir isholibo je nan er ye.