Read tiv 1 Peteru 4 Bible Online

1 Peteru 4 - tiv bible

1 Peteru 4

¹Er Kristu A ye ican ken iyol yô, ne kpaa, kange nen ishima sha mhen ne, gadia u nan ye ican ken iyol yô, nan de isholibo ve,

²sha u ayange a ken iyol a a shi ne her yô, né kera eren sha asaren a ior ga, kpa i̱ lu sha ishima i Aôndo.

³Gadia ayange a a kar la zum u i lu eren er atôatyev a eren nahan la, kuma ve, er ve lu zenden ken ijimba i eren man asaren a bo man msôrom ma hunden man iniongo i gbilinigh man mbamkohol mba man msôrom man shi kwaghsôron u dang kpaa.

⁴Gema ka kpiligh ve iyol er ne kera nyer nongo a ve ken ijimba i eren i ganden ikaa inya la, ga yô; mba gbe lamen sha a ven dang tsô.

⁵Kpa vea va ôr kwagh ve sha ishigh ki Un u A kegh iyol u ôron mbaumav man mbakpenev ijir la.

⁶Gadia ka nahan man mbakpenev kpaa i ôr ve Loho u Dedoo sha u á ôr ve ijir ken iyol sha inja i mlu u ior la, kpa ve̱ gema ve̱ lu uma sha inja i mlu u Aôndo la.

⁷Kpa mkur u akaa cii mgbôghom ve; nahan kundu nen ishima shi lu nen geng ge geng kpaa, sha u né fatyô u eren msen yô.

⁸Kwagh u a hembe cii yô, doo nen ayol a en sha gbashima je gadia dooshima cirin asorabo kpishi.

⁹Yôron nen ayol a en, kpa de gban nen ahon sha mi ga.

¹⁰Er hanma or nan ngohol iwua i sha mrumun u sha mhôôn nahan yô, eren nen ayol a en tom a mi er mbatomov mba mimi mba sha mrumun u sha mhôôn u Aôndo sha igbenda kposo kposo la nahan.

¹¹Aluer hanma or nana ôr kwagh yô, i̱ lu er ka kwaghôron u Aôndo nahan, aluer hanma or nana er tom yô, i̱ lu er ka sha agee a Aôndo A ne yô, sha u á civir Aôndo ken akaa cii sha Yesu Kristu, ka Un A lu a iengem man tahav zan zan gbem sha won ye. Amen.

¹²Ne mbadoon mo ishima, bocan u a ve sha a ven sha u karen ne a kar la, a̱ de kpiligh ne iyol er ka kwagh u cier iyol man a va tser ne ga.

¹³Kpa her ape ne nyôr nongo a Kristu ken atsan a Na yô, ember nen, sha er shighe u m-ande u iengem Na la kpaa né va ember tsung.

¹⁴Aluer a hee ne sha ci u iti i Kristu yô, á kpe ne iyol je sha ci u Jijingi u iengem man u Aôndo A tem sha a ven yô.

¹⁵Kpa mô wen nana̱ de yaan ican er ka orwuanor shin ormbaiv, shin or u eren ifer shin or u amber sha akaa nahan ga.

¹⁶Kpa aluer orgen nana ya ican er Orkristu yô, kunya u̱ de ker nan ga, kpa nana̱ civir Aôndo ken Iti ne.

¹⁷Gadia shighe kuma u ijir ia ngurum sha ya u Aôndo je ve. Man á lu ken ian yase ia hii yô, mkur u mbahemban Loho u Dedoo u Aôndo ato la yô, una lu nana?

¹⁸Man aluer a shi zor zor u or u perapera nana war ga yô, or u nan vende Aôndo man orisholibo yô, vea za hana?

¹⁹Nahan yô, mba ve ye ican sha ishima i Aôndo la, ve̱ wa ayol a ve sha ikev i Ujighjigh u A gbe akaa cii la, ve̱ eren akaa a dedoo.