Read tiv Mbaajiriv 13 Bible Online

Mbaajiriv 13 - tiv bible

Mbaajiriv 13

¹Mbaiserael shi er kwaghbo sha ishigh ki TER; nahan TER na ve sha ikev i Mbafiliti anyom akunduahar.

²Orgen lu ken Sora, ken tsombor u Mbadan, iti na er Manoa; kwase na lu ikômkwase, maren ga.

³Tsô Ortyom u TER ande hen kwase la, kaa a na er: Nenge, u ngu ikômkwase je, u mar ga, kpa wan you iyav, ú mar wannomso.

⁴Nahan yô, shi ver ishima, de me wain ga, shin hanma kwagh u man hunden kpaa ga, shi de kera ye ma kwagh u lun wang ga ze;

⁵gadia nenge wan you iyav, ú mar wannomso; i̱ de ze un atsem sha ityou mayange ga; gadia wanakiriki la una lu Ornaseri u Aôndo er a lu ken uya je; ka un una hii u yiman Iserael sha ikev i Mbafiliti ye.

⁶Tsô kwase la va, va ôr nom na, kaa er: Or u Aôndo va hen mo, ishigh nagh ki er ishigh ki ortyom u Aôndo nahan, cier iyol kpishi; man mo kpaa, m pine un henpe a dugh ga, man un di kpaa, a kaam iti na ga;

⁷man a kaam er: Nenge, wan you iyav, ú mar wannomso; hegen yô, de kera me wain ga, shin hanma kwagh u man hunden kpaa ga, man de ye ma kwagh u lun wang ga ze; gadia wanakiriki la una lu Ornaseri u Aôndo er a lu ken uya je, zan zan á ar sha iyange i kuugh na.

⁸Tsô Manoa sôn TER, kaa er: Tere, shi na or u Aôndo u U tindi un la, a̱ shi a̱ va her a vese, a̱ va ôr se kwagh u sé er a wanakiriki u á mar la.

⁹Tsô Aôndo ungwa imo i Manoa; nahan Ortyom u Aôndo shi va hen kwase la zum u a tema ken won yô; kpa nom na Manoa yô, lu a na her ga.

¹⁰Nahan kwase la mough fese, za ayem, za kaa nom na er: Nenge, or u iyange va her a mo la, shi a va ande her a mo ve.

¹¹Tsô Manoa mough, dondo sha kwase na, va hen or la, pine un er: Ka we or u iyange u ôr kwagh a kwase ne nee? A kaa er: Ka mo.

¹²Tsô Manoa kaa a na er: Zum u kwaghôron wou una va kure sha mi yô, ka hanma injamkor sé kura wan shono, man tom na yô, á lu nyi tomo?

¹³Ortyom u TER la kaa a Manoa er: Kwagh u m kaa kwase ne cii, a̱ ver ishima sha mi.

¹⁴A̱ de ye ma kwagh u i zough a mi sha kon u wain ga, man shi de kera rumun wer, a̱ ma wain shin kwagh u man hunden kpaa ga, man a̱ de ye ma kwagh u lun wang ga ze; kwagh u m kaa un cii, a̱ wa iko sha mi.

¹⁵Tsô Manoa kaa a Ortyom u TER la er: Shi rumun se̱ timbir we, se̱ sôngo u wanivo.

¹⁶Ortyom u TER gema kaa a Manoa er: Shin er ú timbir mo nahan kpaa, me ya kwaghyan wou ga, aluer ka u pe nan nagh ku nanden yô, na TER ku. Gadia Manoa fa er a lu Ortyom u TER je ga.

¹⁷Nahan Manoa pine Ortyom u TER la er: Iti you er nyi; sha u kwaghôron wou una kure yô, se̱ civir we?

¹⁸Ortyom u TER gema kaa a na er: Ka nyi u pin iti yama, gadia ka i kpilighyol.

¹⁹Tsô Manoa tôô anivo kua nagh sha samuyia, a na TER nagh a mi sha iwen; A er kwagh u kpilighyol, Manoa kua kwase na ve lu kenger.

²⁰Er nomborusu u sha atse kôndo sha, Ortyom u TER la kôndo ken nomborusu u atsegh la, yem; Manoa man kwase na lu kenger; nahan ve gure ve kuma ishiv inya.

²¹Ortyom u TER kera shi ande hen Manoa shin hen kwase na ga. Nahan Manoa kav er a lu Ortyom u TER je yô.

²²Tsô Manoa kaa a kwase na er: Sé kpe kpee, gadia se nenge a Aôndo.

²³Kpa kwase na kaa a na er: Aluer á lu Aôndo ka wuan se yô, ma A ngohol nagh ku nanden man nagh ku sha samuyia sha ikev yase ga, man shi akaa ne cii ma A tese se ga, man shi ma A er se akaa er angan nahan ga.

²⁴Tsô kwase la mar wannomso a ii un iti er Semson; wan la vese, TER ver un doo doo.

²⁵Jijingi u TER hii u toron un ityô ken Mahanedan hen harga u Sora vea Esetaol.